Cit atir i jami ma tye

Cit atir ka ma nyuto lok ma tye iye

Ododo me 110: Temceo—Lakony Kor Paulo Manyen

Ododo me 110: Temceo—Lakony Kor Paulo Manyen

AWOBI ma i neno kany gin ki lakwena Paulo ni aye Temceo. Temceo bedo kacel ki jo ode i Licitra. Minne nyinge Yuneki ki dane Loi.

Man aye tyen me adek-ke ma Paulo olimo kwede Licitra. Cokcok mwaka acel nyo makato i ngec, Paulo gin ki Barnaba kong gubino kany i wot me pwony. Dok kombeddi Paulo doki odwogo gin ki lareme Cira.

Temceo ki Paulo

In ingeyo gin ma Paulo tye ka wacone bot Temceo? En tye ka penyo ni: ‘In imito ribbe kacel kwedwa wan ki Cira? Watwero tic kwedi me pwonyo jo ma i kabedo maboco.’

Temceo ogamo ni: ‘Ee, an amito wot.’ Pi meno i ngeye cutcut Temceo oweko jo me ode ci ocito kacel ki Paulo gin ki Cira. Ento ma peya wakwano lok i kom wotgi, wanenu kong gin ma obedo ka timme i kom Paulo. Mwaka dong okato 17 cakke ma Yecu onyutte bote i gudo ma cito Damaciko.

Po ni, Paulo obino Damaciko ka wano lupwonnye pa Yecu, ento kombeddi en kikome dong odoko lapwonnye! Lacen lukwor mogo gupiro tam me neko Paulo pien pe gimaro pwonnye i kom Yecu. Ento lupwonnye gukonyo Paulo me lwi woko. Guluto en i aduku ci gukete piny i nge cel.

Lacen Paulo ocito Antiokia ka pwony. Kany aye kikwongo lwongo iye lulub kor Yecu ni Lukricitayo. Kicwalo Paulo gin ki Barnaba ki Antiokia dong me wot ka pwony i lobe ma tye ka maboco. I kin boma acel ma gin gulimo aye Licitra, paco pa Temceo.

Kombeddi, cokcok i nge mwaka acel, Paulo dok odok cen i Licitra i wotte me tyen aryo. I kare ma Temceo gua gin ki Paulo kacel ki Cira, ingeyo ka ma gucito iye? Nen cal lobo-ni, wek inge kabedo mogo.

Mukwongo, gin gucito Ikonio ma tye cok-ki, ka i ngeye gucito i boma me aryone ma nyinge Antiokia. I nge meno guwoto wa Teroa, ka i ngeye guwoto Pilipi, Tecalonika, ki Berea. Itye ka neno Atene i cal-li? Paulo opwonyo kunnu. I nge meno gin gubedo ka pwony i Korint pi mwaka acel ki nucu. I agikkine gubedo manok i Epeco. Ci gudwogo cen i Cecaria ki yeya, ka dong guwoto Antiokia, ka ma Paulo bedo iye.

Pi meno Temceo owoto mairo mia ki mia me konyo Paulo ki tito lok me “kwena maber” dok ki cako lwak kacokke mapol pa Lukricitayo. Ka idoko ditdit, in ibibedo latic pa Lubanga ma lagen calo Temceo?

Tic pa Lukwena 9:19-30; 11:19-26; cura 13 nio wa i 17; 18:1-22.

Mep

1. Roma; 2. Molta; 3. Berea; 4. Tecalonika; 5. Korint; 6. Pilipi; 7. Atene; 8. Kurete; 9. Teroa; 10. Epeco; 11. Mileto; 12. Kolocai; 13. Antiokia; 14. Ikonio; 15. Licitra; 16. Caiprac; 17. Antiokia; 18. Cecaria; 19. Jopa; 20. Damaciko; 21. Jerucalem; 22. Nam Madit (Mediterranean)



Peny

  • Awobi ma tye i cal-li en anga, en bedo kwene, dok nying minne ki daa-ne anga?
  • Gin ango ma Temceo owaco i kare ma Paulo openye ka mito wot kwede gin ki Cira pi pwonyo dano i bor piny?
  • Ka kwene ma gikwongo lwongo iye lulub kor Yecu ni Lukricitayo?
  • I kare ma Paulo gin ki Barnaba guweko Antiokia, boma mene ma dok gulimo?
  • Temceo okonyo Paulo nining, dok peny ango ma myero jo matino gupenye kwede ken-gi i kare man?

Peny mukene

  • Kwan Tic pa Lukwena 9:19-30.

    Paulo onyuto kwiri ka en orwatte ki adegadega i pwonyo kwena maber nining? (Tic 9:22-25, 29, 30; Mat. 10:16)

  • Kwan Tic pa Lukwena 11:19-26.

    Lok ma gicoyo i Tic pa Lukwena 11:19-21, 26 nyuto ni cwiny pa Jehovah tye ka telo tic me pwony man nining?

  • Kwan Tic pa Lukwena 13:13-16, 42-52

    Tic pa Lukwena 13:51, 52 nyuto nining ni lukwena pe guweko adegadega obalo cwinygi? (Mat. 10:14; Tic 18:6; 1 Pet. 4:14)

  • Kwan Tic pa Lukwena 14:1-6, 19-28.

    Kop man ni ‘gumiyo gi i cing Jehovah ma yam guye-ni’ konyowa nining me bedo agonya ki i par mapol ka watye ka konyo jo manyen? (Tic 14:21-23; 20:32; Jon 6:44)

  • Kwan Tic pa Lukwena 16:1-5.

    Miti ma Temceo obedo kwede me ye lire onyuto ni pire tek me ‘timo gin ducu pi kop me kwena maber’ nining? (Tic 16:3; 1 Kor. 9:23; 1 Tec. 2:8)

  • Kwan Tic pa Lukwena 18:1-11, 18-22.

    Gin ango ma Tic pa Lukwena 18:9, 10 onyuto ma make i kom donyo pa Yecu kikome i tiro tic man me pwony-nyi, dok man miyo wabedo ki tek cwiny ango i kare man? (Mat. 28:20)