Cit atir i jami ma tye

Cit atir ka ma nyuto lok ma tye iye

 DUL ME 17

Bed i Mar pa Lubanga

Bed i Mar pa Lubanga

“Wudong matek i niyewu maleng twatwal-li, . . . Wugwokke kenwu i mar pa Lubanga.”—JUDA 20, 21.

1, 2. Ngo ma watwero timone me bedo i mar pa Lubanga?

WAN ducu wamito bedo matek dok ma komwa yot. Pi meno, wacamo cam mabeco, warweyo ler komwa kare ki kare, dok wagwoko komwa maber. Kadi bed timo jami magi pe yot, ento wanongo adwogi maber ka watimo. Pi man pe wailo cingwa woko. Ento bene mitte ni wabed tek dok ma komwa yot i yo mukene.

2 Kadi bed wacako ngeyo Jehovah maber, ento mitte ni wabed ka jingo watwa kwede wek obed matek. I kare ma Juda ocuko cwiny Lukricitayo ni, “Wugwokke kenwu i mar pa Lubanga,” en bene otito botgi kit ma gitwero timo kwede man. En owaco botgi ni: “Wudong matek i niyewu maleng twatwal-li.” (Juda 20, 21) Dong, watwero dongo niye matek nining?

MEDDE KI DONGO NIYENI

3-5. (a) Catan mito ni iwiny nining i kom Cik pa Jehovah? (b) In iwinyo nining i kom cik kacel ki pwony ma Jehovah miniwa?

3 Pire tek adada ni ibed labongo akalakala mo ni yo pa Jehovah aye ber loyo. Catan mito ni itam ni lubo cik pa Jehovah tek tutwal, dok ni ibibedo ki yomcwiny ka imoko piri keni gin matir ki gin marac. Nicakke  ki i poto me Eden, Catan obedo ka bito dano me ye lok man. (Acakki 3:1-6) Dok en pud tye ka tute matek i kareni.

4 Catan tika tye ka loko lok ada? Cik pa Jehovah tika diyowa? Pe. Me lapore, ket-ti itye ka wot i kabedo mo mamwonya atika, ci ineno cel mo matek dok lamal ma tye orumo kabedo mo ki tung nyimi. Itwero bedo ki tam ni, ‘Pingo cel man tye ka gengo yona?’ Ento ma pud itye ka tamo tam man, iwinyo ka labwor kok ki i nge cel-li. Dong ibicako winyo nining i kom cel man? Ibibedo ki twon pwoc madit ni cel-li tye ka gwokki ki i kom labwor! Cik pa Jehovah tye calo cel meno, dok Larac-ci tye calo labwor-ni. Lok pa Lubanga cikowa ni: “Wugwokke, wuki piny, pien lakworwu Catan tye ka wirre macalo labwor ma kok, kun yenyo dano me amwoda.”—1 Petero 5:8.

5 Jehovah mito ni wabed ki kwo maber loyo. En pe mito ni Catan obwolwa. Meno aye gin mumiyo en ominiwa cik kacel ki pwony me Baibul me gwokowa wek wabed ki yomcwiny. (Jo Epeco 6:11) Yakobo ocoyo ni: “Ngat ma neno cik maber ma kelo kuc, ka ori iye bibedo ki yomcwiny i gin ma en timo.”—Yakobo 1:25.

6. Ngo ma twero konyowa me bedo labongo akalakala ni yo pa Lubanga aye ber loyo?

6 Ka walubo tira pa Jehovah, ci kwowa bedo maber dok liremwa ki Lubanga jing matek. Me labolle, wanongo adwogi maber ka waye lwongo pa Jehovah me lega bote kare ducu. (Matayo 6:5-8; 1 Jo Tecalonika 5:17) Wabedo ki yomcwiny ka walubo cikke me cokke  kacel ka wore ki cuko cwinywa kekenwa. Wanongo yomcwiny bene ka wanywako ki kerowa ducu i tic me tito kwena ki pwonyo dano. (Matayo 28:19, 20; Jo Galatia 6:2; Jo Ibru 10:24, 25) Ka watamo i kom kit ma jami magi okonyowa kwede me bedo ki niye matek, ci wabedo labongo akalakala mo ni yo pa Jehovah aye ber loyo.

7, 8. Ngo ma bikonyowa pe me lworo atematema ma watwero kemme kwede i anyim?

7 Twero bedo ni walworo ni i anyim, wabikemme ki atematema magwar adada ma pe watwero cung matek iye. Ka iwinyo kumeno, wi opo i kom lok pa Jehovah man: “An a Rwot Lubangawu amito pwonyowu wek wubed maber, kun atelowu i yo ma myero wuwot iye. Kono yam wubedo ka winyo cikka, kono ber! Kono kucwu omol calo kulu ma mol jwi,  kono wuloyo lok [kitwu atir] calo nam ma piine [twagge] mol labongo yweyo-ni.”—Icaya 48:17, 18.

