Cit atir i jami ma tye

Cit atir ka ma nyuto lok ma tye iye

LAMED NGEC

Kit ma Lanebi Daniel Otito pi Bino pa Meciya Con

Kit ma Lanebi Daniel Otito pi Bino pa Meciya Con

LANEBI Daniel okwo ma onongo pud odong mwaki makato 500 me nywalo Yecu. Kadi bed kit meno, Jehovah onyuto bot Daniel lok ma onongo bikonyo me ngeyo kare ma kibiwiro iye Yecu nyo kibicime macalo Meciya, nyo Kricito. Kitito ki Daniel ni: ‘Dok omyero inge dok ibed ki ngec matut ni nia ki i miyo lok me roco ki gedo Jerucalem odoco nio wa kom Meciya latela, bibedo cabit abiro, ki bene cabit pyerabicel wi aryo.’—Daniel 9:25.

Me ngeyo kare me bino pa Meciya, omyero kong wange ka ma kicako kwano iye kare me bino pa Meciya. Ma lubbe ki lok pa lanebi man, kwano kare man ocakke ‘ki i miyo lok me roco ki gedo Jerucalem odoco.’ En lok man me ‘miyo lok-ki’ otimme awene? Ki bot Nekemia ma bene obedo laco Baibul-li, kimiyo lok me gedo cel me rumo Jerucalem odoco “i mwaka me pyeraryo me loc pa kabaka Aritakcec.” (Nekemia 2:1, 5-8) Jo ma gingeyo lok me tekwaro gimoko ni i mwaka 474 K.M.P. aye Aritakcec onongo dong oloyo loc pi mwaka acel. Pi meno mwaka me pyeraryo me locce obedo i mwaka 455 K.M.P. Man aye mwaka ma omyero kicak kwano iye lok pa lanebi Daniel-li, i mwaka 455 K.M.P.

Daniel onyuto kare ma onongo bikato me o wa i bino pa “Latela Meciya.” Lok pa lanebi man waco ni ‘cabit abiro, ki bene cabit pyerabicel wiye aryo’—ma ducu ribbe doko cabit 69. Kare man lac ma rom mene? Pol pa Baibul ma kigonyo ginyuto ni magi pe gubedo cabit me nino abiro-ni keken, ento ni gubedo cabit ma gicung pi mwaki aye. Nyo tye ni, cabit acel cung pi mwaki abiro. Lakit tam man me keto mwaki abiro calo cabit acel-li, nyo me keto mwaki abiro calo dul acel-li onongo obedo gin ma ngene maber bot Lujudaya me kare macon. Me labolle, onongo gikwero mwaka me Cabit i nge mwaki abiro abiro. (Nia 23:10, 11) Pi meno, cabit 69 ma tye i lok pa lanebi-ni, gidoko mwaki 7 ma gitye i dul 69, nyo ka inyayogi ducu dong gidoko mwaki 483.

Kombeddi dong gin ma myero watim aye me timo curane. Ka wakwano mwaki 483 cakke ki i mwaka 455 K.M.P. ci kelowa wa i mwaka 29 K.M. Meno aye obedo mwaka ma kibatija iye Yecu kikome ci odoko Meciya!* (Luka 3:1, 2, 21, 22) Lok pa lanebi me Baibul man mono pe ocobbe i yo me aura mada?


*  Cakke ki i mwaka 455 K.M.P. me o wa mwaka 1 K.M.P. tye iye mwaki 454. Cakke ki i mwaka 1 K.M.P. me o wa i mwaka 1 K.M. tye iye mwaka acel (mwaka me jero peke). Dok cakke ki i mwaka 1 K.M.P. me o wa i mwaka 29 K.M. tye iye mwaki 28. Ka kiribo mwaki me kabedo adek-ki ducu ci miyowa mwaki 483. ‘Kikwanyo’ Yecu woko i kare ma kineke i mwaka 33 K.M., ma obedo i mwaka me cabit me 70. (Daniel 9:24, 26) Nen buk me Pay Attention to Daniel’s Prophecy! cura 11, ki Insight on the Scriptures, Volume 2, pot karatac 899-901. Gin aryo-ni ducu Lucaden pa Jehovah aye gugoyogi.

‘CABIT PYERABIRO’
Mwaki 490
Cabit 7
(Mwaki 49)
Cabit 62
(Mwaki 434)

←K.M.P. | K.M.→

Cabit 1
(Mwaki 7)
455

“Lok me roco Jerucalem”

Obwur me Jerusalem
406

Kigero Jerucalem odoco

Kigero Jerucalem
29

Meciya obino

Kitye ka batija Yecu
33

‘Kwanyo’ Meciya woko

Yecu oto
36

Agikki pa ‘cabit pyerabiro’

Lamony me Roma

← Nen dul ma lok man a ki iye