Cit atir i jami ma tye

Cit atir ka ma nyuto lok ma tye iye

Ododo me 38: Lurot-Piny 12

Ododo me 38: Lurot-Piny 12
Lurot-piny me Icrael gutingo nyig yat mogo

NEN nyig yat ma co magi gitye ka tingo-ni. Nen kong kit ma tuga nyig olok meno dit kwede. Me tingone mito co aryo aye gulyer alyera i wi tal. Nen kong bene oduro ki okwer pomegranat. Nyig yat maber kuman-ni oa ki kwene? Oa ki i lobo Kanaan. Myero wi opo ni, Kanaan aye ka ma Abraim, Icaka ki Yakobo yam gukwo iye. Ento pi kec ma opoto kunnu omiyo Yakobo, ki jo me ode, gudak gucito i Ejipt. Ento kombeddi, ma dong mwaka 216 okato i nge kare meno, Moses tye ka telo Luicrael me dok cen i Kanaan. Gin guo i kabedo mo i dye tim ma kilwongo ni Kadec.

Jo maraco gikwo i lobo Kanaan. Pi meno Moses ocwalo lurot-piny 12, kun owaco botgi ni: ‘Wunge wel dano ma gibedo kunnu kacel ki kit ma tekgi tye kwede. Wutem niang bene ka lobone ber me ceko cam. Wunen ni wukelo nyig yat mogo ki kunnu.’

I kare ma lurot-piny gudwogo cen i Kadec, guwaco ki Moses ni: ‘Obedo lobo maber adada.’ Me nyuto ni meno lok ada, gunyuto nyig yat mogo bot Moses. Ento lurot-piny 10 guwaco ni: ‘Jo ma gibedo kunnu gidongo dok gitek. Kibinekowa woko ka watemme me kwanyo lobo meno.’

Lworo omako Luicrael ka guwinyo lok man. Gin guwaco ni: ‘Ka nene wato giwa i Ejipt nyo i dye tim kany kono ber makato. Kibinekowa woko i lweny, dok monwa kacel ki lutinowa kibimakogi woko. Waketu latela manyen me leyo ka wang Moses, wek wadoku cen i Ejipt!’

Ento lurot-piny aryo ki i kin-gi onongo gigeno Jehovah, ci gutemo kweyo cwiny lwak. Nyingi aye Yocwa ki Kaleb. Gin guwaco ni: ‘Pe wulwor. Jehovah tye kwedwa. Kwanyo lobo meno bibedo yot.’ Ento lwak pe guye. Gin onongo gimito neko kadi wa Yocwa gin ki Kaleb woko.

Man ocwero cwiny Jehovah mada, ci en owaco ki Moses ni: ‘Pe tye ngat mo me mwaka 20 odok kwede malo ma bidonyo i lobo Kanaan. Gin guneno lwak tango ma atimo i Ejipt ki i dye tim, ento pud pe gigena. Pi meno gibilak i dye tim pi mwaka 40 nio wang ma ngat me agikki ki i kin-gi oto. Yocwa gin ki Kaleb keken aye gibidonyo i lobo Kanaan.’

Wel 13:1-33; 14:1-38.



Peny

  • Ngo ma iniang iye ka i neno tuga Olok magi ma i cal-li, dok gua ki kwene?
  • Pingo Moses ocwalo lurot piny 12 i lobo pa jo Kanaan?
  • Lok ango ma lurot-piny apar gudwoko bot Moses?
  • Lurot-piny aryo gunyuto gen-gi i kom Jehovah nining, dok nyingi kono anga?
  • Pingo Jehovah obedo ki akemo, dok en owaco gin ango bot Moses?

Peny mukene

  • Kwan Wel 13:1-33.

    Anga-gi ma giyerogi me cito ka roto-piny i lobo ca, dok kare maber ango ma gin gubedo kwede? (Wel 13:2, 3, 18-20)

    Pingo tam pa Yocwa ki Kaleb dok opokke woko ki pa lurot-piny mukene ni, dok man pwonyowa ngo? (Wel 13:28-30; Mat. 17:20; 2 Kor. 5:7)

  • Kwan Wel 14:1-38.

    Nguru i kom luwang Jehovah mene i lobo kany ma myero wa gwokke iye? (Wel 14:2, 3, 27; Mat. 25:40, 45; 1 Kor. 10:10)

    Wel 14:24 onyuto nining ni Jehovah tye ki miti i kom luticce acel acel? (1 Luker 19:18; Car. 15:3)