Cit atir i jami ma tye

Cit atir ka ma nyuto lok ma tye iye

 DUL ME 5

Kit me Bedo Pat Ki Lobo

Kit me Bedo Pat Ki Lobo

’Wun pe wubedo jo me lobo.’JON 15:19.

1. Yecu oloko matek i kom ngo i dyewor me agikki me kwone i lobo macalo dano?

I DYEWOR me agikki me kwone macalo dano i lobo, Yecu onyutu parre pi kit ma kwo pa lulub kore bibedo kwede i kare me anyim. En olego pi lok man kun waco bot Wonne ni: “Pe alego ni myero ikwanygi woko ki i lobo, ento ni igwokgi ki i kom gin marac. Gin pe jo me lobo, macalo an pe a dano me lobo.” (Jon 17:15, 16) I legane ki cwinye ducu, Yecu onyutu marre matut pi lulub kore dok onyutu kit ma lokke ma en onongo kong oloko con bot jo mogo i kingi i dyewor meno pire tek kwede: ‘Wun pe wubedo jo me lobo.’ (Jon 15:19) Ada, pire onongo tek tutwal bot Yecu ni lulub kore omyero gubed pat ki lobo!

2. “Lobo” ma Yecu oloko pire-ni obedo ngo?

2 “Lobo” ma Yecu oloko pire-ni obedo dano ducu ma gupokke woko ki i kom Lubanga, ma Catan aye obedo lalocgi, dok bene gubedo opii pa cwiny me awaka ki me paro pigi kengi ma a ki bote. (Jon 14:30; Jo Epeco 2:2; 1 Jon 5:19) Ada, “mako larem ki lobo [meno] miyo dano doko lakwor pa Lubanga.” (Yakobo 4:4) Cakke nining ni jo ducu ma gimito bedo i mar pa Lubanga gikwo i lobo kun nongo gibedo pat kwede? Wabineno yo abic mapat pat: bedo ngat ma lagen i kom Ker pa Lubanga ma tye i te loc pa Kricito ki bedo ma pe wacwako tung ka mo keken i lok me wibye, kwero cwiny me lobo man, bedo ma wapore i rukwa ki kit ma wanen kwede, bedo ki wang ma pe mito  jami mapol, ki dong ruko jami lweny me cwiny ma a ki bot Lubanga.

BEDO LUGEN KUN PE WACWAKO TUNG KA MO KEKEN

3. (a) Yecu oneno lok me wibye i karegi ca nining? (b) Pingo kiromo wacone ni lulub kor Yecu ma kiwirogi-ni gitye macalo luwang Kricito? (Med ki lok ma tye piny.)

3 Me ka royo wiye i lok me wibye i kare ca, Yecu oketo cwinye i tito kwena me Ker pa Lubanga ma obedo gamente me polo ma en aye bibedo kabakane i kare me anyim. (Daniel 7:13, 14; Luka 4:43; 17:20, 21) I kare ma tye i nyim Pilato laloc me Roma, Yecu owaco ni: “Kerra pe me lobo man.” (Jon 18:36) Lulub kore ma gin lugen gulubu lanenne ki miyo cwakgi bot Kricito ki Kerre ki tito pi Ker meno i lobo. (Matayo 24:14) Lakwena Paulo ocoyo ni “En mumiyo wadoko lukwena, luwang Kricito. . . . Wan bene wabako dogwa botwu ma ka Kricito ni: ‘Wuwek Lubanga odwokwu bote.’” *2 Jo Korint 5:20.

4. Lukricitayo me ada ducu gunyutu ni gibedo lugen i kom Ker pa Lubanga nining? ( Nen bok ma tye i pot karatac 52.)

4 Kit ma lucungo dwar gicung pi lobogi-ni, gin pe girwako wigi i lok me wibye me lobo ma gitye iye-ni; gicung ma pe gicwako tung ka mo keken. Lucungo dwar pol kare gicwako gamente pa lobo ma gicung pire-ni. Man bene rom aroma ki lulub kor Kricito ma kiwirogi, ma ‘gang kalgi madit tye i polo-ni.’ (Jo Pilipi 3:20) Tito pi kwena me Ker-ri ki mit komgi-ni otimo ber okonyo dano milion mapol ma gitye “romi mukene” pa Kricito me ‘dok bot Lubanga.’ (Jon 10:16; Matayo 25:31-40) Gin gitye macalo luor pa Kricito,  ma gikonyo kor omegi Yecu ma kiwirogi. Gurup aryo-ni guribbe calo romi me dwol acel i tito pi Ker pa Meciya, kun gigwokke ki i luto wigi i lok me wibye me lobo man.Kwan Icaya 2:2-4.

