Cit atir i jami ma tye

Cit atir ka ma nyuto lok ma tye iye

 PWONY ME 6

Gen Ango ma Dok Tye pi Jo Muto?

Gen Ango ma Dok Tye pi Jo Muto?

1. Kwena maber ango madok i kom jo muto?

I kare ma Yecu onongo tye i lobo, lareme Lajaro oto. Lajaro onongo bedo i Betania, gang ma tye cok ki Jerucalem. I kare ma Yecu oo, en onongo dong oto orii pi nino angwen. Yecu ocito ka ma kikano iye kom lyel gin ki Marita kacel ki Maliam, lumegi Lajaro. I nge cawa manok keken, dano mapol gugure kenyo. Tika itwero tamo yomcwiny ma Marita gin ki Maliam gubedo kwede i kare ma Yecu ocero omingi?Kwan Jon 11:21-24, 38-44.

Marita onongo dong ngeyo kwena maber ma kwako jo muto. Onongo ngeyo ni Jehovah bicero jo muto, wek gukwo i lobo.Kwan Yubu 14:14, 15.

2. Jo muto gitye nining?

Lubanga owaco ki Adam ni: “In apwa, dok bene ibidok i apwa.”ACAKKI 3:19.

Dano kicweyo ki i apwa me ngom. (Acakki 2:7; 3:19) Wan pe watye ki tipo mo ma pe to ma medde ki kwo i kabedo mukene i nge to. Watye ki kom me apwa me ngom, ci dong ka wato, wato ki komwa olu. Ka wato, ci adamwa bene to, dok tamwa bene rweny woko. Pi meno, i nge cero Lajaro, en pe owaco gin mo keken mutimme i kare ma en oto pien jo muto pe gingeyo gin mo.Kwan Jabuli 146:4; Latitlok 9:5, 6, 10.

Lubanga tika uno dano ki wangogi i mac i nge togi? Kit ma Baibul waco ni jo muto pe gingeyo gin moni, pwony me  mac me kapiny-nyi, obedo pwony goba ma balo nying Lubanga pi gin ma en pe cwako kulu. Lok man me wango dano i mac-ci winyone lik bote adada.Kwan Jeremia 7:31.

3. Tika jo muto gitwero lok kwedwa?

Jo muto pe gitwero lok nyo winyo lok. (Jabuli 115:17) Ento lumalaika mukene kitgi raco, dok gitwero lok ki dano kun gibwologi ni gibedo tipo pa ngat mo muto. (Juda 6) Jehovah okwero ni pe myero kitem lok ki jo muto.Kwan Nwoyo Cik 18:10, 11.

4. Angagi ma kibicerogi?

Dano milion mapol ata ma gitye i lyel kibicerogi me kwo i lobo. Kadi wa jo mogo ma onongo pe gingeyo Jehovah dok gutimo jami maraco kibicerogi bene.Kwan Jabuli 37:9; Tic pa Lukwena 24:15.

Jo ma kibicerogi-ni gibimiyogi kare me pwonyo lok ada i kom Lubanga ki me nyutu niyegi i kom Yecu kun gilubo cikke. (Niyabo 20:11-13) Jo ma gibicer ci gitimo jami mabeco gibinongo mit pa kwo pi naka i lobo.Kwan Jon 5:28, 29.

5. Nicer nyutiwa gin ango i kom Jehovah?

Lubanga ojingo genwa i kom nicer ki cwalo Wode wek oto piwa. Pi meno yub me nicer nyutiwa mar pa Jehovah ki kicane ma pe wapore pire-ni. I kare ma jo muto gibicer, in mono ibimito neno anga tutwalle?Kwan Jon 3:16; Jo Roma 6:23.