Cit atir i jami ma tye

Cit atir ka ma nyuto lok ma tye iye

 BUTE ME 3

Kit me Cobo Pekki

Kit me Cobo Pekki

“Wumok matek i marre kekenwu; pien mar umo lwak bal mapol.”1 Petero 4:8

Ka in ki luoti wucako kwowu kacel, wubirwatte ki pekki mapol. Gitwero bino pien apokapoka tye i kit ma wutamo, wuwinyo, nyo wutero kwede kwo. Pekki bene twero a ki bot jo mukene ki dong jami ma timme aturo.

Waromo temo weyo pekkiwa aweya, ento Baibul cuko cwinywa ni myero watute me cobo pekkiwa. (Matayo 5:23, 24) Wubinongo yo maber loyo me cobo pekkiwu ka wuketo pwony me Baibul i tic.

 1 WULOK I KOM PEKO MA TYE

GIN MA BAIBUL WACO: Tye “kare me lok.” (Latitlok 3:7) Wunen ni wunywako lok i kom kit me cobo peko man kacel. Wek luoti onge kit ma iwinyo kwede ki ngo ma itamo i kom lok meno. Lok “lok ada” bot luoti kare ducu. (Jo Epeco 4:25) Kadi bed lok me gero twero tugge, jing cwinyi wek pe oo wa i daa. Lagam ma imiyo mot ki kica twero weko nyamo lokwu bedo labongo daa.Carolok 15:4; 26:20.

Kadi bed tamwu pe orwatte, medde ki loko lok mamit, kun wi pe wil ka nyuto mar ki woro bot luoti. (Jo Kolocai 4:6) Wutem cobo peko meno oyotoyot, dok wumedde ki lok i kinwu.Jo Epeco 4:26.

GIN MA ITWERO TIMONE:

  • Nong kare mupore me nyamo peko ma tye

  • Ka itye ka winyo gin ma luoti tye ka lokone, gwokke wek pe ingol lokke. Ibibedo ki kareni me lok

 2 WINY LOKKE DOK INIANG MABER

GIN MA BAIBUL WACO: “Wumarre kekenwu ki cwinywu ducu macalo omego, kun dano acel acel miyo deyo bot lawote.” (Jo Roma 12:10) Kit ma iwinyo kwede lok obedo gin ma pire tek. Tem niang tam pa luoti ki “kica dok ki cwiny mamwol.” (1 Petero 3:8; Yakobo 1:19) Pe ipor apora ni itye ka winyo lok. Ka twere kong iwek gin ma itye ka timone ci iket cwinyi i kom winyo lok pa lawoti, nyo ipenye ka wutwero lok lacen. Ka ineno luoti macalo lawoti ento pe lakworri, ci pe ibiweko “kiniga maki oyotoyot.”Latitlok 7:9.

GIN MA ITWERO TIMONE:

  • Medde ki winyo lokke kun ibedo atera me jolo tamme, kadi bed gin ma en tye ka lokone pe yomo cwinyi

  • Tem niang gin ma en tye ka lokone. Nen wange ki kit ma en wito kwede cinge, dok iwiny kodi dwan ma en tye ka tic kwede

3 WUKET TAM MA WUMOKO I TIC

GIN MA BAIBUL WACO: “Kit tic ducu ma dano tiyo magoba tye iye, lok aloka keken ki dog kelo can.” (Carolok 14:23) Moko kit me cobo peko i yo maber pe romo. Myero wuket gin ma wun ducu wumoko i tic. Man kwako tute matek, ento bikeliwu adwogi maber.(Carolok 10:4) Ka wutiyo kacel macalo lurem, ci wubinongo “bakacic maber” pi ticwu.Latitlok 4:9.

GIN MA ITWERO TIMONE:

  • Wumok gin ma wuromo timone me cobo pekowu

  • Wubed ka ngine kare ki kare me neno ka wutye ka cobo yubwu