5. Lukricitayo gipat ki jo Icrael macon ca nining, dok Lukricitayo ginyutu man nining?

 5 Pe ni bedo lugen bot Kricito keken aye oweko Lukricitayo gibedo ma pe gicwako lok me wibye. Wan pe wabedo calo jo Icrael me kare macon ma Lubanga omiyogi lobo acel keken-ni, wan wabedo utmego ma watye i but lobo ducu. (Matayo 28:19; 1 Petero 2:9) Pi meno, ka ni wadony i lok me wibye, ci tito pi kwena me Ker-ri kun nongo waloko ma watye agonya ki dong notewa macalo Lukricitayo biballe woko. (1 Jo Korint 1:10) Medo i kom meno, ka i kare me lweny, nongo wabilwenyo i kom luye luwotwa ma kicikowa ni myero wamargi. (Jon 13:34, 35; 1 Jon 3:10-12) Dong Yecu owaco bot lupwonnyene ni omyero guket pala lucwan piny pi tyen lok matir. En bene owaco botgi ni omyero gumar lukworgi.Matayo 5:44; 26:52; nen bok ma wiye tye ni “ An Tika Atye ma pe Acwako Tung ka mo Keken?” i pot karatac 55.

6. I yo ango ma dyereni bot Lubanga gudo kwede wati ki Cecar?

6 Macalo Lukricitayo me ada, wan wadyero kwowa bot Lubanga ento pe bot ngat mo, dul pa dano mo, nyo lobo mo. Buk pa 1 Jo Korint 6:19, 20 wacci: “Wun pe wutye piwu kenwu, dong giwilowu awila ki wel.” Pi meno, kadi bed lulub kor Yecu gimiyo bot “Cecar” jami ma en mito calo woro, mucoro, ki bedo ki winy mupore, ento gimiyo ‘jami pa Lubanga bot Lubanga.’ (Marako 12:17; Jo Roma 13:1-7) Man tye iye worogi, margi ki cwinygi ducu, ki dong bedo lugen. Gin gitye atera me miyo kwogi pi Lubanga ka ce mitte.Luka 4:8; 10:27; kwan Tic pa Lukwena 5:29; Jo Roma 14:8.

KIT ME KWERO “CWINY ME LOBO MAN”

7, 8. “Cwiny me lobo-ni” obedo gin ango, dok cwiny meno ‘tiyo’ i i dano nining?

7 Yo mukene ma Lukricitayo gibedo pat kwede ki lobo aye me kwero cwiny-nye marac-ci. Lakwena Paulo ocoyo  ni: “Pe gimiyowa cwiny me lobo man, ento gimiyowa cwiny ma oa ki bot Lubanga.” (1 Jo Korint 2:12) Bot jo Epeco en owacci: ‘Wun bene onongo wulubu yo marac me lobo man, kun wuwinyo lok pa ngat ma loyo twer mogo ma tye malo i dye yamo, ma en aye cwiny ma kombeddi tye ka tic i cwiny jo ma dag winyo lok ma Lubanga waco.’Jo Epeco 2:2, 3.

8 “Yamo” me lobo man nyo cwiny-nye aye obedo teko mo ma pe nen ma kelo cwiny me jemo i kom Lubanga dok dongo “miti me komwa ma ginywalowa kwede, ki miti marac pi gin ma waneno ki wangwa.” (1 Jon 2:16; 1 Temceo 6:9, 10) “Twer” me cwiny man tye ki teko me puku cwiny dano pi cobo mitigi me kom me bal-li, dok tiyo lapiny piny, marac ma oromo kin piny ducu calo yamo. Dok bene ‘tiyo’ i ngat moni mot mot kun dongo i cwinye kit mogo ma pe rwatte ki cik pa Lubanga, calo cwiny me wanya, me awakke, miti marac me jami, ki cwiny me jemo kacel ki me lone ken. * Me ketone i yo mayot, cwiny me lobo man weko cwiny pa Larac dongo mot mot i i dano.Jon 8:44; Tic pa Lukwena 13:10; 1 Jon 3:8, 10.

