Cit atir i jami ma tye

Cit atir ka ma nyuto lok ma tye iye

 PWONY ME 3

Kwena Maber-ri Tika Ada Oa ki Bot Lubanga?

Kwena Maber-ri Tika Ada Oa ki Bot Lubanga?

1. Anga ma Omiyo kicoyo Baibul?

Kwena maber ni dano bibedo i lobo pi nakanaka-ni kicoyo pire i Baibul. (Jabuli 37:29) Baibul tye ki bukke 66 matino tino. Lubanga otiyo ki co ma lugen ma romo 40 me coyo Baibul. Bukke abic mukwongo Moses aye ocoyogi mwaka 3,500 mukato angec. Buk me agikki lakwena Jon aye ocoyo mwaka makato 1,900 angec. Luco Baibul-li mono gucoyo tam pa anga? Lubanga oloko kwedgi kun tiyo ki cwiny mere maleng. (2 Camuel 23:2) Gin gucoyo tam pa Lubanga, pe megi. Pi man, Jehovah aye Omiyo kicoyo Baibul.Kwan 2 Temceo 3:16; 2 Petero 1:20, 21.

2. Wangeyo nining ni Baibul obedo buk ma tito lok ada?

Wangeyo ni Baibul oa ki bot Lubanga pien tito gin ma tye anyim kore ki kore dok kakare. Pe tye dano mo ma twero timo man. (Yocwa 23:14) Lubanga Won Twer Ducu keken aye twero neno anyim pa dano.Kwan Icaya 42:9; 46:10.

Wageno ni buk ma oa ki bot Lubanga myero dok obed pat ki bukke mukene-ni. Dong kityeko poko Baibul kopi bilion mapol ata i leb makato miya mapol. Kadi bed kiwacci Baibul obedo buk macon, coc me Baibul rwatte ki gin ma cayan okwedo. Lucoc mapatpat 40 ma gucoyo Baibul-li ducu gucoyo jami ma rwatte ki pa lucoc wadgi. * Medo i kom meno, Baibul nyuto mar pa Lubanga, ma tye ki teko me loko kwo wek dano okwo maber. Ada man oweko jo mapol guye ni Baibul obedo Lok pa Lubanga.Kwan 1 Jo Tecalonika 2:13.

 3. Gin ango ma kicoyo i Baibul?

Wi lok madit me Baibul aye kwena maber ni Lubanga tye ki yub me mar pi dano. Ginacoya tito kit ma Lubanga omiyo paradic ni dano obed iye, kit ma dano obalo yub man ki dong kit ma kibidwoko kwede paradic odoco.Kwan Niyabo 21:4, 5.

Lok pa Lubanga tye ki cik, dok bene miyo tam. Medo i kom meno, i Baibul kicoyo tekwaro ma kwako kit ma Lubanga obedo ka tic kwede ki dano—coc meno nyuto kit pa Lubanga. Pi man, Baibul twero konyi me ngeyo Lubanga. Baibul tito kit ma in iromo doko larem Lubanga.Kwan Jabuli 19:7, 11; Yakobo 2:23; 4:8.

4. Itwero niang lok ma tye i Baibul nining?

Brocuwa man bikonyi me niang jami ma tye i Baibul kun ilubo yo acel ma Yecu otiyo kwede. En ka oloko i kom wang Baibul moni, onongo tito bot dano i yo ma weko “giniang ginacoya” meno maber.Kwan Luka 24:27, 45.

Tye jami manok keken ma pigi tego calo kwena maber-ri mua ki bot Lubanga. Ento, jo mukene pe gimito, dok jo mukene giromo keto gero i komi pi tito kwena maber man. Pe iwek cwinyi otur. Gen ma in itye kwede me nongo kwo ma pe tum jenge i ngeyo Lubanga.Kwan Jon 17:3.

 

^ para. 3 Nen brocuwa me A Book for All People.