Cit atir i jami ma tye

Cit atir ka ma nyuto lok ma tye iye

 DUL ME ABICEL

En Olego ki Cwinye Ducu Bot Lubanga

En Olego ki Cwinye Ducu Bot Lubanga

1, 2. (a) Pingo cwiny Anna onongo pe yom ka tye ka yubbe pi wotgi? (b) Ngo ma watwero pwonyone ki i lok kom Anna?

ANNA oketo kome i yubbe pi wotgi wek okwany tamme woko ki i kom pekkine. Onongo myero obed kare me yomcwiny; cware, Elkana, kare ducu onongo tero jo me ode ducu i wot man ma bedo mwaka ki mwaka pi woro Lubanga i kema ma tye i Cilo. Jehovah onongo mito ni kare ma kit magi obed me yomcwiny. (Kwan Nwoyo Cik 16:15.) Dok ngene kene ni Anna, cakke ki i tinone onongo maro kare me kwer magi. Ento jamine onongo olokke bote i mwaka ma okato ma pe bor.

2 En obedo ki mot me bedo ki laco ma mare. Ento, Elkana onongo tye ki dako mukene. Nyinge Penina, en onongo nen calo tye ki miti me miyo kwo pa Anna me bedo matek. Penina otamo i kom yo me weko kwer ma bedo mwaka ki mwaka-ni me doko twon arem cwiny madit bot Anna. I yo ango? Ki dok, niye pa Anna i kom Jehovah okonye nining me lweny ki peko mo matek ma nen calo pe kanye? Ka itye ka kemme ki peko mo ma rwenyo yomcwiny i kwoni, ci lok pa Anna romo cuko cwinyi.

“Cwinyi Cwer Pingo?”

3, 4. Pekki aryo madongo ango ma Anna obedo kwede, dok pingo peko acel acel obedo twon ayela?

3 Baibul nyuto peko aryo madongo i kwo pa Anna. En onongo pe twero timo gin mo ma konyo me cobo peko me acel, ento me aryone-ni aye dong ma kulu. Mukwongo, gin onongo gitye mon nyek, dok nyeke onongo dage mada. Me aryo, en onongo pe nywal. Peko me aryone-ni tek tutwal bot dako mo keken ma mito nywal; ento i kare pa Anna-gi ca, peko-ni onongo lit mukato kare. Luot acel acel onongo gijenge i kom lutinogi me kubo nyinggi wek pe orweny. Bedo lalur onongo kineno calo gin me lewic mada.

 4 Anna onongo romo kanyo lewic meno mot kono pe pi Penina. Coko mon mapol onongo pe obedo kit maber me kwo. Nyeko, daa, ki abarwic onongo dwong ata. Tim meno onongo pat ata ki cik me nyomo ngat acel keken ma Lubanga oketo i poto me Eden. (Acak. 2:24) Baibul nyuto rac pa coko mon, dok gin ma otimme i ot pa Elkana tye calo labol acel ma nyuto rac pa kwo ma kit meno.

5. Pingo Penina onongo mito ni Anna oden can, dok en otono cwiny Anna nining?

5 Elkana onongo maro Anna loyo Penina. Lok me tekwaro pa Lujudaya nyuto ni en onyomo Anna mukwongo ka dong onyomo Penina i nge mwaka mo lacen. Kadi bed kit meno, Penina, ma onongo nyek tutwal i kom Anna-ni, onongo yo mapol me twenyo nyeke malit. Gin madit ma Penina onongo loyo iye Anna aye obedo kero me nywal. Penina obedo ka kette kene ni pire tek tutwal pien obedo ka nywalo lutino mapol ma gilubbe aluba. Ma ka paro pi peko pa Anna ki kweyo cwinye pi canne, Penina otiyo kwede aye doki. Baibul wacci Penina obedo ka ngeto i Anna marac “ki cwero cwinye.” (1 Cam. 1:6) Penina onongo timo akaka. Onongo mito tono cwiny Anna, ma bene otono-ni.

Lur pa Anna okelo par madit bote, dok Penina ocwako mac wek Anna owiny marac adada

6, 7. (a) Kadi bed Elkana otemme me kweyo cwiny Anna, pingo Anna oromo bedo ni pe otitte gin mutimme ducu? (b) Lur pa Anna–ni onongo mono nyuto ni cwiny Jehovah cwer i kome? Tit kong. (Nen lok ma tye i tere piny.)

