Cit atir i jami ma tye

Cit atir ka ma nyuto lok ma tye iye

 BUTE ME 8

Ka Peko Opoto

Ka Peko Opoto

“Wubed ki yomcwiny pi man, kadi bed  . . . cwinywu twero cwer pi kare manoknok mo pi kit ma gitye ka omo ki cwinywu i yo mapatpat.”1 Petero 1:6

Kadi bed wutemme ki tekwu ducu me bedo ki yomcwiny i otwu, ariya twero ngolle ma balo yomcwiny meno woko. (Latitlok 9:11) Lubanga miyo botwa kony i yo me mar ka wakemme ki peko. Ka ilubo tira me Ginacoya magi, ci in kacel ki jo me odi wubicung matek, kadi bed wukemme ki gin marac.

 1JENGE I KOM JEHOVAH

GIN MA BAIBUL WACO: “Wuket parwu ducu i kome, pien en tamo piwu.” (1 Petero 5:7) Wi myero opo ni pe omyero wakok i kom Lubanga pi pekkiwa. (Yakobo 1:13) Ka inyikke cok bote, en bikonyi i yo ma pud dong ber loyo. (Icaya 41:10) “Wuyab cwinywu woko ducu bote.”Jabuli 62:8.

Ibinongo kwe cwiny bene ka ikwano Baibulli nino ducu. Macalo adwogine,wubiniang kit ma Jehovah “kweyo cwinywa i can ducu ma walimo.” (2 Jo Korint 1:3, 4; Jo Roma 15:4) En ocikke me mini “kuc pa Lubanga ma kato ngec pa jo ducu.”Jo Pilipi 4:6, 7, 13.

GIN MA ITWERO TIMONE:

  • Leg bot Jehovah wek omini cwiny ma opye mot ki tam matir

  • Niang yo ducu ma tye dok iyer mupore piwu

2 GWOK KOMI DOK IGWOK JO ME ODI BENE

GIN MA BAIBUL WACO: “Tam pa ngat ma tye ki niang matut tye me yenyo ngec, jo maryek bene gimito giwiny lok ma medo ngecgi.” (Carolok 18:15) Nong ngec ducu ma mitte. Peny ngat acel acel me oti wek iniang gin ma gimito. Lok kwedgi. Winy lokgi.Carolok 20:5.

Ka ngat ma imaro oto kono? Pe ilwor nyuto kit ma iwinyo kwede. Wi opo ni kadi Yecu “okok ki pig wange.” (Jon 11:35; Latitlok 3:4) Nongo yweyo ki nino muromo obedo gin ma pire tek mada piri. (Latitlok 4:6) Meno weko lweny ki peko magwar doko yot.

GIN MA ITWERO TIMONE:

  • Ma peya peko opoto, wek odok kitwu me lok i kinwu macalo jo me ot. Dong ka peko opoto, gibibedo agonya me lok kwedi

  • Lok bot jo mukene ma guwok ki i peko meno

 3 NONG KONY MA MITTE

GIN MA BAIBUL WACO: “Larem me ada bedo ki mar kare ducu, dok bene bedo macalo omeru i kare me can.” (Carolok 17:17, NW) Luremi gimito konyi, ento oromo bedo ni pe gingeyo gin ma myero gutim. Lworo pe omaki me tito botgi gin ma imito. (Carolok 12:25) Yeny bene kony i yo me cwiny ki bot jo ma gitye ki ngec muromo me Baibul. Tira ma gimiyo ma a ki i Baibul bibedo me kony boti.Yakobo 5:14.

Wubinongo kony ma mitte ka kare ducu wubedo kacel ki jo ma geno Lubanga kacel ki cikkene. Wubinongo bene kwe cwiny ka wukonyo jo mukene ma gimito cuko cwiny. Wunywak gen ma wutye kwede i kom Jehovah ki cikkene kwedgi. Medde wunu ki konyo jo ma tye ki miti dok pe wukanne woko ki bot jo ma gimarowu dok giparo piwu.Carolok 18:1; 1 Jo Korint 15:58.

GIN MA ITWERO TIMONE:

  • Lok bot laremi mo macok wek okonyi

  • Tit gin ma imito kore ki kore