Cit atir i jami ma tye

Cit atir ka ma nyuto lok ma tye iye

 PWONY ME 7

Ker pa Lubanga Obedo Gin Ango?

Ker pa Lubanga Obedo Gin Ango?

1. Ker pa Lubanga obedo gin ango?

Ngo mumiyo Yecu aye Laloc maber loyo?MARAKO 1:40-42.

Ker pa Lubanga obedo gamente ma tye i polo. Bileyo ka wang gamente mukene-ni dok bimiyo kitiyo miti pa Lubanga i polo ki lobo. Obedo kwena maber me ngeyo ni Lubanga bitic ki Ker-re i yo meno. Cokcok-ki Ker pa Lubanga bicobo miti pa dano pi gamente maber. Gamente meno bikelo wat maber i kin dano ducu me lobo. Kwan Daniel 2:44; Matayo 6:9, 10; 24:14.

Ker myero obed ki kabaka. Jehovah ocimo Wode, Yecu Kricito, me bedo Kabaka me Ker-re.Kwan Niyabo 11:15.

2. Pingo Yecu aye Kabaka maber loyo?

Wod pa Lubanga aye Kabaka maber loyo pien en lakica, dok en cung pi gin matir. (Jon 1:14) Medo i kom meno, en tye ki teko ma twero tic kwede me konyo dano pien en biloyo lobo ki i polo. I nge cero Yecu, en odok cen i polo, ci obedo piny ka kuro twero me loc i ka nget Jehovah ki tung acuc. (Jo Ibru 10:12, 13) Lacen, Lubanga omine twero me cako loc.Kwan Daniel 7:13, 14.

3. Angagi ma gibiloc kacel ki Yecu?

Gurup pa lwak ma kilwongogi ni “jo maleng” aye gibiloc kacel ki Yecu i polo. (Daniel 7:27) Jo maleng ma gin lugen ma kiyerogi mukwongo aye lukwena pa Yecu. Jehovah pud tye ka medde ki yero co ki mon ma gin lugen ma gitye jo  maleng wa i kare-ni. Calo Yecu, kicerogi ki kom me cwiny.Kwan Jon 14:1-3; 1 Jo Korint 15:42-44.

Dano adi ma gicito i polo? Yecu olwongogi ni “romi manok.” (Luka 12:32) Welgi ducu tye 144,000. Gin bene gibiloyo lobo kacel ki Yecu.Kwan Niyabo 14:1.

4. Ngo mutimme i kare ma Yecu ocako locce?

Yecu ocako loc calo Kabaka me Ker-ri i mwaka 1914. * Mukwongo en obolo Catan kacel ki lumalaikane piny i lobo. Akemo madwong omako Catan ci en ocako kelo can i wi lobo ducu. (Niyabo 12:7-10, 12) Cakke i kare meno, can ma dano gitye ka denone omedde adada. Lweny, kec, two gemo, ki oyengyeng gitye but ‘lanyut’ ma cimo ni Ker-ri cokcok-ki bicako loyo lobo.Kwan Luka 21:7, 10, 11, 31.

5. Gin ango ma Ker pa Lubanga tye ka cobone dok bicobone?

Ma lubbe ki kwena ma kitye ka titone i lobo ducu-ni, Ker pa Lubanga dong tye ka guro lwak dano mapol ata ma gia ki i lobe mapatpat. Dano milion mapol ma gin lugen gitye ka mine me bedo i te loc pa Kabaka Yecu. Ker pa Lubanga bigwoko jo meno i kare me tyeko yub maraco me lobo-ni. Dong dano ducu ma gimito nongo adwogi maber ki i Ker pa Lubanga myero gupwony kit me bedo luwiny kun gimine i te loc pa Yecu.Kwan Niyabo 7:9, 14, 16, 17.

I kare me mwaka 1,000, Ker-ri bimiyo miti pa Lubanga pi dano cobbe kakare. Lobo-ni lung bilokke doko paradic. I agikkine, Yecu bidwoko Ker i cing Wonne. (1 Jo Korint 15:24-26) Tika ingeyo ngat mo ma itwero tite lok i kom Ker pa Lubanga?Kwan Jabuli 37:10, 11, 29.

 

^ para. 6 Pi ngec mukene i kom lok pa lunebi me Baibul ma kwako mwaka 1914, nen pot karatac 215-218 i buk me Baibul Twero Pwonyowa Gin Ango?