9. I yo ango ma cwiny me lobo man romo donyo kwede i tamwa ki cwinywa?

9 Cwiny me loboni mono twero rwako lwite i cwinyi nyo i tammi? Twero maber, ento man timme ka ce imine kare ki bedo ma wangi pe twolo. (Kwan Carolok 4:23.) Cwiny meno cako donyo i yo ma pe ingeyo, calo i yo me bedo ki lurem ma guromo nen calo jo mabeco ento kun i adane nongo pe gimaro Jehovah. (Carolok 13:20; 1 Jo Korint 15:33) Waromo bene nongo cwiny man marac me lobo-ni ka ce wakwano bukke maraco, ka wayabo kabedo  me Intanet ma tye ki cal macilo nyo tye ki lok pa jo mungak, ka wadonyo i galowang ma pe opore, kacel ki i pyem tuko mogo magwar adada—ket dong ni, romo wok ki bot ngatti mo nyo gin mo keken ma nyutu tam pa Catan nyo me lobone man.

10. Waromo kwero cwiny me lobo-ni nining?

10 Waromo kwero cwiny marac me lobo man nining wek wabed i mar pa Lubanga? Man timme keken ka ce  watiyo maber ki jami me cwiny ma a ki bot Jehovah dok ka walego pi cwiny mere maleng labongo keng. Jehovah tek loyo Larac-ci nyo lobo man marac ma tye i te loc pa Catan-ni tyen mabor ata. (1 Jon 4:4) Pud dong pire tek adada ni omyero wabed cok ki Jehovah i lega!

BEDO MA WAPORE I RUKWA KI KIT MA WANEN KWEDE

11. I yo ma nining ma cwiny me lobo-ni ogudo kwede kit me ruk?

11 Gin ma nyutu ka maleng cwiny ma nongo tye ka doro ngat moni obedo rukke, kit ma nongo en nen kwede, ki dong lengo kome. I lobe mapol, rwom me ruk opoto ma pe wacce ma oweko lador yub mo me telebijon owacci odong manok keken ci bongi ma malaya myero guruk me pokogi dong bibedo pe pien anyira bene dong gucako donyo magwar i lakodi rukgi-ni aboka lam. Kadiwa anyira matino ma mwakagi pe o apar wiye bene dong gitye ka lubu korgi—gajeti mo acel owacci “weko dul kom ma tye ka mukane bedo ka maleng, ruk ki woro tye manok.” Yo mukene aye rukke i yo me luriyo ma nyutu cwiny me jemo ma woro ki deyo pe iye.

12, 13. Cik mene ma myero odorwa i lok me ruk ki kit ma wanen kwede?

12 Macalo lutic pa Jehovah, wamito ni wanen maber, ma tere ni omyero warukke i yo mupore, maleng, ma neno mit, dok ma rwatte ki yub ma watye iye. I kare ducu, kit ma wanen kwede myero obed ‘maber ma nyutu woro,’ ma ka kiribo kacel ki “tic maber” rwatte pi dano ducu, co wa ki mon ma “gilwonge kengi ni gin jo ma woro Lubanga.” Gin ma pe wamito tutwalle aye me ywayo tam pa dano i komwa, ento me ‘bedo i mar pa Lubanga.’ (1 Temceo 2:9, 10; Juda 21) Dong, wamito ni deyowa ma mwonya atika-ni obed i ‘kit me cwiny ma pe nen, ma welle dit i nyim Lubanga.’1 Petero 3:3, 4.

 13 Omyero inge ni rukwa ki kit ma wanen kwede gudu kit ma dano neno kwede woro me ada. Nyig lok me leb Grik ma kigonyo ni “mwolo” ka kitiyo kwede ma lubbe ki kit pa dano, nongo nyutu bedo ki woro i kom tam pa jo mukene. Omyero wabed ki miti me nyutu woro kit ma cwiny jo mukene ngoligi kwede kop i kom rukwa. Ma dong loyo, wamito ni wami woro i kom nying Jehovah kacel ki jone ki dok omyero wabed macalo lutic pa Lubanga kun watimo ‘jami ducu pi miyo deyo bot Lubanga.’1 Jo Korint 4:9; 10:31; 2 Jo Korint 6:3, 4; 7:1.

Tika kit ma anen kwede kelo deyo i kom Jehovah?

14. Ma lubbe ki kit ma wanen kwede kacel ki lengowa, lapeny ango ma myero wapenye kwede?

14 Rukwa, kit ma wanen kwede, ki dong lengo me kom pigi tego tutwal ka watye i tic me pwony nyo cokke pa Lukricitayo. Penye kekeni ni: ‘Mono kit ma anen kwede kacel ki bedo ma koma pe leng ywayo tam pa dano i koma i yo marac? Mono kelo lewic bot jo mukene? An mono atero twerona i lok man calo gin ma pire tek loyo bedo mupore ma miyo kicima me tic i kacokke?’Jabuli 68:6; Jo Pilipi 4:5; 1 Petero 5:6.

