Cit atir i jami ma tye

Cit atir ka ma nyuto lok ma tye iye

Ododo me 95: Kit ma Yecu Pwonyo Kwede

Ododo me 95: Kit ma Yecu Pwonyo Kwede

ININO mo acel Yecu owaco bot laco mo ni en myero omar lawote. Laco-ni openyo Yecu ni: ‘Lawota en aye anga?’ Ada, Yecu ngeyo ngo ma laco man tye ka tamone. Laco-ni tamo ni jo me dinine ki jo me rokke aye luwote. Pi meno wanenu kong gin ma Yecu owaco bote.

Kare mukene Yecu pwonyo kun tiyo ki ododo. Man aye gin ma en otimo kombeddi. En oboko ododo i kom Lajudaya gin ki Lacamaria. Wan dong watyeko kwano woko ni pol Lujudaya pe gimaro Lucamaria. Dong ba, ododo pa Yecu-ni owoto kit man:

I nino mo acel Lajudaya mo onongo omako gudo ma kato ki i kin got cito piny tung Jeriko. Ento luyak gupye i kome atura. Gin gukwanyo centene ci gupwode nio ma onongo dong cok to.

Lacen, Lajudaya mo ma lalam dog bene olubo gudo meno. En oneno laco ma gipwodo-ni. In itamo ni en otimo gin ango? Ai, en okato mere akata ki i nget yo tung mukene-ni ci omedde ki wot. Ngat mukene dok ma ladini adada obino. En obedo Lalevi. En mono ocung? Pe, en bene pe ocung ka konyo laco ma gipwodo-ni. Itwero neno lalamdog gin ki Lalevi-ni kuca ca ka gitye ka wot i gudo.

Ento nen ngat ma tye kany gin ki laco ma gipwodo-ni. En Lacamaria. Dok en tye ka konyo Lajudaya-ni. En tye ka keto yat mogo i wang rette. I ngeye, en otero Lajudaya-ni ka ma en twero yweyo iye ci winyo maber ber.

Lacamaria tye ka konyo Lajudaya ma gipwodo-ni

I nge tyeko ododone, Yecu owaco bot laco ma openye lapeny ni: ‘Anga i kin jo adek-ki ma itamo ni otiyo macalo lawot dano ma gipwodo-ni? Obedo lalamdog mono, Lalevi nyo Lacamaria?’

Laco-ni ogamo ni: ‘Laco ma Lacamaria-ni. En otimo kica i kom laco ma onongo gipwodo-ni.’

Yecu owaco ni: ‘Igamo kakare. Pi meno cit bene itim kit ma en otimo-ni bot jo mukene.’

In pe imaro kit ma Yecu pwonyo kwede? Wapwonyo jami mapol, dok ma pigi tego adada, ka wawinyo gin ma Yecu waco i Baibul, pe kumeno?

Luka 10:25-37.



Peny

  • Peny ango ma laco mo openyo kwede Yecu, dok pingo?
  • Ngo ma kare mukene Yecu otiyo kwede me pwony, dok gin ango ma dong watyeko ngeyo i kom Lujudaya ki jo Camaria?
  • Ki i ododo ma Yecu otito, gin ango ma otimme i kom Lajudaya mo ma onongo tye ka wot i yo ma cito i Jeriko?
  • Ngo ma otimme i kare ma Lajudaya mo ma lalamdog ki mo ma Lalevi gulubo yo meno?
  • I cal-li, anga ma tye ka konyo Lajudaya ma giwano ni?
  • I kare ma Yecu otyeko ododo meno, peny ango ma en openyo, dok laco-ni odokke iye ningo?

Peny mukene

  • Kwan Luka 10:25-37.

    Me kaka miyo lagam meno atir, Yecu okonyo laco ma onongo tye ki ngec matut i kom Cik-ki me tam i kom lok meno nining? (Luka 10:26; Mat. 16:13-16)

    Yecu otiyo ki labol me ruco adegadega ma jo ma onongo giwinye tye kwede nining? (Luka 10:36, 37; 18:9-14; Tito 1:9)