Cit atir i jami ma tye

Cit atir ka ma nyuto lok ma tye iye

Ododo me 66: Jejebel—Daker ma Kite Rac

Ododo me 66: Jejebel—Daker ma Kite Rac

INGE to pa Jeroboam, kabaka mo keken ma dong loyo ker me kaka 10 me Icrael ma kumalo-ni onongo kite rac. Kabaka Akab aye dong kabaka ma kite rac loyo ducu. In ingeyo pingo? Tyen lok acel madit aye dakone, Jejebel Daker ma kite rac.

Jejebel pe obedo dako me Icrael. En obedo nya pa kabaka me Cidon. En woro Baal lubanga me goba, dok en omiyo Akab ki jo Icrael mapol giworo Baal bene. Jejebel dag Jehovah dok neko lunebine mapol bene. Mukene omyero gukanne i boro wek pe kinekgi. Ka Jejebel mito gin moni, en twero neko wa dano me nongone.

I nino mo acel Kabaka Akab onongo cwinye pe yom. Pi meno Jejebel openyo en ni: ‘Pingo tin cwinyi pe yom?’

Akab ogamo ni: ‘Pi gin ma Nabot owaco bota. Onongo amito wilo poto olokke. Ento en owaco bota ni pe twero bedo mera.’

Jejebel owacce ni: ‘Pe ipar. An aye abiweko doko meri.’

Pi meno Jejebel ocoyo waraga bot ludito mogo i boma ka ma Nabot bedo iye. En owaco botgi ni: ‘Wunong co mogo ma wigi pe tiyo wek guwac ni Nabot oyeto Lubanga ki kabaka. Ci wuter Nabot woko i nge boma ci wucel ki gweng wunek woko.’

Cutcut i kare ma Jejebel owinyo ni Nabot oto, en owaco bot Akab ni: ‘Kombeddi cit dong ikwany poto olokke.’ In pe iye ni omyero kipwod Jejebel pi timo gin marac kumeno?

Daker Jejebel

Pi meno, lacen, Jehovah ocwalo laco mo ma nyinge Yeko me pwodo en. Ka Jejebel owinyo ni Yeko tye ka bino, en owiro teng wange woko dok otemo yubbe wek enen maber. Ento i kare ma Yeko obino ci oneno Jejebel i wang dirica, en owaco bot co ma gitye i ot pa kabaka ni: ‘Bolle wunu piny!’ Co-ni guye, kit ma ineno kwede i cal-li. Gubole piny, ci en oto woko. Man aye agikki pa Daker Jejebel ma kite rac-ci.

1 Luker 16:29-33; 18:1-4; 21:1-16; 2 Luker 9:30-37.



Peny

  • Jejebel obedo anga?
  • Pingo Kabaka Akab obedo ki cwercwiny nino mo acel
  • Ngo ma Jejebel otimo me wek elok poto olok pa Nabot odok pa cware, Akab?
  • Anga ma Jehovah ocwalo me pwodo Jejebel?
  • Kit ma itye ka neno i cal-li, ngo ma otimme i kare ma Yeko oo i gang kal pa Jejebel?

Peny mukene

  • Kwan 1 Luker 16:29-33 ki 18:3, 4.

    Piny obedo marac ma romene i Icrael i kare pa Kabaka Akab? (1 Luker 14:9)

  • Kwan 1 Luker 21:1-16.

    Nabot onyuto tekcwiny ki mwolo bot Jehovah nining? (1 Luker 21:1-3; Levi. 25:23-28)

    Ki i lanen pa Akab-ni, ngo ma watwero pwonyo i kom diyo cwiny ka gin mo pe ocobbe kit ma onongo wamito? (1 Luker 21:4; Rom. 5:3-5)

  • Kwan 2 Luker 9:30-37.

    Gin ango ma watwero pwonyo ki i mit kom Yeko i timo miti pa Lubanga? (2 Luker 9:4-10; 2 Kor. 9:1, 2; 2 Tem. 4:2)