8 Ka wawinyo Jehovah, ci kucwa bibedo calo kulu ma mol jwi, dok kit matir ma watye kwede bibedo calo nam ma piine twagge labongo yweyo. Kadi bed gin mo keken otimme i kwowa, pud watwero bedo lugen. Baibul ociko ni: “Kel pekoni ducu bot Rwot [Jehovah], ci en bikonyi; en pe biye ni myero gidir dano ma kite atir woko wacel.”—Jabuli 55:22.

‘MEDDE ANYIM KI DONGO ME BEDO DANO MUTEGGI’

9, 10. Te lokke ngo me bedo dano muteggi?

9 Ka iwoto ki jingo watti ki Jehovah, ci bene ‘ibimedde ki dongo me bedo dano muteggi.’ (Jo Ibru 6:1) Te lokke ngo me bedo dano muteggi?

10 Pe wadoko jo muteggi mere ka mwakawa woto ki cito. Me doko jo muteggi, omyero wawek Jehovah odok Laremwa maber loyo dok watem neno jami kit ma en neno kwede. (Jon 4:23) Paulo ocoyo ni: “Jo ma gibedo i kit pa dano, giketo tamgi bene i kom gin ma lubo kit pa dano; ento jo ma gibedo kun gilubo kit pa cwiny maleng giketo tamgi bene i kom gin me cwiny.” (Jo Roma 8:5) Dano muteggi pe keto tamme i kom nongo yomcwiny nyo jami me kom keken. Ma ka meno, en keto tamme i tic pi Jehovah dok moko tam me ryeko i kwone. (Carolok 27:11; kwan Yakobo 1:2, 3.) En pe weko jo mukene diye me timo gin marac. Dano muteggi ngeyo gin matir dok moko tamme me timone.

11, 12. (a) Ngo ma Paulo owaco i kom kero ma Lakricitayo tye kwede me “poko gin maber ki gin marac”? (b) Doko Lakricitayo muteggi rom aroma ki doko latuko ma ladiro nining?

 11 Mito tute me doko ngat muteggi. Lakwena Paulo ocoyo ni: “Cam matek tye pi jo muteggi, ma ryekogi ma gupwonnye kwede me poko gin maber ki gin marac dong ojing pi ketone i tic.” (Jo Ibru 5:14) Lok man ni ‘gupwonnye-ni’ poyo wiwa i kom kit ma latuko pwonnye kwede.

12 Ka waneno latuko ma ladiro, wangeyo ni otere kare dok opwonnye matek me dongo dirone. Pe kinywale ma en dong latuko ma ladiro. Ka latin pud kinywalo anywala, nongo pe ngeyo kit me tic ki bade kacel ki tyene. Ento ka kare woto ki kato, en pwonyo kit me mako jami ki kit me wot. Ka en omedde ki pwonnye, lacen twero doko latuko ma ladiro. I yo acel-lu bene, tero kare dok omyero wapwonnye matek me doko Lukricitayo muteggi.

13. Ngo ma bikonyowa me tam kit ma Jehovah tamo kwede?

13 I buk man, wanyamo kit ma watwero tam kwede calo Jehovah, kun waneno jami kit ma en neno kwede. Wapwonnye me pwoyo ki maro cik pa Jehovah. Ka watye ka moko tam, wapennye kekenwa ni: ‘Cik nyo pwony mene me Baibul ma gudo lok man? Atwero ketone i tic nining? Ngo ma Jehovah mito ni atim?’—Kwan Carolok 3:5, 6; Yakobo 1:5.

14. Ngo ma myero watim ka wamito jingo niyewa matek?

14 Dongo niyewa i kom Jehovah pe gik. Kit macalo camo cam mabeco jingo komwa, pwonyo lok i kom Jehovah konyowa me jingo niyewa matek. I kare ma wacako kwano Baibul, wapwonyo lok ada  ma pigi tego i kom Jehovah ki yone. Ento ka kare woto ki kato, omyero waniang jami matut. Meno aye gin ma Paulo onongo tye ka wacone i kare ma en ocoyo ni: “Cam matek tye pi jo muteggi.” Wadoko jo maryek ka waketo jami ma wapwonyo i tic. Baibul wacciwa ni: ‘Ryeko aye gin ma pire tek loyo jami mukene ducu.’—Carolok 4:5-7; 1 Petero 2:2.

