Cit atir i jami ma tye

Cit atir ka ma nyuto lok ma tye iye

Ododo me 51: Ruth gin ki Naomi

Ododo me 51: Ruth gin ki Naomi

IBINONGO buk ma kilwongo ni Ruth i Baibul. Man aye gin ma otimme i kom jo me ot mo ma gukwo i kare ma Icrael onongo tiyo ki lungolkop macalo luloc. Ruth obedo dako mo matidi me lobo Moab; en pe obedo dano me lobo Icrael. Ento i kare ma Ruth ongeyo lok i kom Lubanga me ada Jehovah, en omare tutwal. Naomi aye dako muteggi ma okonyo Ruth me ngeyo Jehovah.

Naomi obedo dako me Icrael. En gin ki cware kacel ki awobene aryo gudak gucito i lobo Moab i kare mo ma cam onongo tye manok adada i Icrael. I nino mo acel cwar Naomi oto woko. Lacen awobe pa Naomi gunyomo anyira me Moab aryo ma nyinggi Ruth ki Orupa. Ento cokcok i nge mwaka 10, awobe pa Naomi aryo-ni guto woko. Naomi ki anyira aryo-ni cwinygi oton adada! Naomi dong romo timo ngo kombeddi?

I nino mo acel Naomi omoko tamme woko me cako wot mabor me dok cen paco bot jone. Ruth gin ki Orupa gimito bedo kacel ki Naomi, pi meno gin bene gua me cito kwede. Ento ka guwoto i gudo manok, Naomi olokke bot anyira-ni ci owaco ni: ‘Doku cen paco wubed bot megiwu.’

Naomi onoto lem anyira-ni me cikogi ni dong gudong maber. Ka kenyo gin gutugi cako koko, pien onongo gimaro Naomi tutwal. Guwaco ni: ‘Pe! Wan wabicito kwedi bot jo tuwu.’ Ento Naomi ogamo ni: ‘Omyero wudok cen, anyirana. Bibedo ber ka wutye paco.’ Pi meno Orupa ocako gire dok cen paco. Ento Ruth pe ocito.

Naomi olokke bote ci owaco ni: ‘Orupa dong ocito woko. In bene dok paco wun kwede.’ Ento Ruth ogamo ni: ‘Pe item ni wek aweki! Wek acit kacel kwedi. Ka ma icito iye an bene abicito iye, ka ma i kwo iye an bene abikwo iye. Joni bibedo jona, ki Lubangani bibedo Lubangana. Ka ma ito iye an bene abito iye, dok meno aye ka ma kibiyika iye.’ I kare ma Ruth owaco lok man, Naomi pe dok otemo diye me dok paco.

Motmot mon aryo-ni guo i Icrael. Gin dong gucako kwo iye. Cutcut Ruth otugi cako tic woko i poto, pien man onongo kare me kayo bel. Laco mo ma nyinge Boaj oye ni en obek bel i potone. In ingeyo nga ma min Boaj obedo? Obedo Rakab me boma me Jeriko-ni.

I nino mo acel Boaj owaco bot Ruth ni: ‘An awinyo lok i komi ducu, wa ki kit ma ibedo ka konyo kwede Naomi. Angeyo kit ma iweko woru ki meni kwede kacel ki loboni wa ki kit ma ibino kwede me bedo i kin jo ma yam onongo pe i ngeyo con. Jehovah omyero otimmi ber!’

Ruth ogamo ni: ‘Rwoda, in kica omaki i koma tutwal. Ityeko kweyo cwinya woko pien i loko kweda i yo maber mada.’ Boaj maro Ruth adada, dok pe otero kare malac ci gin gunyomme woko. Man oyomo cwiny Naomi adada! Naomi cwinye dok omedde ki bedo yom i kare ma Ruth gin ki Boaj gunywalo latin laco mukwongo, ma nyinge Obed. Lacen Obed odoko kwaro Daudi, ma wabingeyo lok i kome lacen.

Ruth gin ki Naomi

Ruth buk me Baibul.



Peny

  • Naomi ocako o wa i lobo me Moab nining?
  • Ruth gin ki Orupa gubedo nga?
  • Ruth gin ki Orupa guwinyo nining i kare ma Naomi owaco botgi ni gudok cen bot lupacogi?
  • Boaj obedo anga, dok en okonyo Ruth gin ki Naomi nining?
  • Nying latin ma Ruth onywalo ki Boaj ni obedo nga, dok pingo omyero wiwa opo i kome?

Peny mukene

  • Kwan Ruth 1:1-17.

    Lok me mar maber ango ma Ruth owaco? (Ruth 1:16, 17)

    I kit ma tam pa Ruth onongo tye kwede nyuto ber cwiny ma ‘romi mukene ni’ tye kwede i kom jo ma kiwirogi ki cwiny maleng ma pud gitye i lobo i kare ni nining? (Jon 10:16; Jek. 8:23)

  • Kwan Ruth 2:1-23.

    Ruth omiyo lanen maber bot mon matino ma i kom kare ni nining? (Ruth 2:17, 18; Car. 23:22; 31:15)

  • Kwan Ruth 3:5-13.

    Boaj oneno miti pa Ruth me nyomme kwede-ni nining me ka ka nyomme ki laco matidi?

    Cwiny ma Ruth obedo kwede pwonyowa ngo i kom mar me gen? (Ruth 3:10; 1 Kor. 13:4, 5)

  • Kwan Ruth 4:7-17.

    Lukricitayo ma kombeddi gitwero bedo calo Boaj nining? (Ruth 4:9, 10; 1 Tem. 3:1, 12, 13; 5:8)