Cit atir i jami ma tye

Cit atir ka ma nyuto lok ma tye iye

Ododo me 88: Jon Obatija Yecu

Ododo me 88: Jon Obatija Yecu

NEN amam ma tye ka pye i wi laco-ni. Laco-ni aye Yecu. En kombeddi dong tye ki mwaka me ditte cokcok 30. Dok laco ma gitye kwede-ni aye Jon. Wan dong wakwano lok i kome woko. Wi twero po i kare ma Maliam ocito ka limo watte Elicabet, ci latin otingnge ki i iye ki yomcwiny? Latin ca ma onongo peya kinywalo-ni aye Jon. Ento gin ango ma Jon gin ki Yecu gitye ka timone kombeddi?

Yecu i cawa ma onongo batija

Jon pud otyeko luto Yecu aluta i pii me Kulu Jordan. Man aye kit ma kibatija kwede dano. Mukwongo, kilute i te pii, ka dok kikele woko. Pien man aye gin ma Jon timo i kom dano, kilwonge ni Jon Labatija. Ento pingo Jon obatija Yecu?

Ada, Jon otimo man pien Yecu obino ci owaco ki Jon ni obatija en. Jon batija jo ma gimito nyuto ni gingut pi jami maraco ma yam gitimo. Ento Yecu mono yam otimo gin mo marac ma myero ongut iye? Pe, Yecu peya otimo kit bal mo, pien en obedo Wod pa Lubanga kikome ma oa ki i polo. Pi meno en owaco ki Jon ni obatija en pi tyen lok mukene. Kong wanenu ngo ma tyen lokke obedo.

Ma peya Yecu obino kany bot Jon, onongo en lapac. Lapac aye ngat ma yubo jami ki i kom bao, jami calo meja ki kom. Yucepu cwar Maliam onongo obedo lapac, ci en opwonyo Yecu me bedo lapac bene. Ento Jehovah pe ocwalo Wode i lobo me bedo lapac. En tye ki tic ma dok pat pire ma myero en otim, dok kare dong oromo woko pi Yecu me cako timone. Pi meno me nyuto ni en kombeddi dong ebino me timo gin ma Wone mito, Yecu owaco ki Jon ni obatija en. Man mono oyomo cwiny Lubanga?

Ada, oyomo cwinye, pien, i kare ma Yecu okatti ki i pii, dwan ma oa ki i polo owaco ni: ‘Man aye Woda, ma cwinya yom i kome.’ Dok bene, nen ni polo oyabbe ci amam man olor obino piny i wi Yecu. Ento pe amam kikome. Onongo cal kwede acala aye. Man gire cwiny maleng pa Lubanga.

Kombeddi dong Yecu tye ki lok mapol me atama, pi meno en ocito woko i kabedo mo kaikene pi nino 40. Ki kunnu Catan obino bote. Catan otemo tyen adek wek Yecu otur cik pa Lubanga. Ento Yecu pe omedo ki turone.

I nge meno, Yecu odwogo ci orwatte ki jo mogo ma gudoko lulub kore mukwongo, nyo lupwonnyene. Nyingi mukene aye Anderiya, Petero, (bene kilwongo ni Cimon), Pilipo ki Natanael (bene kilwongo ni Bartolomayo). Yecu kacel ki lupwonnye manyen magi gua gucito i distrik me Galilaya. I Galilaya gin guo Kana boma pa Natanael. Ki kunnu Yecu ocito i karama mo madit me nyom, ci otimo iye tangone mukwongo. In ingeyo gin ma en otimo? En oloko pii odoko kongo vino.

Matayo 3:13-17; 4:1-11; 13:55; Marako 6:3; Jon 1:29-51; 2:1-12.



Peny

  • Co aryo mene ma tye i cal-li?
  • Dano gibatija nining?
  • Jon onongo pol kare batija nga-gi?
  • Pi tyen lok ango ma dok pat ma omiyo Yecu openyo iye Jon me miye batija?
  • Lubanga onyuto ni En cwinye yom ni Yecu onongo batija nining?
  • Ngo ma otimme i kare ma Yecu ocito i kabedo mo kene pi nino 40?
  • Anga-gi ma gubedo lulub nyo lukwena pa Yecu mukwongo, dok tango-ne mukwongo obedo ngo?

Peny mukene

  • Kwan Matayo 3:13-17.

    Ngo ma Yecu oweko me aluba madok i kom miyo batija ki lukwena-ne? (Jab. 40:7, 8; Mat. 28:19, 20; Luka 3:21, 22)

  • Kwan Matayo 4:1-11.

    Ryeko pa Yecu me tic ki Ginacoya cuko cwinywa me kwano Baibul kare ducu nining? (Mat. 4:5-7; 2 Pet. 3:17, 18; 1 Jon 4:1)

  • Kwan Jon 1:29-51.

    Jon Labatija ocwalo lukwena-ne bot anga, dok watwero poro en i kare man nining? (Jon 1:29, 35, 36; 3:30; Mat. 23:10)

  • Kwan Jon 2:1-12.

    Tango pa Yecu mukwongo nyuto ni Jehovah pe kano gin mo maber ki bot Luticce nining? (Jon 2:9, 10; Jab. 84:11; Yak. 1:17)