Cit atir i jami ma tye

Cit atir ka ma nyuto lok ma tye iye

 DUL ME 8

Jehovah Mito ni Jone Gubed Leng

Jehovah Mito ni Jone Gubed Leng

“Cwinyi leng i kom jo ma cwinygi leng.”​—JABULI 18:26.

1-3. (a) Pingo mego yelle me neno ni wode leng? (b) Pingo Jehovah mito ni jone gubed leng?

GO KONG ni mego mo ma lamar tye ka yubo wode me cito i cukul. En neno ni wode olwokke, bongine leng dok kigoyo maber. Man weko kome bedo yot dok nyuto bot jo mukene ni lunyodone gitye ka gwoke maber.

2 Wonwa, Jehovah, mito ni wabed leng. (Jabuli 18:26) En ngeyo ni gwoko lengo keliwa adwogi  maber. Dok ka waleng, wakelo deyo bote.​—Ejekiel 36:22; kwan 1 Petero 2:12.

3 Te lokke ngo me bedo leng? Adwogi maber ango ma wanongo ka waleng? Ka wawoto ki nyamo lapeny magi, ci waromo neno kabedo mogo i kwowa ma mitte ni wayubi.

PINGO OMYERO WABED LENG?

4, 5. (a) Pingo omyero wabed leng? (b) Cwec pwonyowa ngo i kom kit ma Jehovah neno kwede lengo?

4 Wapwonyo kit me bedo leng ki i lanen pa Jehovah. (Lulevi 11:44, 45) Pi meno, tyen lok ma pire tek loyo mumiyo omyero wabed leng aye ni wamito ‘lubo kit pa Lubanga.’​—Jo Epeco 5:1.

5 Cwec pwonyowa kit ma Jehovah neno kwede lengo. Jehovah oyubo lobo me bedo paco maleng pi dano. Me labolle, ka kot ocwer, ci ceng oryeny ingeye, pii kot-ti duny cito malo doko pol ci lacen dok cwer macalo kot. Man obedo gin ma tiko timme labongo gik. I lobo bene watye ki kwidi mogo matino adada ma giloko awola maraco doko gin ma pe wano dano.​—Jeremia 10:12; Jo Roma 1:20.

6, 7. Cik pa Moses onyuto nining ni jo ma woro Jehovah omyero gubed leng?

6 Waneno bene kit ma pire tek kwede me bedo leng ki i Cik ma Jehovah omiyo bot jo Icrael. Me labolle, jo Icrael onongo myero gubed ma komgi leng wek Jehovah ojol worogi. I Nino me Kwanyo Bal, lalamdog madit onongo myero olwokke kiryo. (Lulevi 16:4, 23, 24) Dok ma peya lulamdog mukene-ni gutyero tyer, onongo myero gulwok  cinggi wa ki tyengi. (Nia 30:17-21; 2 Tekwaro 4:6) I kine mukene, pwod ma onongo kimiyo pi turo cik magi obedo to.​—Lulevi 15:31; Wel 19:17-20.

7 I karewa-ni kono? Watwero pwonyo kit ma Jehovah neno kwede jami mapol ki i Cik ma en omiyo bot jo Icrael. (Malaki 3:6) Cik man onyuto ka maleng ni jo ma woro Jehovah omyero gubed leng. Neno pa Jehovah peya olokke. I kareni, en pud mito ni jo ma wore gubed leng.​—Yakobo 1:27.

TE LOKKE NGO ME BEDO LENG?

8. I kabedo mene ma myero wabed leng iye?

8 Ki i neno pa Jehovah, bedo leng pe kwako mere gwoko lengo me komwa, bongiwa, ki gangiwa keken. Bedo leng kwako kabedo ducu me kwowa. Gudo worowa, kitwa, ki tamwa. Ada, me wek Jehovah onenwa calo jo maleng, omyero wabed leng i kabedo ducu me kwowa.