6 Kare ma orwatte tutwal bot Penina me cwero cwiny Anna nen calo obedo i kare me wot i woro ma bedo mwaka ki mwaka i Cilo. Elkana omiyo dul ringo me atyera bot Jehovah bot lutino mapol pa Penina—“awobene ki anyirane ducu.” Anna ma latinne mo pe-ni, kimiye mere dul acel ci otum. Penina otugi kato i kom Anna kun poyo wiye i kom lurne-ni ma omiyo Anna oero koko ma miti me cam bene orweny woko ki i doge. Elkana oneno ka maleng ni dakone me amara Anna iye pe yom dok pe tye ka cam, ci otemo kweyo cwinye. Openyo ni “Anna, ikok pingo? Pingo pe icamo? Cwinyi cwer pingo? An pe ayomo cwinyi makato awobe apar?”1 Cam. 1:4-8.

7 Elkana oniang kakare ni cwercwiny Anna-ni kubbe ki bedone labongo nywal. Dok Anna i ada otero lokke me mar-ri calo  gin maber. * Ento Elkana pe oloko i kom lok anywar pa Penina-ni; kadi wa Baibul bene pe waco ni Anna otitte lokke. Gwok nyo oneno ni doto Penina dok biywayo moro ki lakarakidi i kome. Elkana tika onongo twero cobo lok meno? Mono adegadega pa Penina pe bimedde ameda, dok lutino ki lutic pa dako ma lebe kec-ci pe gibidonyo iye? Anna onongo dong winyo calo latin kic i gang ma mege.

I kare ma kibedo ka tere marac ki paco, Anna olokke bot Jehovah pi nongo kwe cwiny

8. Ka itye ka kemme ki ngolo kop alenga ki nyeko ming ming, pingo ber me ngeyo ni Jehovah obedo Lubanga ma ngolo kop atir?

8 Kono Elkana onongo ngeyo lok alany pa Penina onyo pe, ento Lubanga Jehovah onenogi ducu. Lokke nyuto ni ongeyo jami ducu, ma man tye calo lok ma ciko ngat mo keken ma maro nyeko ki adegadega mingo mingo. Ki tungcel, jo ma maro kuc, calo Anna gitwero bedo ki kwe cwiny me ngeyo ni Lubanga ma ngolo kop atir biyubo jami ducu maraco doko maber i karene ki dok i yo ma en ngeyo. (Kwan Nwoyo Cik 32:4.) Gwok nyo Anna ongeyo meno, pien en olokke bot Jehovah pi nongo kony.

“Wange Odoko Leng”

9. Pwony ango ma wanongo ki bot Anna pe me kwero cito i Cilo kadi bed onongo ngeyo kit ma nyeke timme kwede?

9 Kwar piny ma piny dong cok ruu, wiciwici onongo oketo jo me odi woko. Dano ducu onongo gitye ka yubbe pi wot, kadi wa lutino. Wot me cito Cilo onongo miyo giwoto mairo 20 kun gingolo lobo Epraim ma obedo cere cere nyo tur. * Wot ki tyen onongo tero nino acel nyo aryo. Anna onongo ngeyo kit ma nyeke timme kwede. Ento Anna pe odong gang. En onyuto lanen maber pi luwor Lubanga wa i kare-ni. Pe ber me weko tim marac pa jo mukene me gengowa ki woro Lubanga. Ka waweko ogengowa, ci wabikeng mot mabeco ma myero ojingwa me kanyo peko moni-ni.

10, 11. (a) Pingo Anna ocito i kema me woro Lubanga oyotoyot? (b) Anna oloko lok ma tye i cwinye bot Wonne me polo i lega nining?

10 I nge wot pi kare malac i yo ma ogone i kin godi, luot-ti onongo dong gicok o i Cilo. Oo ma gineno boma meno tye olede i wi cere kun cere mukene maboco orume i dyere. Ma gicok o, Anna myero obed ni otamo matek tutwal i kom gin ma ebilego  ki bot Jehovah. I kare ma guo, luot-ti gucamo kacel. Anna oa woko ki i kingi oyotoyot ci ocito wa i kema me woro Jehovah. Lalamdog Madit Eli onongo tye obedo i dog kema. Tam pa Anna onongo ocung i kom Lubangane. I kema kany, en onongo tye ki gen ni kibiwinye. Ka ngat mo onongo pe twero niang pekone maber, Wonne me polo gire onongo twero niang. Litte ocako remo cwinye, ci ocako koko.

11 I kare ma Anna tye ka koko kun cwako ume, kome ocako yenge, ci ocako loko arem ma tye i cwinye laling ling bot Jehovah ma del doge keken aye yenge. En olego pi kare malac, kun tito lok ducu ma tye i cwinye bot Wonne. En pe openyo Lubanga me cobo mitine madit me nywalo latin keken. Anna pe onongo mito nongo mot keken ki bot Lubanga, en bene onongo mito miyo gin ma en twero miyone. Pi meno, en okwonge, kun waco ni ka enongo latin laco, ci ebijalo latin meno me tiyo tic pa Jehovah pi kare me kwone ducu.1 Cam. 1:9-11.

