Cit atir i jami ma tye

Cit atir ka ma nyuto lok ma tye iye

Ododo me 32: Pwod 10

Ododo me 32: Pwod 10

NEN cal magi. Gin ducu ki acel acel nyuto pwod ma Jehovah okelo i kom jo Ejipt. I cal me acel itwero neno Aron ka goyo Kulu Nail ki odoone. I kare ma ogoyo, pii ma i kulu-ni olokke odoko remo. Rec oto, ci kulu odoko mangwe.

Pwod mapol i kom jo ejito

Ma lubo meno, Jehovah omiyo ogwal okatti woko ki i Kulu Nail. Gin onongo gitye ka ducu—i keno, jami me tedo, i kabuto pa dano—ka ducu. I kare ma ogwal magi guto, Luejipt gucoko gudurogi lipim, ci omiyo piny ducu odoko mangwe.

Ci Aron ogoyo ngom ki odoone, ci apwa olokke odoko lakucukucu. Magi obedo kit gin mogo matino tino ma gituk ci gikayo dano. Lakucukucu-ni aye obedo pwod me adek i lobo Ejipt.

Pwod mukene-ni ducu dong wano Luejipt keken, pe wano Luicrael. Pwod me angwen obedo lwango madongo ma gucore gupongo odi pa Luejipt ducu. Pwod me abic opoto i kom lee. Pol dyangi ki romi kacel ki dyegi pa Luejipt guto woko.

Ma lubo man, Moses ki Aron gukwanyo buru ci guyuyo malo i yamo. Ci buru-ni okelo bur maraco i kom dano wa ki lee. Man obedo pwod me abicel.

I nge meno Moses oilo cinge malo i polo, ci Jehovah ocwalo kot mamor matek dok ma cwer ki pee. Man obedo pee mucwer marac adada ma pud dong loyo i lobo Ejipt.

Pwod me aboro obedo lwak bonyo mapol adada. Ma naka con, nyo cakke i kare meno, bonyo pud peya obedo madwong makato meno. Gucamo gin ducu ma pee pe obalo.

Pwod me abongwen obedo colpiny. Pi nino adek piny macol licuc oumo lobo woko ducu, ento ka ma Luicrael kwo iye piny obedo gire maleng.

Me giko, Lubanga owaco ki jone ni gukir remo latin dyel nyo latin romo i kom okar me doggola. Ci lamalaika pa Lubanga okato ki i dye Ejipt. Ka lamalaika-ni oneno remo-ni, ci pe neko ngatti mo i ot meno. Ento i odi ducu ma remo onongo pe i okar doggolagi, lamalaika pa Lubanga oneko lutino kayo ducu, pa dano ki pa lee. Man aye obedo pwod me 10.

I nge pwod man me agikki-ni, Parao owaco ki Luicrael me a woko. Jo pa Lubanga ducu onongo dong guyubbe woko me wot, dok i dyewor meno kikome gin gucako wotgi me a woko ki i Ejipt.

Nia cura 7 nio wa i 12.



Peny

  • Tit kong pwod adek mukwongo ma Jehovah okelo i kom Ejipt kun itiyo ki cal ma ginyuto kany-nyi.
  • Apokapoka ango ma obedo i kin pwod adek mukwongo ki pwod mogo mukene-ni?
  • Pwod me angwen, abic, ki me abicel obedo ngo?
  • Tit kong kit pwod me abiro, me aboro ki me abongwen.
  • Ngo ma Jehovah otito ki Luicrael me timo ma peya pwod me apar obino?
  • Pwod me apar obedo ngo, dok ngo ma otimme iye?

Peny mukene

  • Kwan Nia 7:19 8:23.

    Kadi bed ajwagi ma i Ejipt ma gitimo tango guporo tango pa Jehovah aryo mukwongo-ni, ento ngo ma dong guyee inge tango mutimme me adekke? (Nia 8:18, 19; Mat. 12:24-28)

    Pwod me angwen onyuto kero pa Jehovah me gwoko jo-ne nining, dok ngeyo man weko jo pa Lubanga giwinyo nining kit ma gitye ka kemme ki "twon can madit atika” ma tye ka bino-ni? (Nia 8:22, 23; Yabo. 7:13, 14; 2 Tekwaro 16:9)

  • Kwan Nia 8:24; 9:3, 6, 10, 11, 14, 16, 23-25; ki 10:13-15, 21-23

    Dul aryo mene ma Pwod Apar-ni onyuto gorogi ka maleng, dok man gudo tamwa nining kombeddi i kom dul meno? (Nia 8:10, 18, 19; 9:14)

    Nia 9:16 konyowa nining me niang pingo Jehovah oweko Catan obedo tye wa kombeddi? (Rom. 9:21, 22)

  • Kwan Nia 12:21-32.

    Kare me Kato oweko larre otwere bot jo mapol nining, dok Kato meno onongo cimo pi gin ango mukene? (Nia 12:21-23; Jon 1:29; Rom. 5:18, 19, 21; 1 Kor. 5:7)