Cit atir i jami ma tye

Cit atir ka ma nyuto lok ma tye iye

LAMED NGEC

Nino me Ngolo Kop Mono Obedo Nino Ango?

Nino me Ngolo Kop Mono Obedo Nino Ango?

IN ITAMO ni Nino me Ngolo Kop bibedo nining? Dano mapol gitamo ni kibikelo dano bilion mapol inyim komker pa Lubanga ka kibingolo kop i komgi ki acel acel. Ka jo mukene gibinongo mot me cito i kwo me yomcwiny i polo, ki jo mukene kibingolo kop i wigi me cito ka deno can i kapiny. Ento, Baibul dok waco gin mapat ki lok meno. Lok pa Lubanga nyuto ni, kare meno pe obedo kare me lworo, ento obedo kare me gen ki me roco piny wek odok maber.

I Niyabo 20:11, 12, wakwano lok ma lakwena Jon otito i kom nino me Ngolo Kop ni: ‘Dok aneno komker mo madit matar, ki ngat ma obedo i wiye. Lobo ki polo gua ki i nyime guringo woko, ento pe dok ginongo kabedo mo pigi. Ci aneno jo muto, jo madito ki jo matino, kun gucung i nyim komker, onongo bene tye kenyo buk mogo ma kiyabo igi woko. Kiyabo bene buk mo mukene ma en aye buk me kwo. Kingolo kop i kom jo muto ma lubbe ki ticgi.’ Anga ma obedo Langolkop ma kitito pire kany-nyi?

Lubanga Jehovah aye obedo Langolkop madit. Kadi bed kit meno, en omiyo tic me ngolo kop i cing ngat mukene. Ma lubbe ki Tic pa Lukwena 17:31, lakwena Paulo owaco ni Lubanga “dong otyeko moko nino ma en bingolo iye kop i kom dano ducu ma i lobo i kit ma atir, kun dong oyero dano ma myero ongol kop ma ka-kare.” Langolkop man ma kiyero-ni, obedo Yecu Kricito i kare ma dong kicere woko. (Jon 5:22) Dong Nino me Ngolo Kop kono bicakke awene? Dok bitero kare ma rom mene?

Buk pa Niyabo nyuto ni Nino me Ngolo Kop bicakke i nge gik pa lweny me Armagedon, i kare ma kibityeko iye yub pa Catan marac me kare-ni ducu.* (Niyabo 16:14, 16; 19:19-20:3) Inge lweny me Armagedon, Catan ki jogine ducu kibitweyogi i buc i bur ma tere pe gik pi mwaki alip acel. I kare meno jo alip 144,000 ma gibinywako tic me loc-ci, ‘gibibedo ka loc kacel ki Kricito pi mwaki alip acel.’ (Niyabo 14:1-3; 20:1-4; Jo Roma 8:17) Pi meno, Nino me Ngolo Kop pe obedo kare ma tero cawa 24 keken, ento bitero mwaki alip acel kulu.

Yecu Kricito ‘bingolo kop i kom jo muto ki jo makwo.’ i kare me mwaki alip acel-li. (2 Temceo 4:1) “Jo makwo” gibibedo “lwak dano mapol ata” ma gubwot ki i lweny me Armagedon. (Niyabo 7:9-17) Lakwena Jon bene oneno “jo muto…kun gucung i nyim” komker me ngolo kop. Kit ma Yecu ociko kwede, “jo ducu ma tye i lyel biwinyo iye dwane [en Kricito], ci gibikatti woko” i kare me nicer. (Jon 5:28, 29; Tic pa Lukwena 24:15) Ento ngolo kop man bicung i kom gin ango?

Ma lubbe ki ginanyuta, lakwena Jon oneno, ‘buk mogo ma giyabo igi woko,’ ka ‘kingolo kop i kom jo muto ma lubbe ki ticgi.’ Man mono obedo buk mogo ma kigwoko iye lok i kom jami maraco ma dano gutimo i kare ma onongo pud gikwo? Pe, ngolo kop pe bibedo i kom bal ma dano gutimo ma pud peya guto. Wan kono wangeyo lok meno nining? Baibul waco ni: “Ngat ma oto, balle dong gik woko.” (Jo Roma 6:7) Pi meno, jo ma kicerogi-ni gidwogo i kwo ma nongo gipe ki bal mo. Dong buk man omyero obed ni nongo tye ki cik mukene pa Lubanga. Me wek gubed ki kwo ma pe tum, jo ma gibibwot ki i lweny me Armagedon ki jo ma kibicerogi-ni omyero gubed jo ma lubo cik pa Lubanga, Jehovah binyuto botgi cik mukene manyen me aluba, i kare me mwaki alip acel-li. Ci dong, kibingolo kop i wi ngat acel acel kun nongo cung i kom jami ma en obedo ka timone i kare me Nino me Ngolo Kop.

Nino me Ngolo Kop bimiyo kare bot dano bilion mapol me pwonyo miti pa Lubanga ki me yubo kwogi bene. Man tyen lokke ni tic me pwony madit bibedo tye. Adada, ‘jo ma bibedo i lobone gibipwonyo kit ma atir.’ (Icaya 26:9) Kadi bed kit meno, pe dano ducu gibiye timo miti pa Lubanga. Icaya 26:10 waco ni: “Dano marac kadi bed gitine gin maber, pe twero pwonnye me bedo dano ma kite atir; bedo mere ka timo tim mogo ma pe tye atir i lobo pa dano ma cwinygi atir, kun pe neno dit pa Rwot.” Kibineko jo ma cwinygi pe atir-ri woko matwal i Nino me Ngolo Kop.—Icaya 65:20.

I agikki me Nino me Ngolo Kop, nongo dano dong ‘gikwo’ calo jo ma gipe ki roc. (Niyabo 20:5) Dano bidok cen i kit me kwo ma nongo roc pe iye i Nino me Ngolo Kop. (1 Jo Korint 15:24-28) Ci dong kare bibedo tye ma kibikelo atematema me agikki i kom dano. Kibigonyo Catan ci giwekke me temo dano pi tyen me agikki. (Niyabo 20:3, 7-10) Jo ma gibikwero en, aye dong gibinongo kuc kikome ma Baibul yam ociko pire ni: “Jo ma kitgi atir gibicamo lobo, dok gibibedo iye matwal.” (Jabuli 37:29) Adada, Nino me Ngolo Kop pud dong bibedo kare mamwonya pi dano ma kitgi atir ducu ya!


*  Pi ngec mukene ma mako lok i kom Armagedon, nen buk me Insight on the Scriptures, Volume 1, pot karatac 594-5, 1037-8, ki dul me 20 me Worship the Only True God, ma Lucaden pa Jehovah aye gucoyo.

← Nen dul ma lok man a ki iye