12. Kit ma lanen pa Anna nyuto kwede, ngo ma omyero obed i wiwa ka odok i lok kom lega?

12 Dong, Anna onyuto lanen maber bot lutic ducu pa Lubanga i lok kom lega. Jehovah mito ni jone ducu gubed agonya me loko lok ducu ma tye i cwinygi labongo lworo kit macalo latin ma genne loko ki lanywalle me amara. (Kwan Jabuli 62:8; 1 Jo Tecalonika 5:17.) Lakwena Petero otiyo ki cwiny maleng me coyo lok man me kwe cwiny ma kwako lega bot Jehovah ni: “Wuket parwu ducu i kome, pien en tamo piwu.”1 Pet. 5:7.

13, 14. (a) Eli oniang marac i kom Anna nining? (b) Kit ma Anna odok kwede i lok pa Eli nyuto lanen maber me niye nining?

13 Dano pe ginyuto niango ki kica calo Jehovah. Ka Anna tye ka lega kun woto ki koko, dwan mo dok opoyo kome. Meno onongo obedo Eli, lalamdog madit, ma obedo ka neno en. En owacci: “Ibimer pi kare ma rom mene? Juk mero ki kongo vinoni-ni woko.” Eli oneno yenge pa del dog Anna, cwako ume, ki kit ma kome otonge kwede. Ma ka penye gin marac, en ongolo macek ni Anna omer amera.1 Cam. 1:12-14.

14 Anna owinyo malit adada me rwatte dok ki koko ma tere pe ma kimuko i kome, i kare me arem cwiny ma kit meno—kun dok a ki bot dano ma tye i rwom me aworo-gu! Kadi bed kit meno, en dok aye onyuto lanen maber me niye. En pe oweko bal pa dano lawote me doko ariya me woro Jehovah. En ogamo Eli ki woro kun tito pekone bote. Gwok nyo Eli ongeyo ni etimo rac, ci ogamo ki dwan me mwolo ni: “Wot ki kuc. Lubanga pa Icrael myero oye legani ma ikelo bote-ni.”1 Cam. 1:15-17.

15, 16. (a) Lega ma Anna olego kun loko lok ducu ma tye i cwinye bot Jehovah kacel ki wore i kemane omiyo en owinyo nining? (b) Wan watwero lubo lanen pa Anna nining ka watye ka lweny ki turcwiny?

 15 Adwogine obedo ningo bot Anna i nge loko lok ducu ma tye i cwinye bot Jehovah kacel ki wore i kemane? Ginacoya waco ni: “Ka okato ocito woko, ocako cam, ci wange odoko leng.” (1 Cam. 1:18) I Baibol pa Katoli, kany kwanne ni: “Ci tur nyime pe dok orung.” Yamo ocako kuto Anna. En onongo dong ocibo yec mapek me par ma en tye kwede i wi ngat matek loye mabor ata, ma obedo Wonne me polo. (Kwan Jabuli 55:22.) Tika tye kit peko mo makato tekone? Pe—kadi wa acel!

16 Ka wawinyo ni turcwiny onurowa adada, ci ber me lubo lanen pa Anna me loko lok ducu ma tye i cwinywa bot ngat ma Baibul waco ni ‘gamo lega-gu ducu.’ (Jab. 65:2) Ka walego kumeno ki niye, ci wan bene wabinongo ni “kuc pa Lubanga ma kato ngec pa jo ducu” rwenyo cwer cwinywa woko.Pil. 4:6, 7.

“Got mo Pe ma Rom ki Lubangawa”

17, 18. (a) Elkana ocwako kwonge pa Anna nining? (b) Yo pa Penina me nywaro Anna oket nining?

17 I odikone, Anna odwogo cen i kema me woro ki Elkana. En nen calo owacce gin ma en olego kacel ki kwongene, pien Cik pa Moses waco ni laco tye ki twero me gonyo kwonge ma dakone okwongo labongo penyo tamme. (Wel 30:10-15) Ento laco ma lagen man pe otimo meno. Ma ka meno, en ki Anna guworo Jehovah kacel i kema me woro ma peya guilo wot me dok paco.

18 I kare mene ma Penina ongeyo kwede ni yone me nywaro Anna dong oket? Ginacoya pe waco, ento lok ma kicoyo ni “ci wange odoko leng” nyuto ni cwiny Anna odoko yom cakke i kare meno. Kadi bed ningo, Penina ongeyo ni tic ki leb mabit-ti pe dong okonye ki gin mo. Baibul pe dong oloko i kome matwal.

