Cit atir i jami ma tye

Cit atir ka ma nyuto lok ma tye iye

Ododo me 106: Kigonyogi Woko ki i Mabuc

Ododo me 106: Kigonyogi Woko ki i Mabuc

NEN kong lamalaika kany ka tye ka yabo doggola mabuc-ci. Jo ma en tye ka gonyogi-ni gubedo lukwena pa Yecu. Wanenu kong gin mumiyo giketogi i mabuc.

Lamaliaka tye ka gonyo lukwena

Onongo pud okato kare manok keken cakke ma gionyo cwiny maleng i kom lupwonnye pa Yecu. Dok man aye gin ma otimme: I dyeceng mo acel Petero gin ki Jon gitye ka cito i ot pa Lubanga i Jerucalem. Kunnu, i nget doggola, onongo tye iye laco mo ma obedo laput pi kare me kwone ducu. Dano onongo gitinge ci gikele kany nino ducu wek en okwa cente ki bot jo ma gicito i ot pa Lubanga. Ka en oneno Petero gin ki Jon, en okwayogi ni gumiye gin mo. Lukwena-ni gibitimo ngo?

Gin gucung ci guciko wanggi i kom laco ma lacan-ni. Petero owaco ni: ‘Pe atye ki cente. Ento abimii gin ma atye kwede. I nying Yecu, a malo iwoti!’ Petero dong omako laco-ni ki cinge acuc, ci en otugi pye malo cut ci ocako wot. Kare ma lwak guneno man, guuro dok cwinygi obedo yom mada pi tango man me aura-ni.

Petero owaco ni: ‘Pi teko pa Lubanga, ma ocero Yecu ki i to, aye oweko watimo tango man.’ Ka en gin ki Jon gitye ka lok, lutela mogo me dini gubino. Akemo omakogi pien Petero gin ki Jon gitye ka tito bot lwak pi cer pa Yecu ki i to. Pi meno gumakogi ci guketogi i mabuc.

I nino ma lubo meno lutela dini gubedo ki cokke madit. Petero gin ki Jon kacel ki laco ma gin gucango-ni, gikelogi iye. Lutela dini-ni gupenyo ni: ‘Wutimo tango man ki teko ango?’

Petero owaco botgi ni gitimo pi teko pa Lubanga, ma ocero Yecu ki i lyel-li. Lulam dog magi pe gingeyo gin me atima, pien pe gitwero kwero ni tango man me aura-ni otimme ada. Pi meno gin guciko lukwena matek pe me lok i kom Yecu doki, ci guweko gin gucito.

Ka nino woto ki kato lukwena gumedde ameda ki tito lok i kom Yecu ki cango lutwo. Lok i kom tango magi oket omedde. Pi meno kadi wa lwak dano ma i boma ma orumo Jerucalem gukelo jo ma komgi lit bot lukwena me acanga. Man omiyo nyeko omako lutela dini, ci gin gumako lukwena guketogi i mabuc. Ento gin pe gubedo kunnu pi kare malac.

I dyewor lamalaika pa Lubanga oyabo doggola ot mabuc woko, kit ma itwero nenone kany-nyi. Lamalaika-ni owaco ni: ‘Citu ci wucung i ot pa Lubanga, dok wumedde ki lok bot lwak.’ Orwone odiko, ka lutela dini gucwalo dano me omo lukwena ki i mabuc, gin onongo gipe. Lacen co magi gunongogi i ot pa Lubanga ci gudwokogi cen i Sanedrin.

Lutela dini guwaco ni: ‘Wamiyo botwu cik matek pe me medde ki pwonyo lok i kom Yecu. Ento wun dong opongo Jerucalem woko ki pwonywu.’ Ci Lukwena gugamo ni: ‘Myero wawiny Lubanga macalo laloc makato dano.’ Pi meno gumedde ameda ki pwonyo “kwena maber.” Meno pe lanen maber tutwal piwa me aluba?

Tic pa Lukwena cura 3 nio wa i 5.



Peny

  • Gin ango ma otimme bot Petero ki Jon i dye ceng mo ma onongo gitye ka cito i ot pa Lubanga?
  • Gin ango ma Petero owaco bot laco mo ma langolo, dok gin ango ma Petero omiye ma pire dok tek loyo wa cente?
  • Pingo ludito dini gukeco, dok gin ango ma gutimo i kom Petero ki Jon?
  • Gin ango ma Petero owaco bot ludito dini meno, dok kiciko-gi i kom ngo?
  • Pingo ludito dini-nu gubedo ki nyeko, ento ngo ma otimme i kare ma guloyo lukwena i buc tyen me aryo?
  • Lukwena gumiyo lagam ango i kare ma gikelogi i ot me Canedrin?

Peny mukene

  • Kwan Tic pa Lukwena 3:1-10.

    Kadi bed ni wa pe ki teko me timo tango i kare man, lok pa Petero ma gicoyo i Tic pa lukwena 3:6 konyowa me bedo ki pwoc i kom kwena me kerri nining? (Jon 17:3; 2 Kor. 5:18-20; Pil. 3:8)

  • Kwan Tic pa Lukwena 4:1-31.

    Ka warwatte ki adegadega i tic me pwony-nyi, i yo ma nining ma myero wapor kwede omegiwa ma Lukricitayo me centwari me acel? (Tic 4:29, 31; Ep. 6:18-20; 1 Tec. 2:2)

  • Kwan Tic pa Lukwena 5:17-42.

    Jo mukene ma pe gubedo Lucaden me kare mukato ki me kare man, gunyuto niang maber i lok ma make ki tic me pwony nining? (Tic 5:34-39)