Cit atir i jami ma tye

Cit atir ka ma nyuto lok ma tye iye

 PWONY ME 8

Pingo Lubanga Oweko ni Tim Maraco ki Deno Can Obed Tye?

Pingo Lubanga Oweko ni Tim Maraco ki Deno Can Obed Tye?

1. Tim maraco ocakke nining?

Lubanga oye ni dano gulone kengi pi kare mo me nyuto ni dano pe twero cobo pekkigi kengi

Tim maraco ocakke i lobo i kare ma Catan owaco lok goba mukwongo. Catan onongo kite pe rac i kare ma kicweye. En onongo tye lamalaika ma pe ki roc, ento en “pe [o]cung i ada.” (Jon 8:44) En obedo ki miti me nongo woro ma myero kimi bot Lubanga keken. Catan owaco lok goba bot dako mukwongo, Kawa, kun bwole ni owiny en ma ka winyo Lubanga. Adam oribbe ki Kawa i kwero winyo Lubanga. Tam ma Adam omoko-ni okelo deno can kacel ki to.Kwan Acakki 3:1-6, 19.

I kare ma Catan omiyo tam ni Kawa pe owiny Lubanga, en onongo tye ka kelo jemo i kom twero me loc pa Lubanga. Pol pa dano guribbe ki Catan i kwero Lubanga macalo Lalocgi. Pi meno, Catan odoko “lalo lobo.”Kwan Jon 14:30; 1 Jon 5:19.

2. Cwec pa Lubanga mono onongo gitye ki roc?

Tic pa Lubanga ducu tye labongo roc. Dano kacel ki lumalaika ma Lubanga ocweyogi-ni onongo gitwero winyo maber adada cik pa Lubanga. (Nwoyo Cik 32:4, 5) Lubanga ocweyowa me bedo agonya kun wayero me timo gin maber nyo marac. Bedo agonya meno miniwa kare me nyuto marwa pi Lubanga.Kwan Yakobo 1:13-15; 1 Jon 5:3.

3. Pingo Lubanga oweko ni dano oden can nio kombeddi?

Cakke wa i poto me Eden, Jehovah obedo ka kanyo jemo i kom twero me locce. Pingo? Me  nyuto ni tute pa dano me lone maber kengi pe binyako nyige. (Latitlok 7:29; 8:9) Jami mutimme i tekwaro pa dano pi mwaki 6,000 mukato angec-ci onyuto man ka maleng. Luloc me lobo-ni pe gujuko lweny, turo cik, ngolo kop alenga, ki dong two.Kwan Jeremia 10:23; Nia 9:16.

Ka iporo ki loc pa dano, jo ma giye loc pa Lubanga ginongo adwogi maber. (Icaya 48:17, 18) Cokcok-ki, Jehovah bityeko gamente pa dano ducu. Jo ma giye ni Lubanga ologi keken aye gibileyo lobo.—Icaya 11:9.Kwan Daniel 2:44.

4. Diyo cwiny pa Lubanga miyowa kare me timo ngo?

Catan owacci pe tye dano mo ma tiyo pi Jehovah pi mar. In mono imito nyuto ni meno lok goba? Itwero timone! Diyo cwiny pa Lubanga miyo botwa kare me nyuto ka ce wamito loc pa Lubanga nyo pa dano. Kit ma wakwo kwede nyuto loc mene ma wayero.Kwan Yubu 1:8-12; Carolok 27:11.

5. Waromo yero Lubanga macalo Lalocwa nining?

Tung ka ma wayero nyuto ka ce wamito Lubanga macalo Lalocwa

Wayero Lubanga macalo Lalocwa ka wapwonyo dok walubo woro me ada ma jenge i Lokke, Baibul. (Jon 4:23) Kit ma Yecu otimo kwede, wan bene watwero kwero Catan me bedo lalocwa ka pe wadonyo i tim me wibye ki lweny.Kwan Jon 17:14.

Catan tiyo ki tekone me ilo malo tim me tarwang ki tim mukene maraco. Ka wakwero kodi tim magi, luremwa ki wadiwa mogo giromo nywaro nyo dagowa. (1 Petero 4:3, 4) Pi meno, watye ki ka ma myero wayer. Tika wabiribbe ki jo ma gimaro Lubanga? Tika wabilubo cikke me mar dok me ryeko-ni? Ka watimo meno, ci wabinyuto ni Catan owaco lok goba i kare ma en owacci ka peko tye, pe tye ngat mo ma bitimo gin ma Lubanga owaco.Kwan 1 Jo Korint 6:9, 10; 15:33.

Mar pa Lubanga pi dano miyowa gen ni tim maraco ki deno can bigik. Jo ma ginyuto ni gigeno lok man gibinongo yomcwiny i lobo nakanaka.Kwan Jon 3:16.