Cit atir i jami ma tye

Cit atir ka ma nyuto lok ma tye iye

 PWONY ME 9

Kwo me Ot-ti Twero Bedo me Yomcwiny Nining?

Kwo me Ot-ti Twero Bedo me Yomcwiny Nining?

1. Pingo nyom pire tek me kelo yomcwiny bot jo me ot?

Kwena maber-ri a ki bot Jehovah, Lubanga ma layomcwiny, ma mito ni jo me odi ducu gubed ma cwinygi yom. (1 Temceo 1:11, NW) En aye ocako te yub me nyom. Nyom i te cik pa gamente pire tek me kelo yomcwiny bot jo me ot, pien miyo paco moni bedo mupore me gwoko lutino maber. Lukricitayo myero guwor cik pa gamente ma kwako coyo nyomgi piny.Kwan Luka 2:1, 4, 5.

Lubanga mono neno nyom nining? En mito ni obed yub ma ribo laco ki dako kacel liking nio wa i togi. Jehovah mito ni laco ki dakone gubed ma gigene kekengi. (Jo Ibru 13:4) En dag tim me keto nyom. (Malaki 2:16) Ento en ye ni Lukricitayo guket nyomgi ci gunyom ngat mukene kace luotgi otimo abor.Kwan Matayo 19:3-6, 9.

2. I yo ma nining ma laco myero oter kwede dakone, ki dako myero oter kwede cware?

Jehovah ocweyo co ki mon i yo ma miyo ka gunyomme ci tic pa ngat acel cwako pa lawote. (Acakki 2:18) Macalo lawi ot, laco myero otel yo i nongo jami me kom ma mitte me gwoko jo me ode, ki i pwonyogi lok i kom Lubanga. En myero onyut mar bot dakone kacel ki cwiny me jalle ken. Co ki mongi myero gunyut mar kacel ki woro i kingi. Kit ma co ki mon ducu gitye ki roc-ci, pwonyo kit me timmo kica aye lagony me nongo yomcwiny i nyom.Kwan Jo Epeco 4:31, 32; 5:22-25, 33; 1 Petero 3:7.

 3. Ka yomcwiny pe i nyomwu myero mono ia woko ki bot luoti?

Ka wutye ki peko i nyomwu, ngat acel acel i kinwu myero otute me nyutu mar bot lawote. (1 Jo Korint 13:4, 5) Lok pa Lubanga pe cwako pokke macalo yo me cobo pekki ma pol kare bedo i nyom.Kwan 1 Jo Korint 7:10-13.

4. Lutino, ngo ma Lubanga mito piwu?

Jehovah mito ni wubed ki yomcwiny. En miyowu tira maber loyo i kom kit me nongo yomcwiny i kare me buluwu. En mito ni wunong adwogi maber ki i ryeko pa lunyodowu, kacel ki ngec ma gimiyo i kom kwo ma gin dong guwok ki iye. (Jo Kolocai 3:20) Jehovah bene mito ni wunong yomcwiny ma bino pi timo miti pa Lacwecwa gin ki Wode.Kwan Latitlok 11:9–12:1; Matayo 19:13-15; 21:15, 16.

5. Lunyodo, lutinowu mito ngo wek gunong yomcwiny i kwogi?

Myero wuti matek wek wumi jami ma mitte calo cam, ot, ki dong bongo aruka ki lutinowu. (1 Temceo 5:8) Ento ka wumito ni lutinowu gunong yomcwiny myero bene wupwonygi me maro Lubanga kun wunyebogi ki kite mabeco-ni. (Jo Epeco 6:4) Lanen me mar pi Lubanga ma inyutu twero gudo cwiny latinni matut. Ka tira ma imiyo bote ojenge i Lok pa Lubanga, ci bimiyo en tamo tam matir.Kwan Nwoyo Cik 6:4-7; Carolok 22:6.

Lutino gilimo adwogi mabeco ka kicuko cwinygi kun kipwoyogi. Gin bene gimito tira ki pwony. Pwony ma kit meno gwokogi ki i tim maraco ma twero gengogi me nongo yomcwiny. (Carolok 22:15) Ento, pwony pe omyero kimi ki gero.Kwan Jo Kolocai 3:21.

Lucaden pa Jehovah gigoyo bukke mapol ma kicoyo tutwalle me konyo lunyodo ki lutino. Bukke magi ducu, lokgi jenge i Baibul.Kwan Jabuli 19:7, 11.