9, 10. Te lokke ngo me bedo leng i worowa?

9 Worowa myero obed leng. Pe myero waribbe ki dini goba i yo mo keken. I kare ma Luicrael gitye i mabuc i Babilon, luworo me goba onongo gurumogi woko dyere. Icaya onongo otito ni jo Icrael gibidok cen paco ka roco woro me ada. Jehovah owaco botgi ni: “Wua woko ki kunnu, pe wugud gin mo ma kome ki keni; wua woko ki kunnu, wek wucit wulonnye kekenwu.” Woro ma gimiyo bot Lubanga onongo pe myero orubbe ki pwony, tim, nyo tekwaro me dini goba pa Lubabilon.​—Icaya 52:11.

 10 I kareni, Lukricitayo me ada bene gigwokke ki dini goba. (Kwan 1 Jo Korint 10:21.) I twok lobo lung, tekwaro ki niye mapol jenge i kom pwony me dini goba. Me labolle, i tekwaro mapol, dano giye ni watye ki tipo ma medde ki kwo i nge towa. Tye tekwaro mapol ma jenge i niye man, calo guru lyel. (Latitlok 9:5, 6, 10) Lukricitayo omyero gugwokke ki tekwaro magi. Wadiwa guromo keto lyeto i komwa me donyo iye. Ento, pien wamito ni Jehovah onenwa calo jo maleng, pe wabiye timo mitigi.​—Tic pa Lukwena 5:29.

11. Te lokke ngo me bedo leng i kitwa?

11 Kitwa myero obed leng. Wek Jehovah onenwa macalo jo maleng, omyero wagwokke ki i tim me carocaro mo keken. (Kwan Jo Epeco 5:5.) I Baibul, Jehovah wacciwa ni ‘wabol tim kwele woko.’ En owaco ka maleng ni jo ma timo tim tarwang dok pe gingut, “Ker pa Lubanga pe bibedo megi.”​—1 Jo Korint 6:9, 10, 18; nen Lok me Giko Buk Man me 22.

12, 13. Pingo omyero wabed leng i tamwa?

12 Tamwa myero obed leng. Tam aye pol kare terowa me timo gin moni. (Matayo 5:28; 15:18, 19) Tam maleng biterowa me tiyo gin maleng. Ngene kene ni pi roc ma watye kwede, i kine mukene watamo tam maraco. Ka tam maraco ongolle i wiwa, omyero wakwer woko lajwac. Ka pe wakwero, ci i nge kare mo wabinongo ni cwinywa dong pe leng. Waromo cako bedo ki miti me timo jami maraco ma wabedo ka tamone-ni. Ma ka meno, omyero  wapong tamwa ki jami maleng. (Kwan Jo Pilipi 4:8.) Pi meno, omyero wagwokke ki galowang ma nyuto tim tarwang nyo tim gero. Omyero wagwokke adada ki jami ma wakwano, waneno, dok waloko iye.​—Jabuli 19:8, 9.

13 Me bedo i mar pa Lubanga, omyero wabed leng i worowa, kitwa, ki tamwa. Ento pire tek bene bot Jehovah ni wagwok lengo me komwa.

WAROMO GWOKO LENGO ME KOMWA NINING?

14. Pingo pire tek me gwoko lengo me komwa?

14 Ka wagwoko komwa ki kabedo murumowa maleng, ci wan kacel ki jiraniwa wabinongo adwogi maber. Wabiwinyo maber, dok jo mukene gibimito bedo kacel kwedwa. Ento, tye tyen lok mukene ma pire tek mumiyo omyero wabed leng. Gwoko lengo kelo deyo bot Jehovah. Tam kong: Ka ineno latin ma cawa weng nongo kome col, iromo bedo ki tam marac i kom lunyodone. I yo acel-li bene, ka pe wagwoko komwa maleng, ci dano guromo bedo ki tam marac i kom Jehovah. Paulo owaco ni: “Wan pe wamito waket ariya mo i yo pa ngat mo, wek dano pe guwac ni ticwa rac; ento i kare ducu wanyuto berwa kenwa macalo wan lutic pa Lubanga.”​—2 Jo Korint 6:3, 4.

