Cit atir i jami ma tye

Cit atir ka ma nyuto lok ma tye iye

Ododo me 98: I Wi Got Jeituni

Ododo me 98: I Wi Got Jeituni

MAN aye Yecu i wi got Jeituni. Co angwen ma en tye kwedgi-ni obedo lukwenane. Gin aye omego Anderiya gin ki Petero, ki bene omego Yakobo gin ki Jon. Ca ma ineno kuja-ni obedo ot pa Lubanga ma i Jerucalem.

Nino aryo dong okato cakke i kare ma Yecu odonyo kwede Jerucalem kun ngweco ki kana. Man Ceng Aryo. Odiko con i nino meno Yecu onongo tye i ot pa Lubanga. Ki kunnu lulam dog gutemo mako Yecu wek gineke. Ento gin gulworo timo man pien lwak onongo gimaro Yecu.

Yecu tye ka lok ki lukwenane

Yecu olwongo lutela dini meno ni: ‘Wun twol dok wun lutino pa twol!’ Ci Yecu owaco ni Lubanga bipwodogi pi jami maraco ma gin gutimo. I nge meno Yecu oito i wi Got Jeituni, ci lukwenane angwen magi gucako penye. In ingeyo gin ma gitye ka penyo iye Yecu?

Lukwena gitye ka penyo pi jami ma i anyim. Gin gingeyo ni Yecu bigiko jami maraco woko ki i wi lobo. Ento gin gimito ngeyo awene ma jami magi bitimme iye. Awene mono ma Yecu bidwogo ka loc macalo Kabaka?

Yecu ongeyo ni lupwonnyene i lobo pe gibitwero nenne ka edwogo doki. Tye kit man pien en bibedo i polo, dok gin pe gibiromo nenne ki kunnu. Pi meno Yecu otito bot lukwenane jami mogo ma bitimme i lobo i kare ma etye ka loc macalo Kabaka i polo. Kit jami ango magi?

Yecu owaco ni lweny madongo bibedo tye, two ki kec bimako dano mapol, turo cik bibedo madwong, ki oyengyeng madongo biyengo piny. Yecu bene owaco ni kwena maber me ker pa Lubanga gibitito i wi lobo ducu. Dong waneno jami magi tye ka timme i karewa-ni? Ee! Pi meno watwero ngeyo labongo akalakala ni Yecu dong tye ka loc i polo kombeddi. Cokcok-ki en bigiko tim maraco ducu ki i wi lobo.

Matayo 21:46; 23:1-39; 24:1-14; Marako 13:3-10.



Peny

  • I cal-li, laco mene ma en aye Yecu ni, dok anga-gi ma gitye bote ni?
  • Gin ango ma ludito dini gutemo timo i kom Yecu ki ot pa Lubanga, dok gin ango ma en owaco botgi?
  • Gin ango ma lukwena gupenyo iye Yecu?
  • Pingo Yecu otito pi jammi ma bibedo ka timme i lobo i kare ma nongo en tye ka loc calo Kabaka i polo?
  • Ngo ma Yecu owaco ni bitimme ma nongo peya ekelo agikki me jammi maraco ma i lobo-ni?

Peny mukene

  • Kwan Matayo 23:1-39.

    Kadi bed Ginacoya onyuto ni tic ki nying me dog tic romo bedo kakare, gin ango ma lok pa Yecu ma i Matayo 23:8-11 nyuto ma dok i kom tic ki nying me dog tic ma kelo awaka i kacokke pa Lukricitayo? (Tic 26:25; Rom. 13:7; 1 Pet. 2:13, 14)

    Ngo ma Luparicayo gubedo ka tic kwede me juko dano pe me doko Lukricitayo, dok ludito dini gitiyo ki ryeko meno i kare man nining? (Mat. 23:13; Luka 11:52; Jon 9:22; 12:42; 1 Tec. 2:16)

  • Kwan Matayo 24:1-14.

    Ginyuto pi tek pa kanyo peko i Matayo 24:13 nining?

    Kop man ni "agikki” ma tye i Matayo 24:13 gonye ningo? (Mat. 16:27; Rom. 14:10-12; 2 Kor. 5:10)

  • Kwan Marako 13:3-10.

    Kop mene ma tye i Marako 13:10 ma nyuto ni tito lok me kwena maber-ri mitte me oyot, dok lok ma Yecu owaco-ni gudowa nining? (Rom. 13:11, 12; 1 Kor. 7:29-31; 2 Tem. 4:2)