Cit atir i jami ma tye

Cit atir ka ma nyuto lok ma tye iye

 DUL ME 1

Mar pa Lubanga Ri Nakanaka

Mar pa Lubanga Ri Nakanaka

“Maro Lubanga en aye gwoko cikke. Dok cikke pe nurowa.”​—1 JON 5:3.

1, 2. Pingo imaro Lubanga Jehovah?

IN TIKA imaro Lubanga? Oromo bedo ni imarre matek adada mumiyo idyero kwoni bote. Iromo tamo ni en obedo Laremi macok loyo. Ento, ma pud peya icako maro Jehovah, en onongo dong marri. I Baibul, wakwano ni: “Gin mumiyo wabedo ki mar, pien en okwongo marowa.”​—1 Jon 4:19.

2 Tam kong i kom yo mapol mapat pat ma Jehovah onyuto kwede marre piwa. En omiyo botwa lobo me bedo pacowa mamwonya ki jami ducu mabeco ma wamito wek wanong mit pa kwo. (Matayo 5:43-48; Niyabo 4:11) En mito ni wabed ki wat macok kwede, dok en oyabo yo piwa me ngeyo en. Ka wakwano Baibul, nongo watye ka winyo Jehovah. Dok ka walego, nongo en tye ka winyowa. (Jabuli 65:2) En tiro dok jingowa kun tiyo ki cwiny maleng. (Luka 11:13) En bene ocwalo Wode me amara i lobo kany wek olarwa ki i bal ki to.​—Kwan Jon 3:16; Jo Roma 5:8.

3. Watwero gwoko wat macok ki Jehovah nining?

 3 Tam kong i kom laremi mo ma wupoko kwede pyer ngwen, ngat mo ma obedo kwedi i kare me yomcwiny ki kare me cwercwiny. Mito keto tek me gwoko wat macok kumeno. Man bene gin ma mitte me gwoko watwa ki Jehovah, ma en aye obedo Larem macok loyo ma watwero bedo kwede. Liremwa ki Jehovah twero rii pi naka. Pi meno, Baibul wacciwa ni: “Wugwokke kenwu i mar pa Lubanga.” (Juda 21) Watwero timo man nining? Baibul gamo ni: “Maro Lubanga en aye gwoko cikke. Dok cikke pe nurowa.”​—1 Jon 5:3.

“MARO LUBANGA”

4, 5. Marri pi Lubanga ocako dongo nining?

4 Lakwena Jon ocoyo lok i kom marwa pi Lubanga. Tika wi po i kom kare ma icako maro Jehovah?

Ka idyero kwoni bot Jehovah dok inongo batija, nongo inyuto ni imare dok imito lubo cikke matwal

5 Po i kom kit ma iwinyo kwede i kare ma iniang ni Jehovah mito ni ibed matwal i lobo manyen. Ipwonyo lok i kom jami ducu ma en otimo wek man otwere, dok iniang ni Jehovah omiyo botwa mic ma pire tek adada i kare ma en ocwalo Wode i lobo. (Matayo 20:28; Jon 8:29; Jo Roma 5:12, 18) I kare ma ipwonyo ni Jehovah mari mada, man ogudo cwinyi, mumiyo icako maro en bene.​—Kwan 1 Jon 4:9, 10.

6. Maro ngat moni kwako ngo? Marri pi Lubanga oteri me timo ngo?

6 Ento mar meno ma iwinyo i cwinyi pi  Lubanga-ni obedo mere acakkine keken. Me labolle, ka imaro ngat moni, pe igik ki wacone awaca keken ni “Amari.” Mar weko watimo jami ma miyo ngat-ti bedo ki yomcwiny. I yo acel-li, mar-ri pi Jehovah omiyo ibedo ki miti me kwo i yo ma yomo cwinye. I kare ma marri odongo, twero bedo ni idyero kwoni bote dok inongo batija. I kare ma idyero kwoni bot Jehovah, icikke me tic pire pi naka. (Kwan Jo Roma 14:7, 8.) Itwero gwoko cikke meno nining?