Macalo jo pa Jehovah, omyero wagwok lengo me komwa ki kabedo murumowa

15, 16. Ngo ma watwero timone me gwoko lengo me komwa?

15 Komwa ki bongiwa. Gwoko lengo me komwa myero obed gin ma watimo nino ducu. Me labolle, walwokke nino ducu ka twere. Walwoko cingwa ki cabun ki pii, tutwalle ma peya wacako tedo nyo  cam, ki dok ka wa a ki i coron nyo wagudo gin mo macol. Lwoko cingwa romo nen calo gin mo matidi, ento pire tek adada me gengo nya pa kwidi. Twero laro kwowa. Ka wape ki coron, pud watwero nongo yo maber me yiko konye woko. Luicrael onongo gipe ki coron, pi meno onongo giyiko konyegi i ngom, ka mabor ki odi pa dano nyo wang it.​—Nwoyo Cik 23:12, 13.

16 Pe mitte ni bongiwa obed ma rwomme lamal tutwal, nyo ma welle tek, nyo cital ma pud okatti nyen. Ento omyero gubed leng dok ma kigoyo maber. (Kwan 1 Temceo 2:9, 10.) Wamito ni kit ma wanen kwede kare ducu obed ma kelo deyo bot Jehovah.​—Tito 2:10.

17. Pingo wamito gwoko gangiwa ki kabedo murumowa maleng?

 17 Gangiwa ki kabedo murumowa. Omyero wagwok gangiwa obed leng ka mo keken ma wabedo iye. Omyero bene wanen ni mutokawa, pikipikiwa, lelawa, nyo giwot mo keken ma watye kwede obedo leng, tutwalle ka watiyo kwede me cito i cokke nyo ticwa me pwony. I kom lok, ka watye i tic me pwony, watito pi kwo i lobo maleng me paradic. (Luka 23:43; Niyabo 11:18) Kit ma gangiwa ki kabedo murumowa nen kwede twero nyuto ni watye ka yubbe pi kwo i lobo maleng meno me paradic.

18. Pingo omyero wagwok kabedowa me woro obed maleng?

18 Kabedowa me woro. Wanyuto ni lengo pire tek botwa ka wagwoko lengo me Ot me Ker nyo kabedo ma wagure iye. Ka dano gubino i Ot me Ker pi tyen mukwongo, pol kare gineno kit maleng kwede. Man kelo deyo bot Jehovah. Macalo jo me kacokke, wan ducu watye ki mot me gwoko lengo me Otwa me Ker, ki dok me rocone kare ki kare.​—2 Tekwaro 34:10.

LONYE KI I KOM KIT KI TIM MOGO MACILO

19. Ngo ma myero wagwokke kwede?

19 Kadi bed Baibul pe loko i kom kit macilo ducu ma myero wagwokke kwedgi, ento miniwa cik ma igi lac ma konyowa me niang kit ma Jehovah winyo kwede i kom tim meno. En pe mito ni wamat taa nyo wamat kongo mukato kare woko, dok pe  mito ni wati ki yadi calo jayigi-ni. Ka watye lurem Lubanga, wabigwokke ki jami magi. Pingo? Pien watye ki pwoc madit i kom mic me kwo. Timo jami magi twero giko kwowa macek, nyo bene wano jo ma gitye ka ngetwa. Dano mapol gitute me giko kit maraco magi pi yot komgi. Ento, wan macalo lurem Jehovah, watye ki tyen lok maber loyo me jukone woko, ma meno obedo marwa pi Lubanga. Lamego mo owacci: “Ki kony pa Jehovah, alonyo kwona ci agiko tic ki yadi ma onongo oloka adoko opiigi. . . . Atamo ni onongo pe twere me timo alokaloka magi pira kena.” Kong wanyamu cik ma igi lac abic ma bikonyo ngat mo me juko kit maraco.