19. Mot ango ma Anna onongo, dok en onyuto nining ni engeyo ka ma mot meno oa ki iye?

19 I nge dwe mogo, pye pa wi Anna-ni onyak odoko twon yomcwiny madit. En ogamo iye! I kare me yomcwinye, wi Anna pe owil kadi kicel ka ma mot meno oa ki iye. I kare ma kinywalo awobi-ni, en ocako nyinge ni Camuel, ma tyene ni “Nying Lubanga” ma nen calo kubbe ki lwongo nying Lubanga, ma Anna olwongo. I mwaka meno, en pe owoto ki Elkana ki jo me pacone me cito i Cilo. En obedo paco ki latinne pi mwaki adek, nio wa i kare ma dong gigengo ki i cak. Ci ocako yubbe me nongo  kero pi nino ma gibipokke ki wode me amara-ni.

20. Anna ki Elkana gucobbe cikke ma gucikke kwede bot Jehovah nining?

20 Pokkegi myero obed ni pe obedo yot. Ngene kene ni Anna onongo ngeyo maber ni kibigwoko Camuel maber i Cilo, nyo gwok mon ma gitiyo i kema me woro ca aye gibigwokke. Kadi bed kit meno, en onongo pud tidi, dok kodi mego ango ma cwinye pe mito bedo ki latinne? Ento, Anna ki Elkana gukelo awobi-ni ki yomcwiny labongo koko mo. Gutyero mot i ot pa Lubanga, ci gumiyo Camuel bot Eli, kun gipoyo wiye i kom kwonge ma Anna okwonge kwede mwaki ma okato angec.

Anna odoko twon mot madit bot wode Camuel

21. Lega pa Anna bot Jehovah onyuto tut pa niyene nining? (Nen  bok ma tye i pot karatac man.)

21 Ci Anna olego lega mo ma Lubanga oneno ni porre me aketa i Ginacoya. Ka ikwano lokke ma kicoyo i 1 Camuel 2:1-10, ci ibiniang tut pa niyene. En opako Jehovah pi tekone me aura, me keto awaka pa luwaka, me miyo mot bot jo ma kidiyogi, ki me giko kwo nyo me larone ki i to. En opako Wonne pi lengone, ngolo kop atir-re, ki bedo lagen. Omiyo Anna obedo ki tyen lok me wacci: “Got mo pe ma rom ki Lubangawa.” Jehovah genne adada dok pe lokke, obedo ka gwokke pa jo ducu ma kiuno dok kidiyogi ma gilokke bote pi nongo kony.

22, 23. (a) Pingo watwero bedo labongo akalakala ni Camuel odongo kun ngeyo ni lunywalle mare? (b) Jehovah omedde ki miyo mot bot Anna nining?

22 Camuel ma onongo pud tidi obedo ki mot me bedo ki mego ma opong ki niye i kom Jehovah. Kadi bed pe gubedo kacel, ento en pe obedo kic kic ma winyo ni wi mine owil woko i kome. Mwaka ki mwaka, Anna onongo bino i Cilo, kelle bongo pi ticce i kema me woro. Wang uci  acel acel ma okwoyo onongo tye calo lanyut me marre pi wode. (Kwan 1 Camuel 2:19.) Watwero goyo calle i wiwa ka en tye ka ruko bongo manyen-ni i kom awobi-ni, kun yweyo ki cinge, neno kit ma omake kwede, dok loko ki mwolo me cuko cwinye. Camuel obedo ki mot madit me bedo ki mego ma kit meno, dok i kare ma odongo, en obedo twon mot madit bot lunywalle ki jo Icrael ducu.

23 Dok wic bene pe owil i kom Anna, Jehovah omiye mot me nywal, en onywalo awobe abic mukene bot Elkana. (1 Cam. 2:21) Mot madit ma Anna myero obed ni onongo tye kwede obedo wat matek ma obedo i kin en ki Wonne, Jehovah, ma obedo ka dongo medde ameda mwaka ki mwaka. Walego ni gin acel-li otimme i komi, ka itye ka lubo niye pa Anna.

^ para. 7 Kadi bed Baibul waco ni Jehovah ‘otweyo i Anna omiyo pe nywal,’ ento pe tye gin mo keken ma nyuto ni cwiny Lubanga ocwer i kom dako man ma lagen dok mwol-li. (1 Cam. 1:5) Kare mukene Baibul waco gin ma Lubanga oye ni otimme pi kare mo calo en ma otimo.

^ para. 9 Wel mairo-ni cung i kom ngec ni Rama, ma obedo boma pa Elkana, aye obedo kabedo ma kilwongo ni Arimataya i kare pa Yecu.