Cit atir i jami ma tye

Cit atir ka ma nyuto lok ma tye iye

 PWONY ME 5

Lubanga Tye ki Yub Ango pi Lobo?

Lubanga Tye ki Yub Ango pi Lobo?

1. Pingo Lubanga ocweyo lobo?

Jehovah omiyo lobo bot dano. Lobo aye obedo pacowa. Pi man, luot mukwongo Adam ki Kawa pe kicweyogi ni gunywal likwayogi gunya gupong polo—Lubanga onongo dong ocweyo lumalaika mapol me kwo i polo. (Yubu 38:4, 7) Pi man, Lubanga oketo laco mukwongo-ni i paradic mamwonya ma kilwongo ni poto me Eden. (Acakki 2:15-17) Jehovah omiyo bot Adam ki likwayone gen me nongo yomcwiny me kwo ma pe tum i lobo.Kwan Jabuli 37:29; 115:16.

I acakkine, poto me Eden keken aye onongo paradic. Luot mukwongo man onongo myero gupong lobo ki likwayogi. Motmot gin onongo gibiloko lobo ducu doko paradic. (Acakki 1:28) Lobo pe kibibalone. Lobo bibedo paco pa dano matwal.Kwan Jabuli 104:5.

2. Pingo lobo pe tye paradic kombeddi?

Adam ki Kawa guturo cik pa Lubanga, pi meno Jehovah oryemogi woko ki i poto me Eden. Gurwenyo paradic woko, dok dano mo dong pe romo dwokone cen. Baibul kikome owacci: “Gimiyo lobo i cing jo maraco.”—Yubu 9:24.Kwan Acakki 3:23, 24.

Ento Jehovah mono wiye owil pi yubbe mukwongo pi dano? Pe! Jehovah obedo won twer ducu. Pe tye gin mo ma twero loye. (Icaya 45:18) En bidwoko dano me kwo i kit ma en onongo oyubo con. Kwan Jabuli 37:11, 34.

3. Paradic macon-ni kibidwokone nining?

Kibidwoko paradic i lobo i kare me loc pa Yecu calo Kabaka me Ker pa Lubanga. I lweny me Armagedon, Yecu bitelo  wi lumalaika pa Lubanga me jwero jo ducu ma gujemo i kom Lubanga. I ngeye, Yecu bitweyo Catan i buc pi mwaka 1,000. Jo pa Lubanga gibibwot pien Yecu aye bitelogi dok bene bigwokogi. Gibibedo ki yomcwiny me kwo nakanaka i Paradic i lobo.Kwan Niyabo 20:1-3; 21:3, 4.

4. Pekki mono bigik awene?

Lubanga bikelo agikki i kom lobo man marac-ci awene? Yecu omiyo “lanyut” me kare me agikki. Lobo ma watye ka kwo iye i kareni tye ka keto lyeto matek i kom dano, dok man nyuto ni kombeddi watye ka kwo i kare me “agikki piny.”Kwan Matayo 24:3, 7-14, 21, 22.

I kare me loc pa Yecu ki i polo macalo kabaka ma loyo wi lobo ducu pi mwaka 1,000, en bigiko pekki woko ducu. (Icaya 9:6, 7; 11:9) Medo i kom ticce macalo Kabaka, Yecu bitic macalo Lalamdog Madit ci motmot bikwanyo bal pa jo ma gimaro Lubanga woko. Man te lokke ni Lubanga bitic ki Yecu me kwanyo two, tiyo, ki dong to.Kwan Icaya 25:8; 33:24.

5. Angagi ma gibibedo i paradic ma tye ka bino-ni?

I Ot me Ker, ibirwatte ki jo ma maro Lubanga dok gimito pwonyo kit me yomo cwinye

Jo ma gin lugen bot Lubanga keken aye gibibedo i paradic. (1 Jon 2:17) Yecu ocwalo lupwonnyene me yenyo jo mamwol ki me pwonyogi wek gubed jo ma gibinongo cwak pa Lubanga. Kombeddi, dano milion mapol ata dong Jehovah tye ka yubogi me bedo i Paradic i lobo kany. (Jepania 2:3) I Odi me Ker pa Lucaden pa Jehovah, dano gipwonyo kit me bedo luot mabeco, wego ki mege mabeco. Lutino ki ludito ducu ginywako kacel i woro man dok gipwonyo kit ma kwena maber-ri twero bedo me kony botgi.Kwan Mika 4:1-4.