Cit atir i jami ma tye

Cit atir ka ma nyuto lok ma tye iye

 BUTE ME 4

Kit me Tic Maber ki Cente

Kit me Tic Maber ki Cente

“Yub ducu cobbe maber ka kong ityeko nongo tam mabeco.”Carolok 20:18

Wan ducu wamito cente wek wanong jami ma mitte pi jo me odiwa. (Carolok 30:8) Ngene kene gire ni, ‘lim twero gwoko ngat ma tye kwede.’ (Latitlok 7:12) Macalo jo munyomme, twero bedo tek me lok i kom cente, ento pe wuwek cente okel peko i nyomwu. (Jo Epeco 4:32) Luot myero gubed jo ma gene dok gumok tam kacel i kom kit me tic ki cente.

 1 WUYUB PULAN MABER

GIN MA BAIBUL WACO: “Anga i kinwu ka mito gero ot ma wiye bor, ci pe kong kwongo bedo piny ka kwano wel lim ma mitte, ka ce etye kwede ma eromo tyekone?” (Luka 14:28) Pire tek ni wugo pulan kacel i kit ma wubitic kwede ki centewu. (Amoc 3:3) Wumok jami ma mitte ki wel cente ma wutwero tic kwede. (Carolok 31:16) Kadi bed itye ki cente me wilo gin moni, pe te lokke ni myero iwil. Temme pe me bedo ki den. Wuti ki cente ma wutye kwede keken.Carolok 21:5; 22:7.

GIN MA ITWERO TIMONE:

  • Ka pud wudong ki cente mo i tum dwe, wumok kacel kit ma wutwero tic kwede

  • Ka wutye ki banya, wuket yub me dwoko piny wel cente ma wutiyo kwede. Me labolle, wuromo tedo cam ma ka cito ka cam woko

 2 LOK LOK ADA DOK IBED KI NENO MUPORE

GIN MA BAIBUL WACO: “Tamwa tye me timo gin maber, pe i nyim Lubanga keken, ento kadi wa i nyim dano bene.” (2 Jo Korint 8:21) Tit lok ada bot luoti i kom cente ma inongo.

Kare ducu peny tam pa luoti ka itye ka moko tam madok i kom tic ki cente. (Carolok 13:10) Lok i kom kit ma wutiyo kwede ki cente bikelo kuc i nyomwu. Nen mucarani calo centewu, pe calo centeni keni.1 Temceo 5:8.

GIN MA ITWERO TIMONE:

  • Wumok wel cente moni ma ngat acel acel twero tic kwede labongo penyo lawote

  • Pe kong ikur wang ma peko mo onen ka icak lok i kom cente