20, 21. Kodi tim ango ma Jehovah mito ni wagwokke kwede?

20 “Cikke meno yam giciko piwa. Pi meno, myero walonnye woko kekenwa i gin mo ducu ma cido komwa nyo cwinywa, kun walworo Lubanga, wek wadoku jo maleng atikatika.” (2 Jo Korint 7:1) Jehovah mito ni wagwokke ki i kom tim mogo macilo ma twero balo tamwa nyo komwa.

21 Tyen lok ma pire tek mumiyo omyero “walonnye woko kekenwa i gin mo ducu ma cido komwa” kitito i 2 Jo Korint 6:17, 18. Jehovah owaco botwa ni: “Pe wugud gin mo ma kome ki keni.” Ci ocikke ni: “Miyo abijolowu, abibedo wonwu, wun bene wubibedo awobena ki anyirana.” Ada, Jehovah bimarowa kit ma wego maro kwede lutinone ka wagwokke ki gin mo keken ma cidowa.

22-25. Cik ma igi lac mene ma twero konyowa me gwokke ki tim macilo?

 22 ‘Mar Jehovah Lubangani ki cwinyi ducu, ki kwoni ducu, ki tammi ducu.’ (Matayo 22:37) Man obedo cik madit loyo ducu. (Matayo 22:38) Jehovah opore me nongo marwa ki cwinywa ducu. Watwero marre ki cwinywa ducu nining ka watimo jami ma twero giko kwowa macek nyo nyweno wiwa? Ma ka meno, watimo jami ducu ma twere me nyuto woro i kom kwo ma en ominiwa.

23 “[Jehovah] miyo kwo ki dano ducu wa ki yweyo ki jami ducu.” (Tic pa Lukwena 17:24, 25) Ka laremi omini mic mo maber adada, tika ibibayo nyo ibalo woko? Kwo obedo mic me aura mua ki bot Jehovah. Watye ki pwoc madit adada i kom mic man. Pi meno, wamito tic ki kwowa i yo ma miyo deyo bot Jehovah.​—Jabuli 36:9.

24 “Mar lawoti macalo imarre keni.” (Matayo 22:39) Tim macilo pe kelo adwogi marac i komwa keken. Twero wano wa jo ma tye ka ngetwa, ma pol kare obedo jo ma wamarogi adada. Me labolle, ngat ma bedo i ot acel ki lamat taa twero nongo two maraco adada mere ki yuyo ito taa-ni. Ento ka wajuko tim maraco, wanyuto bot jo ma gitye ka ngetwa ni wamarogi.​—1 Jon 4:20, 21.

25 “Po wigi ducu me mine kengi i te loc pa luloc, ki wegi twer, me bedo ki winy.” (Tito 3:1) I lobe mapol, cik pe ye ni kigwok nyo kiti ki yadi mogo. Dong, kit ma Jehovah ocikowa ni wawor gamente, omyero walub cik magi.​—Jo Roma 13:1.

Ka wabedo jo maleng, ci wakelo deyo bot Jehovah

26. (a) Ngo ma myero watim wek Jehovah ojol worowa? (b) Pingo bedo leng i wang Jehovah aye yo me kwo maber loyo?

 26 Ka wamito bedo larem Jehovah, watwero neno ni omyero watim alokaloka mogo i kwowa. Ka mitte, ci omyero watim labongo galle. Pol kare, pe yot me juko tim macilo, ento watwero timone! Jehovah ocikke me konyowa. En owaco ni: “An a Rwot Lubangawu amito pwonyowu wek wubed maber, kun atelowu i yo ma myero wuwot iye.” (Icaya 48:17) Ka watute matek me bedo leng, ci wabikelo deyo bot Lubangawa.