“EN AYE GWOKO CIKKE”

7. Ka wamaro Jehovah, wabitimo ngo? Mi labol i kom cik mogo pa Lubanga.

7 Mar ma watye kwede pi Jehovah miyo ‘wagwoko cikke.’ I Baibul, wapwonyo kit ma Jehovah mito ni wakwo kwede. Me labolle, en wacciwa ni rac me mer ki kongo, kwalo kwo, loko lok goba, buto ki ngat ma pe inyomme kwede, nyo woro dano nyo gin mo keken mapat ki en.​—1 Jo Korint 5:11; 6:18; 10:14; Jo Epeco 4:28; Jo Kolocai 3:9.

8, 9. Ngo ma twero konyowa me ngeyo gin ma Jehovah mito ni watim ka pe tye cik mo me Baibul ma loko iye? Mi labol.

8 Ento, me yomo cwiny Jehovah, omyero watim gin makato lubo cikke keken. En pe oryeyo cik mapol ma mako jami ducu i kwowa. Pi meno, i cawa mukene nongo pe tye cik mo i Baibul ma wacciwa gin ma omyero watim.Watwero moko tam me ryeko nining? (Jo Epeco 5:17) Baibul bene tye ki cik ma igi lac, ma gubedo lok ada ma pigi tego ma  pwonyowa kit ma Jehovah neno kwede jami. Dok ka wakwano Baibul, waniang nga ma Jehovah obedo. Wapwonyo kit ma en tamo kwede, gin ma en maro, ki gin ma en dagi.​—Kwan Amoc 5:15; Carolok 6:16-19; nen Lok me Giko Buk Man me 1.

9 Me labolle, watwero yero gin ma omyero wanen i TV nyo intanet nining? Jehovah pe tittiwa atir atir gin ma omyero watim. Ento cik ma igi lac ma en omiyo konyowa me moko tam maber. Pol pa galowang me kare-ni opong ki tim gero ki tim carocaro. I Baibul, Jehovah wacciwa ni ‘edag ngat ma maro timo tim bwami’ dok ‘ebingolo kop i kom lutim tim me abor.’ (Jabuli 11:5; Jo Ibru13:4) Cik ma igi lac magi twero konyowa nining me moko tam me ryeko? Ka teke waniang ni Jehovah dag gin moni nyo neno calo obedo tim carocaro, ci omyero wagwokke kwede.

10, 11. Pingo wawinyo dog Jehovah?

10 Pingo wawinyo dog Jehovah? Wawinye pe pi weyo pwod nyo peko ma bino macalo adwogi me moko tam marac. (Jo Galatia 6:7) Wawinyo Jehovah pien wamare. Kit macalo lutino gimito yomo cwiny wegigi, wan bene wamito yomo cwiny Wonwa me polo. Pe tye gin mo maber kato ngeyo ni Jehovah iye yom i komwa!​—Jabuli 5:12; Carolok 12:2; nen Lok me Giko Buk Man me 2.

11 Pe wawinyo Jehovah keken ka timone yot nyo ka gin mukene me atima pe. Dok pe wayero ayera  cik mene ma myero walubi. (Nwoyo Cik 12:32) Ma ka meno, walubo cikke ducu, calo laco jabuli ma owaco ni: “Anongo yomcwiny i lubo cikki ducu, pien amarogi mada.” (Jabuli 119:47; Jo Roma 6:17) Wamito ni wabed calo Nua, ma onyuto marre pi Jehovah ki timo gin ducu ma Jehovah ocike. Baibul waco ni Nua “ocobo ducu macalo Lubanga ocike.” (Acakki 6:22) Tika imito ni Jehovah olok i komi kumeno?

12. Watwero kelo yomcwiny bot Jehovah nining?

12 Jehovah winyo nining ka walubo cikke? ‘Cwinye bedo yom.’ (Carolok 11:20; 27:11) Tam kong! Wakelo yomcwiny bot Lacwe polo ki lobo ka walubo cikke. Ento en pe diyowa me timo man. Ma ka meno, en ocweyowa ki kero me moko tam piwa kenwa. Man te lokke ni watwero yero me timo gin matir nyo gin marac. Jehovah mito ni marwa pi en oterwa me moko tam maber wek wabed ki kwo maber loyo.​—Nwoyo Cik 30:15, 16, 19, 20; nen Lok me Giko Buk Man me 3.

