Cit atir i jami ma tye

Cit atir ka ma nyuto lok ma tye iye

Ododo me 115: Paradic Manyen i Lobo

Ododo me 115: Paradic Manyen i Lobo

NEN kong yadi maboco, ature mabeco kacel ki godi maboco magi. Kany pe mwonya tutwal? Nen kit ma latin ruda tye ka cam kwede ki i cing latin awobi matidi-ni. Nen kong bene labwor ki aguragura ma gucung i dye poto kuca. Pe imaro kwo i ot ma tye i kabedo macalo man?

Lubanga mito ni ikwo nakanaka i paradic i wi lobo. Dok en pe mito ni ibed ki kit kaane kom mo kadi ki arem ma miyo dano deno can i kare-ni. Man aye kit ma Baibul ciko kwede pi jo ma bikwo i paradic manyen-ni: ‘Lubanga bibedo kwedgi. To nyo koko nyo arem mo dong bibedo pe. Jami macon dong okato woko.’

Yecu bineno ni alokaloka man mamwonya-ni otimme. In ingeyo awene? Ada, ka en dong otyeko gin maraco kacel ki jo maraco woko ki i lobo. Po ni, i kare ma Yecu onongo tye i lobo en ocango kit two mapatpat ki i kom dano, dok ocero kadi wa dano ki i to. Yecu otimo man me nyuto gin ma ebitimo i wi lobo ducu ka edoko Kabaka me ker pa Lubanga.

Tam kong kit ma kwo bibedo ma mit kwede i paradic manyen i lobo! Yecu, kacel ki jo mogo ma en oyero, biloc i polo. Luloc magi gibigwoko ngat acel acel ma i wi lobo dok gibineno ni gubedo ki yomcwiny. Wanenu kong gin ma myero watim ma weko wageno ada ni Lubanga bimiyo botwa kwo ma pe tum i paradicce manyen.

Niyabo 21:3, 4; 5:9, 10; 14:1-3.

Kit ma paradic binen kwede


Peny

  • Kit kwo ma nining ma Baibul onyuto ni wabilimo-ne i Paradic i lobo?
  • Cikke pa Baibul tye ningo pi jo ma bibedo i Paradic?
  • Awene ma Yecu bineno ni kit alokaloka mamwonya man omyero otimme iye?
  • I kare ma Yecu tye i lobo, gin ango ma en otimo me nyuto ngo ma en bitimmo macalo Kabaka me Ker pa Lubanga?
  • Gin ango ma wi Yecu ki luker luwote ma i polo pe biwil iye ka gitye ka loc?

Peny mukene

  • Kwan Niyabo 5:9, 10.

    Pingo watwero bedo labongo akalakala ni jo ma gibibedo luloc lobo pi me Mwaka Alip Acel gibiparo piwa dok bene gibibedo lulam dog ma lukica? (Ep. 4:20-24; 1 Pet. 1:7; 3:8; 5:6-10)

  • Kwan Niyabo 14:1-3.

    Coyo nying Won ki nying Latin romo i tur nyim jo 144,000 nyuto ngo? (1 Kor. 3:23; 2 Tem. 2:19; Yabo. 3:12)