Cit atir i jami ma tye

Cit atir ka ma nyuto lok ma tye iye

 PWONY ME 13

Ngo ma Bitimme i kom Dini?

Ngo ma Bitimme i kom Dini?

1. Dini ducu tika ber?

I dini ducu pud tye dano mogo ma cwinygi atir. Obedo kwena maber ni Lubanga neno jo magi dok bene paro pigi mada. Ento ki cwercwiny madit, dini dong odoko calo gin tic pa lutim maraco. (2 Jo Korint 4:3, 4; 11:13-15) Ma lubbe ki lok angeya, dini mukene gudonyo wa i tim me tero bom i kin dano, nek lumuku nyo icipan, lweny, ki dong pyedo ki nywaro lutino. Kit tim man pud dong turo cwiny dano ma gitye ki niye i kom Lubanga ya!Kwan Matayo 24:3-5, 11, 12.

Dini me ada keto deyo i kom Lubanga, ento ki tungcel dini me goba pe yomo cwiny Lubanga. Gipwonyo jami ma pe tye i Baibul, ma i kine tye iye pwony goba i kom Lubanga ki i kom to. Ento Jehovah mito ni dano gunge lok me ada i kome.Kwan Latitlok 9:5, 10; 1 Temceo 2:3-5.

2. Ngo ma bitimme i kom dini?

Obedo me yomcwiny me niang ni Lubanga cwinye pe yom i kom dini goba ma giwaco ni gimarre ento kara i ada gimaro lobo pa Catan-ni. (Yakobo 4:4) Lok pa Lubanga lwongo dini goba ducu ni “Babilon Madit.” Babilon obedo boma macon ka ma dini goba ocakke iye i nge Pii Aluka me kare pa Nua. Cokcok-ki, Lubanga bikelo agikki pa dini goba ma gidiyo dok gibwolo dano tutwali-li.Kwan Niyabo 17:1, 2, 5, 16, 17; 18:8.

Pud tye kwena maber mukene. Wi Jehovah pe owil i kom jo ma cwinygi atir ma guket ata i kin dini goba me lobo ducu. En tye ka coko jo magi kacel kun pwonyogi ki lok me ada.Kwan Mika 4:2, 5.

 3. Jo ma cwinygi atir-ri myero gutim ngo?

Dini me ada tye ka ribo dano kacel

Jehovah paro pi jo ma gimaro lok ada dok gitiyo gin matir. En tye ka cuko cwinygi me weko dini goba woko. Jo ma gimaro Lubanga gitye ki miti me loko kwogi wek guyom cwinye.Kwan Niyabo 18:4.

I cencwari me acel, i kare ma jo ma cwinygi atir guwinyo kwena maber-ri ki bot lukwena, gujolo ki yomcwiny. Gin gupwonyo yo me kwo manyen ki bot Jehovah, yo me kwo ma kelo yomcwiny ki gen dok weko gibedo ki tyen lok me kwo. Gin gubedo lanen maber pi wan jo me kare man pien gujolo kwena maber-ri ki keto Jehovah bedo mukwongo i kwogi.Kwan 1 Jo Tecalonika 1:8, 9; 2:13.

Jehovah jolo luworo ma gua ki i dini goba-ni i kin jo me ode. Ka iye lwongo pa Jehovah, ibidoko lareme, ibibedo laworo i kin jo me ot pa Jehovah dok ibinongo kwo ma pe tum.Kwan Marako 10:29, 30; 2 Jo Korint 6:17, 18.

4. Lubanga bikelo yomcwiny i lobo ducu nining?

Ngolo kop i kom dini goba ma tye ka bino-ni obedo kwena maber. Biweko dano me lobo ducu giywe ki i dic. Dini goba dong pe bibwolo nyo poko kin dano matwal. Jo ducu ma gitye kwo i kare meno gibiribbe kacel i woro Lubanga acel me ada.Kwan Niyabo 18:20, 21; 21:3, 4.