Cit atir i jami ma tye

Cit atir ka ma nyuto lok ma tye iye

Ododo me 69: Anyaka Okonyo Oteka

Ododo me 69: Anyaka Okonyo Oteka

IN INGEYO gin ma latin anyaka-ni tye ka wacone? En tye ka tito bot dako-ni pi lanebi Elica kacel ki pi jami me aura ma Jehovah konye me timo. Dako-ni pe ngeyo lok i kom Jehovah pien pe obedo Laicrael. Wanenu kong dong gin mumiyo anyaka-ni tye i paco pa dako-ni.

Dako-ni obedo Laciria. Cware aye Naaman, lawimony me Ciria. Jo Ciria onongo gumako latin anyaka me Icrael man, dok kikelo en me bedo latic pa dako pa Naaman.

Dako pa Naaman ki anyaka ma laticce

Naaman onongo tye ki two mo marac ma kilwongo ni dobo. Two man bene twero miyo dul ringo mogo ma i kom dano poto woko. Pi meno, man aye gin ma anyaka-ni tye ka titone bot dako pa Naaman: ‘Kono nene rwoda twero cito bot lanebi pa Jehovah i Icrael. En onongo cango dobone woko.’ Lacen kitito man bot cwar dako-ni.

Naaman onongo mito cang tutwal; pi meno en otamo me ocito i Icrael. Ka en oo kunnu, en ocito ka ma ot pa Elica tye iye. Elica omiyo laticce okato woko ci owaco bot Naaman ni ocit olwokke i Kulu Jordan tyen abiro. Man omiyo kiniga omako Naaman adada, ci owaco ni: ‘Kulu ma paco kuja gibeco loyo kulu mo keken i Icrael!’ I nge waco man, Naaman oa ocito woko.

Ento ngat acel i kin luticce owaco bote ni: ‘Ladit, ka onongo Elica owaco boti ni itim gin mo matek, in onongo kono itimo woko. Man pingo kono dong pe ilwokke, kit ma en owaco-ni?’ Naaman owinyo dwan laticce ci ocito olutte i Kulu Jordan tyen abiro. I kare ma en otimo, ringo kome odwogo kakare ci kome odok yot!

Cwiny Naaman yom adada. En odok bot Elica ci owacce ni: ‘An dong angeyo ni Lubanga ma i Icrael-li aye Lubanga me ada i wi lobo ducu. Pi meno, tim ber, gam mot man ki bota.’ Ento Elica ogamo ni: ‘Pe, pe abigamone.’ Elica ngeyo ni onongo bedo rac pi en me gamo mot-ti pien Jehovah aye gire ocango Naaman. Ento Gikaji latic pa Elica onongo mito mot-ti me bedo mere.

Man aye gin ma Gikaji otimo. I nge a pa Naaman, Gikaji oringo i kore me nonge i yo. Gikaji owaco ni: ‘Elica ocwala me titti ni emito motti-ni mogo pi lureme ma pud gubino abina ka limo.’ Man, ngene gire angeya, obedo goba. Ento Naaman pe ngeyo ni obedo goba; pi meno en omiyo jami-ni mogo bot Gikaji.

I kare ma Gikaji odok cen paco, Elica onongo dong ngeyo gin ma en otimo. Jehovah owacce woko. Pi meno en owaco ni: ‘Pien in itimo gin man marac-ci, dobo pa Naaman bidok i komi.’ Cutcut, otugi timme woko!

Watwero pwonyo ngo ki i lok man ducu? Me acel, tye ni omyero wabed calo latin anyaka-ni wek watit lok i kom Jehovah. Twero konyo tutwal. Me aryone, pe omyero wawakke calo kit ma Naaman kong okwongo bedo kwede, ento omyero wawiny lutic pa Lubanga. Ki me adekke, pe omyero walok goba calo Gikaji. Pe watwero pwonyo jami mapol tutwal ka wakwano Baibul?

2 Luker 5:1-27.



Peny

  • I cal-li, gin ango ma latin nyako-ni tye ka waco-ne ki dako-ni?
  • Dako ma tye i cal-li anga, dok latin nyako-ni tye ka timo ngo i ot pa dako ni?
  • Ngo ma Elica otito bot laticce me waco ki Naaman, dok pingo kiniga omako Naaman?
  • Ngo ma otimme i kare ma Naaman owinyo lok pa luticce?
  • Pingo Elica okwero mic pa Naaman, ento Gikaji otimo ngo?
  • Ngo ma otimme i kom Gikaji, dok gin ango ma watwero pwonyo ki i lok man?

Peny mukene

  • Kwan 2 Luker 5:1-27.

    Lanen ma latin anyaka me Icrael oweko-ni jingo cwiny jo matino me kare-ni nining? (2 Luker 5:3; Jab. 8:2; 148:12, 13)

    Pingo bedo ber me gwoko lanen pa Naaman i cwinywa ka wanongo pwony pi balwa ki i Ginacoya? (2 Luker 5:15; Ibru 12:5, 6; Yak. 4:6)

    Pwony ango ma watwero nongo-ne ka waporo lanen pa Elica gin ki Gikaji? (2 Luker 5:9, 10, 14-16, 20; Mat. 10:8; Tic 5:1-5; 2 Kor. 2:17)