“CIKKE PE NUROWA”

13, 14. Wangeyo nining ni lubo cik pa Lubanga pe tek tutwal? Mi lapor.

13 Ket-ti watamo ni tek tutwal me lubo cik pa Jehovah nyo ni cikke gengowa bedo agonya kono? Baibul waco ka maleng ni: “Cikke pe nurowa.” (1 Jon 5:3) Nyig lok me leb Grik ma kigonyo ni “nurowa” tyen lokke ni “pek.” I tyeng mukene, nyig lok-ki kitiyo kwede me lok i kom cik ma dano  tiyo kwede me diyo luwotgi nyo jo ma gitemo doro ki wano jo mukene. (Matayo 23:4; Tic pa Lukwena 20:29, 30) Pi meno, cik pa Jehovah pe “pek,” ma man te lokke ni lubogi pe tek. En kare ducu nyuto niango i gin ma en penyowa me timone.

14 Me laporre, go kong ni itye ka konyo laremi me dak i ot manyen. En ocoko jamine ducu ci oketogi i bok mapat pat. Bok mogo yot, ento mukene pek adada ma mito dano aryo me tingogi. Tika laremi bipenyi me tingo bok mapek in keni? Pe wacel! Pingo? Pien en pe mito ni iwanne. Calo laremi-ni, Jehovah pe twero penyowa me timo gin matek tutwal. (Nwoyo Cik 30:11-14) Jehovah niang nga ma wan wabedo. “En ngeyo kit gin ma ecweyowa kwede; en po ni wan apwa mamwa.”​—Jabuli 103:14.

15. Pingo wageno ni cik pa Jehovah ducu tye pi ber bedowa?

15 Moses owaco bot rok me Icrael ni Jehovah ominigi cik wek gubed “maber nakanaka” ki dok ni bedo luwiny bikonyogi me bedo “makwo.” (Nwoyo Cik 5:28-33; 6:24) Man bene rom aroma wa i karewa-ni. Gin mo keken ma Jehovah penyowa me timone tye pi ber bedowa. (Kwan Icaya 48:17.) Wonwa, Jehovah, kare ducu nongo ngeyo gin maber piwa. (Jo Roma 11:33) Baibul wacciwa ni: “Lubanga aye mar.” (1 Jon 4:8) Man nyuto ni mar aye tugo cwiny Jehovah me timo ki waco gin mo keken.

16. Wangeyo nining ni watwero bedo luwiny kadi bed watye ki roc dok wabedo i lobo marac?

 16 I kine mukene pe yot me lubo cik pa Lubanga. Wabedo i lobo marac ma tye i te loc pa Larac-ci. En bito dano me timo jami maraco. (1 Jon 5:19) Omyero bene walweny ki tam maraco ma bino i cwinywa, pien twero miyo waturo cik pa Lubanga. (Jo Roma 7:21-25) Ento marwa pi Jehovah miniwa kero me timo gin matir. En neno tutewa me lubo cikke, dok konyowa ki tekone me cwiny maleng. (1 Camuel 15:22, 23; Tic pa Lukwena 5:32) Cwiny maleng konyowa me nyako nyig mabeco ma miyo walubo cikke.​—Jo Galatia 5:22, 23.

17, 18. (a) Gin ango ma wabipwonyo i buk man? (b) Ngo ma wabinyamo i dul ma lubo man?

17 I buk man, wabipwonyo kit ma myero wakwo kwede wek wayom cwiny Jehovah. Wabipwonyo kit me lubo rwom me kwo matir, ki kit me keto cik ma igi lac me Baibul i tic. Wi opo ni Jehovah pe diyowa me lubo cikke. Ka wayero me bedo luwiny, kwowa biyubbe dok wabibedo ki anyim mamwonya. Ma pire tek loyo, bedo luwinywa binyuto bot Lubanga kit ma wamarre kwede.​—Nen Lok me Giko Buk Man me 4.

18 Me konyowa ngeyo gin maber ki marac, Jehovah ominiwa ki acel acel cwiny ma ngoliwa kop. Ka wapwonyo cwiny ma ngoliwa kop-pi, ci twero konyowa me “gwoko cikke.” Dong, cwiny ma ngoliwa kop-pi obedo ngo, dok wapwonyo nining? Kong wanenu.