Cit atir i jami ma tye

Cit atir ka ma nyuto lok ma tye iye

 PWONY ME 4

Yecu Kricito En Anga?

Yecu Kricito En Anga?

1. Kwo pa Yecu ocakke nining?

Kit pa Yecu ango mumiyo lok kwede onongo yot?MATAYO 11:29; MARAKO 10:13-16.

Yecu obedo cwec mukwongo pa Lubanga. Mapat ki jo me lobo-ni, Yecu okwo i polo calo malaika ma peya ginywale i lobo. (Jon 8:23) Yecu okonyo i cweyo jami mukene-ni ducu. En kene aye ma Jehovah ocweyo en kikome dok meno omiyo kilwonge ni “latin acel keken” pa Lubanga. (Jon 1:14) Yecu otiyo calo Lalok pi Lubanga, pi meno kilwonge bene ni “Lok.”Kwan Carolok 8:22, 23, 30; Jo Kolocai 1:15, 16.

2. Pingo Yecu obino i lobo?

Lubanga ocwalo Wode i lobo kun nako kwone ki i polo keto i i anyaka mo ma Lajudaya ma nyinge Maliam ma pud onongo pe ngeyo laco. Pi meno Yecu pe obedo ki wego ma dano. (Luka 1:30-35) Yecu obino i lobo pi tyen lok magi (1) me pwonyo lok ada madok i kom Lubanga, (2) me miyo lanen i kom kit me timo miti pa Lubanga kadi watye ka lweny ki pekki mapol, ki (3) me miyo kwone ma labongo roc-ci me “koko jo mapol.”Kwan Matayo 20:28.

3. Pingo wamito ginkok?

Ginkok obedo wel cente ma kimiyo me gonyo ngat moni ki i kom to. (Nia 21:29, 30) To kacel ki tiyo onongo pe gubedo but yub pa Lubanga pi dano. Wangeyo meno nining? Lubanga owaco bot laco mukwongo, Adam, ni tekke en otimo gin ma Baibul lwongo ni bal-li, en bito woko. Kono onongo Adam pe otim bal onongo en pe obito. (Acakki 2:16, 17; 5:5) Baibul waco ni, to “obino” i lobo kun a ki bot Adam. Pi  meno, likwayi pa Adam ducu gulako bal ki mucarane to, ki bote. Wamito ginkok ma twero gonyowa ki i to ma walako ki bot Adam.Kwan Jo Roma 5:12; 6:23.

Anga ma onongo twero culo ginkok wek ogonywa ki i to? Ka wato nongo waculo pi balwa keken. Pe tye dano mo ma tye ki roc ma onongo twero culo pi bal pa ngat mukene.Kwan Jabuli 49:7-9.

4. Pingo Yecu oto?

Yecu pat ki wan pien en onongo peke ki roc mo. Pi meno, onongo pe mitte ni en oto pi bal-le—pe otimo bal mo. Me kaka meno, Yecu oto pi bal pa jo mukene. Lubanga onyuto mar ma dok pat tutwal pi dano ki cwalo Wode me to piwa. Yecu bene onyutu marre botwa ki winyo Wonne kacel ki miyo kwone pi balwa.Kwan Jon 3:16; Jo Roma 5:18, 19.

5. Ngo ma Yecu tye ka timone i kareni?

I kare ma Yecu tye i lobo, en ocango two, ocero jo muto, dok okonyo jo ma gitye ki peko. En onyuto gin ma ebitimo i anyim pi jo ducu ma gin luwiny. (Matayo 15:30, 31; Jon 5:28) I nge to pa Yecu, Lubanga ocero en me kwo calo cwec me cwiny. (1 Petero 3:18) Lacen Yecu obedo i nget Lubanga tung lacuc kun kuro ni Jehovah omiye twero me loc calo Kabaka ma loyo lobo lung. (Jo Ibru 10:12, 13) I kareni Yecu tye ka loc i polo calo Kabaka, kun lulub kore ma i lobo gitye ka tito kwena maber-ri i lobo ducu.Kwan Daniel 7:13, 14; Matayo 24:14.

Cokcok-ki, Yecu bitic ki tekone calo Kabaka me kelo agikki me pekki ducu kacel ki jo ma gikelo pekki magi. Dano ducu ma ginyutu niyegi i kom Yecu kun giwinyo en gibibedo ki yomcwiny i paradic i lobo.Kwan Jabuli 37:9-11.