15. Pingo Lok pa Lubanga pe ryeyo cik me aluba i lok kom rukwa, kit ma wanen kwede, ki dong lengowa?

15 Baibul pe oryeyo cik ma myero Lukricitayo olubi i lok kom ruk ki kit ma myero gunen kwede, ki dong lengogi.  Jehovah pe gengowa ki i bedo agonya me yero gin ma iwa mito nyo me tic ki tamwa. Ento, en mito ni wabed jo mutegi ma waromo tam i kom cik me Baibul kun wabedo jo ma “ryekogi ma gupwonnye kwede me poko gin maber ki marac dong ojing pi ketone i tic.” (Jo Ibru 5:14) Ma dong pire tek loyo, en mito ni mar aye odorwa—mar pi Lubanga ki pi jiraniwa. (Kwan Marako 12:30, 31.) Kadi bed mar aye dorowa, pud waromo bedo ki kit me ruk mapol mapat pat. Man nen i kit me ruk mabeco mapat pat ma jo pa Jehovah mapol giruko ka gitye i guregi ka mo keken i lobo kany.

BED KI KWO MA PE MITO JAMI MAPOL

16. I yo ma nining ma cwiny me lobo-ni opokke kwede ki pwony pa Yecu, dok lapeny ango ma myero wapenye kwede?

16 Cwiny me loboni bwolo dano dok oweko dano milion mapol ata gineno cente ki jami me kom calo gin  ma kelo yomcwiny. Ento, Yecu owacci: “Kwo pa dano pe cung i wel lim mapol ma en tye kwede.” (Luka 12:15) Yecu opwonyo ni “jo ma gingeyo ni gin lucan i lok me cwiny” kacel ki jo ma pe gimito jami mapol i kwogi, ma giketo tamgi i kom lok me cwiny gibibedo ki yomcwiny. Man pe tere ni en onongo tye ka cwako lok me bedo can can, nyo twone kenken ki jami ma mitte. (Matayo 5:3; 6:22) Penye kekeni-ni: ‘An tika ada aye lok ma Yecu opwonyogi-ni, nyo kece “won goba[-ni]” aye tye ka doro kwona? (Jon 8:44) Lokka, yubba, mitina, ki kit me kwona kono nyutu gin ango?’Luka 6:45; 21:34-36; 2 Jon 6.

17. Tit adwogi mabeco ma jo ma gibedo ki kwo ma pe mito jami mapol ginongo?

17 Yecu owaco ni: ‘Ryeko loyo kop pi ticce ma en tiyo.’ (Matayo 11:19) Nen kong adwogi mogo mabeco ma bino bot jo ma gibedo ki kwo ma pe mito jami mapol. Gilimo yweyo i tic me Ker-ri. (Matayo 11:29, 30) Pe gibedo ki par mogo ma tere pe, pi meno, pe gibedo ki arem me cwiny. (Kwan 1 Temceo 6:9, 10.) Pi bedo ki yengo i kom jami ma mitte me kwo ma gitye kwede, gin gibedo ki cawa mapol me bedo ki jo me odigi ki Lukricitayo luwotgi. Macalo adwogine, ginino mot labongo ayela mo. (Latitlok 5:12) Ginongo yomcwiny ma bino pi miyo, kun gimiyo i yo mo keken ma gitwero. (Tic pa Lukwena 20:35) Dok ‘gengi medde ameda’ ki bene gibedo ki kuc kacel ki yengo. (Jo Roma 15:13; Matayo 6:31, 32) Mot magi ducu i adane pe wille!

RUKO “JAMI LWENY ME CWINY MA A KI BOT LUBANGA”

18. Baibul loko ningo i kom lamonewa, yo me ticce, ki dok kit ma walwenyo kwede?

18 Jo ma gibedo i mar pa Lubanga ginongo gwok me cwiny ki i kom Catan, ma mito ni Lukricitayo pe gunong  yomcwiny wa ki kwo ma pe tum bene. (1 Petero 5:8) Paulo owaco ni, “pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo.” (Jo Epeco 6:12) Lok man ni ‘lweny-nyi’ i leb Grik obedo lweny ma nongo wutye cokcok, pe ma ngat moni lwenyo ma oyikke i kakannene mo ka mabor. Medo i kom meno, lok man ni “luloc,” “wegi twero,” ‘gin ducu ma loyo lobo’ nyutu ni lweny ma a ki bot cwiny maraco-ni nongo guyubbe iye ma pe me tuku tuku.

