Cit atir i jami ma tye

Cit atir ka ma nyuto lok ma tye iye

 BUTE ME 6

Kit ma Lutino Loko Kwede Nyom

Kit ma Lutino Loko Kwede Nyom

“Otino obedo mot ame yaa i bang [Jehovah].”Jabuli 127:3, Lango Baibul

Nywalo latin obedo gin ma kelo yomcwiny ki lworo bot jo munyomme. Macalolunyodo manyen, wutwero bedo ki ur pien cawa ki kerowu ducu tum pi gwoko latin. Bedo labongo nino kacel ki alokaloka ma i cwinywu twero miyo wat i kinwu doko goro. Wun ducu myero wutute me loko kwowu wek wugwok latinwu dok wujing nyomwu. Tira me Baibul twero konyowu me cobo tic magi nining?

 1 NIANG KIT MA LATIN LOKO KWEDE KWOWU

GIN MA BAIBUL WACO: “Mar diyo cwinye, dok lakica bene.” Mar “pe yenyo gin mukemo en kene; pe bedo ki keccwiny.” (1 Jo Korint 13:4, 5) Calo min latin lakere manyen, pol kare tammi ducu nongo tye i kom latin. Ento kono, luoti twero cako winyo calo pe iparo pire muromo, pi meno wi myero opo ni en bene mito ni itam pire. Ka idiyo cwinyi dok inyuto kica, iromo konye wek en bene owiny ni konye tye dok wutwero gwoko latinwu kacel.

“Wun co wubed ki monwu ki niang maber.” (1 Petero 3:7) Niang maber ni dakoni tiyo matek pi gwoko latinwu. En tye ki tic mapol manyen dok twero kelo bote olo, par, nyo turcwiny. I kare mukene, iye twero bene wang i komi, ento bed mot, pien “ngat ma kiniga pe mako oyot ber loyo twon oteka.” (Carolok 16:32) Nyut bote niang matut, dok imi kony ma en mito.Carolok 14:29.

GIN MA ITWERO TIMONE:

  • Wego: Kony dakoni ki gwoko latin kadi wa i dyewor. Dwok piny cawa ma icwalo i jami mukene wek iti kwede me konyo kor dakoni kacel ki latinni

  • Mego: Ka laco omine me gwoko latin, ye konye. Ka en pe otiyo i yo mupore, pe ica ticce ento nyute ki kica kit me timone

 2 WUJING WAT I KINWU

GIN MA BAIBUL WACO: “Gin aryo gidoko kom acel.” (Acakki 2:24) Kadi bed wutye ki latin manyen i otwu, wi opo ni in ki luoti wubedo “kom acel.” Tute matek me gwoko wat macok i kinwu.

Mon, wubed ki pwoc pi kony ma cogwu miyo. Pwoc ma imiyo twero “cango dano.” (Carolok 12:18) Co, myero wutit bot monwu kit ma wumarogi kwede dok ni pigi tek botwu. Pake pi kit ma en gwokowu kwede.Carolok 31:10, 28.

“Dano pe olub gin ma konyo en keken, ento myero olub gin ma konyo lawote bene.” (1 Jo Korint 10:24) Kare ducu tim gin ma tye me kony bot luoti. Calo luot, wunong kare me lok, miyo pwoc, ki winyo lok pa lawoti. Gwokke ki wanya ka odok i lok me buto. Par pi miti pa luoti. Baibul wacci: “Dano acel acel pe myero okwer pi kome bot lawote, kono gwok nyo pi kare manok mo keken ma wuyubo ayuba.” (1 Jo Korint 7:3-5) Pi meno, wunyam lok man i kin wun aryo-ni. Diyo cwiny ki niango ma wunyuto bijingo wat i kinwu.

GIN MA ITWERO TIMONE:

  • Wi pe owil me nongo kare pi wun aryo me bedo kacel

  • Tim jami matitino ma weko lawoti winyo ni imare mada, calo goyo cim nyo miyo mic mo bote

 3 KIT ME PWONYO LATINWU

GIN MA BAIBUL WACO: “Cakke i tinoni ingeyo coc maleng ma yam gicoyo ma twero pwonyi i yo me larre.” (2 Temceo 3:15) Go pulan i kom kit me pwonyo latinni. Latin tye ki kero me pwonyo jami, kadi ma pud tye i ic. Ma nongo latinni pud tye i ic, en twero niang dwani dok ngeyo kit ma iwinyo kwede. Bed ka kwan bote ma nongo en pud lakere. Kadi bed en pe biniang jami ducu, man bikonye me maro kwan pire kene ka odoko dit.

Pe tye latin mo ma tidi tutwal ma pe twero winyo lok i kom Lubanga. Wek en owiny ka ilego bot Jehovah. (Nwoyo Cik 11:19) Kadi ka wutye ka tuko kacel, lok i kom jami ma Lubanga ocweyo. (Jabuli 78:3, 4) Ka latinni woto ki dongo, en biniang ka imaro Jehovah dok en bene bipwonyo kit me maro Jehovah.

GIN MA ITWERO TIMONE:

  • Leg Lubanga pi ryeko me pwonyo latinni

  • Bed ka nwoyo lok ma pigi tego bote wek ocak pwonye con