15. Pire tek lakwene me nyuto mar me ada bot Jehovah ki omegiwa ki lumegiwa?

15 Ngati mo twero bedo tek dok ma kome yot, ento me wek en omedde ki bedo kumeno, myero omedde ki gwoko kome maber. I yo acel-lu bene, dano muteggi ngeyo ni myero eti matek me gwoko watte ki Jehovah wek obed matek. Paulo opoyo wiwa ni: “Kong wungine kekenwu, wek wunen ka ce wucung matek i niyewu. Wutemme kekenwu.” (2 Jo Korint 13:5) Kadi bed kumeno, wamito gin mukene mapat ki bedo ki niye matek. Marwa pi Jehovah ki omegiwa ki lumegiwa myero omedde ki dongo. Paulo owaco ni: “Ka atye ki . . . ngec ducu, ma atye bene ki niye ducu, ma atwero bene kobo kwede godi madongo-gu woko ka mukene, ce pe atye ki mar, ci pe a gin mo.”—1 Jo Korint 13:1-3.

KET TAMMI I KOM GENNI

16. Catan mito ni wawiny nining?

16 Catan mito ni watam ni pe watwero yomo cwiny Jehovah kadi wayelle nining. En mito ni watam ni konywa pe dok pe tye yo mo me cobo pekowa. En pe mito ni wagen Lukricitayo luwotwa, dok pe mito ni wabed ki yomcwiny. (Jo Epeco 2:2) Catan ngeyo ni  tamo tam maraco twero kelo adwogi marac i komwa dok balo watwa ki Lubanga. Ento Jehovah ominiwa gin mo ma twero konyowa me lweny ki tam maraco. En ominiwa gen.

17. Pingo gen pire tek?

17 I 1 Jo Tecalonika 5:8, Baibul poro genwa ki otok ma gwoko wi lamony i dog lweny. Otok meno kilwongo ni “gen me larre.” Gen ma watye kwede i kom cikke pa Jehovah twero gwoko tamwa dok konyowa me lweny ki tam maraco.

18, 19. Gen ma Yecu onongo tye kwede ojinge nining?

18 Gen ma Yecu onongo tye kwede ojinge adada. I dyewor me agikki me kwone i lobo, en okemme ki pekki ma obedo ka corre acora i kome. Lareme macok kwede ocate woko. Lareme mukene okwero woko ni pe engeye. Mukene gutenye woko liyak. Lutugi  gujemo i kome, kun gidido ni omyero kineke ki nek alany. Ngo ma okonye me ciro arem man? ‘Pi yomcwiny ma giketo i nyime en yam ociro yat kun ocayo lewic ma giketo i kome; ento kombeddi dong obedo piny i kabedo me deyo yo tung acuc me komker pa Lubanga.’—Jo Ibru 12:2.

19 Yecu onongo ngeyo ni ka egwoko gennene, ci ebikelo deyo bot Wonne kun emoko ni Catan obedo lagoba. Gen man okelle yomcwiny madit atika. En bene onongo ngeyo ni ecok ribbe ki Wonne i polo. Gen man okonye me ciro peko ducu ma en okato ki iye. Calo Yecu, omyero waket tamwa i kom gen ma watye kwede. Man bikonyowa me ciro peko mo keken ma watwero kemme kwede.

20. Ngo ma twero konyi me bedo ki neno matir?

20 Jehovah neno niyeni ki diyo cwinyi. (Icaya  30:18; kwan Malaki 3:10.) En ocikke me ‘mini gin ducu ma cwinyi mito.’ (Jabuli 37:4) Pi meno, cik wangi i kom genni. Catan mito ni irweny genni woko dok itam ni cikke pa Jehovah pe bicobbe matwal. Ento kwer tam maraco lajwac! Ka iniang ni genni tye ka doko goro, peny Jehovah wek okonyi. Wi opo i kom lok ma nonge i Jo Pilipi 4:6, 7: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga ma kato ngec pa jo ducu gwoko cwinywu ki tamwu maber i Kricito Yecu.”

21, 22. (a) Yub ango ma Lubanga tye kwede pi lobo? (b) In imoko tammi me timo gin ango?

21 Kare ki kare, lwod lok i kom gen mamwonya ma watye ka kurone-ni. Cokcok-ki, dano ducu makwo biworo Jehovah. (Niyabo 7:9, 14) Tam kong kit ma kwo bibedo kwede i lobo manyen. Bibedo ber loyo gin mo keken ma wabyeko! Catan, jogine, ki jo maraco ducu nongo dong gipe. Two ki to bibedo pe. Ma ka meno, ibico nino ducu ma itye ki kero dok cwinyi yom me bedo makwo. Dano ducu gibitic kacel me loko lobo wek odok paradic. Dano ducu bibedo ki cam mamit kacel ki odi mabeco me bedo iye. Tim gero bibedo pe, ento dano bimaro luwotgi ducu. I nge kare mo, dano ducu ma i lobo gibibedo ki “deyo ma gimiyo ki litino pa Lubanga.”—Jo Roma 8:21.

22 Jehovah mito ni iwek en obed Laremi macok loyo. Pi meno, yelle matek me winyo Jehovah dok inyikke cok bote nino ducu. Kakare, wamedde wunu me bedo i mar pa Lubanga matwal!—Juda 21.