19. Tit kong jami lweny me cwiny pa Lakricitayo?

19 Kadi bed watye ki goro, ento pud waromo loye. I yo ango? Ka waruko “jami lweny me cwiny ma a ki bot Lubanga.” (Jo Epeco 6:13) I lok i kom jami lweny man, Jo Epeco 6:14-18 kwanne ni: “Wucung ma wutweyo pyerwu woko ki ada, wuruk bene kit ma atir wek obed nyonyo me gengo korwu, kun wuyubbe me tito lok me kwena maber me kuc ma bedo macalo war ma wuruko i tyenwu. Makato ducu, niye aye myero obed kwotwu ma bimiyo wutwero neko mac ki i kom atero ma Larac bayo. Wumak larre aye obed tok nyonyo [nyo, gen] me wiwu, ki lok pa Lubanga ma en aye pala lucwan me cwiny maleng. Wuleg kare ducu i cwiny ki lega me bako dog.”

20. Wan dok lwenywa pat ki pa lumony nining?

20 Kit ma man obedo gin ma oa ki bot Lubanga-ni, jami lweny me cwiny man bigwokowa teke ka waruko kare ducu. Lukricitayo gitye i lweny mo ma poko kwo ki to ma pe bigik nio wang ma Lubanga otyeko lobo pa Catan dok otweyo cwiny maraco ducu, pe bedo calo pa lumony amonya ma kine mukene kong gibedo pi kare malac labongo lwenyi. (Niyabo 12:17; 20:1-3) Ka itye ka yelle ki goro nyo tam mogo maraco, pe iil cingi pien wan weng myero ‘wacane’ wek wabed lugen bot Jehovah. (1 Jo Korint 9: 27) Ada, ka inen pe watye ka lweny, en aye myero wabed ki par!

21. Waromo loyo lweny man me cwiny-nyi nining?

21 Pe waromo loyo lweny man ki kerowa kenwa. Pi meno, Paulo opoyo wiwa ni omyero wabed ka lega bot Jehovah “kare ducu i cwiny.” Kitungcel bene, omyero wawiny Jehovah ki kwano Lokke kun waribbe ki “lumony” luwotwa kare ducu, pien wan pe watye i lweny man kenwa! (Pilemon 2; Jo Ibru 10:24, 25) Jo ma lugen i yo magi ducu gibiloyo lweny man kun bene gicung matek pi niyegi ka kimito turone.

BED ATERA ME CUNG PI NIYENI

22, 23. (a) Pingo pol kare myero wabed atera me cung pi niyewa, dok kodi lapeny ango ma myero wapenye kwede? (b) Pwony ango ma wabinenone i dul ma lubu man?

22 Yecu owacci, ‘Pien wun pe jo me lobo, pi meno lobo okwerowu.’ (Jon 15:19) Pi meno, Lukricitayo myero gubed atera me tito pi niyegi kun gitimo man i yo me woro dok ki mwolo. (Kwan 1 Petero 3:15.) Penye kekeni ni: ‘An mono aniang pingo Lucaden pa Jehovah i kare mogo gikwanyo yo mapat ki pa jo mukene? Ka ce atye ka nongo tek pa kwanyo kodi yo man, tika aye ki cwinya ducu ni gin ma Baibul kacel ki lagwok ot ma lagen waco tye kakare? (Matayo 24:45; Jon 17:17) Ka ce oo i timo gin matir bot Jehovah, tika ayubbe me bedo pat kun abedo ki awaka pi bedo pat?’—Jabuli 34:2; Matayo 10:32, 33.

23 Pol kare kono, mitiwa me bedo pat ki lobo-ni kiketo i atematema i yo mogo mukane mada. Me labolle, kit ma waneno kwede con, Larac-ci bito lutic pa Jehovah me doko jo me lobo-ni kun tiyo ki lok me galo wang. Waromo yero kit me galo wang mupore nining ma weko wabedo ki yomcwiny dok nongo cwinywa pe pidowa? Wabineno pwony man i dul ma lubu man.

^ para. 3 Cakke i Pentekote 33 me kare man, Kricito otiyo macalo Kabaka ma telo wi kacokke pa lulub kore ma kiwirogi i lobo kany. (Jo Kolocai 1:13) I 1914, kimiyo twero bot Kricito me bedo kabaka me ‘ker me lobo-ni.’ Pi meno, Lukricitayo ma kiwirogi gitye calo luwang Ker pa Meciya i kare-ni.—Niyabo 11:15.

^ para. 8 Nen buk me Reasoning From the Scriptures, pot karatac 389-393, ma Lucaden pa Jehovah aye gucoyo.