Cit atir i jami ma tye

Cit atir ka ma nyuto lok ma tye iye

Ododo me 28: Kit ma Kilaro Moses Kwede

Ododo me 28: Kit ma Kilaro Moses Kwede

NEN latin matidi ma tye ka koko, dok ma tye ka mako nyig cing nyako-ni. Man aye Moses. In ingeyo nga ma nyako ma nen maber-ri obedo? En obedo nya pa kabaka me Ejipt, nya pa Parao kikome.

Nya pa parao onongo Moses

Min Moses okano latinne nio ka latinne dong tye dwe adek, pien onongo pe mito ni jo Ejipt onek latinne woko. Ento en ongeyo ni kiromo nongo Moses woko, pi meno en otimo man me larre.

En kwanyo aduku ci oyubo ma pii pe romo donyo iye. Ci opyelo Moses iye, ka oketo aduku-ni i dye lum maboco ma i Kulu Nail. Miriam, lamin Moses, giciko ni obed cok kunnu wek onen gin ma romo timme.

Cutcut nya pa Parao obino i Kulu Nail ka lwok. En otugi neno aduku i dye lum maboco-ni. En olwongo ngat acel ki i kin anyira ma gitiyo bote ni: ‘Cit ioma aduku ca-ni.’ I kare ma nya pa kabaka oelo wi aduku-ni, en oneno latin maber adada! Moses onongo tye ka koko, ci nya pa kabaka kica omake i kome. En pe omito ni kinek latin-ni.

Cutcut Miriam obino. Itwero neno en i cal-li. Miriam owaco bot nya pa Parao ni: ‘Acit acilwong dako Icrael mo wek opiddi latin-ni?’

Nya pa kabaka owaco ni: ‘Tim ber iwoti.’

Pi meno Miriam oringo oyotoyot ka lwongo minne. I kare ma min Moses obino, nya pa kabaka owaco ni: ‘Kwany latin-ni iciti igwokka, ci abiculi.’

Pi meno min Moses opido latinne kikome. Lacen ma Moses odoko ditdit, minne otere bot nya pa Parao, ma opite dong macalo latinne. Meno aye kit ma Moses odongo kwede i ot pa Parao.

Nia 2:1-10.



Peny

  • Latin lakere mene ma tye i cal-li, dok en tye omako cing anga?
  • Ngo ma min Moses otimo me laro Moses ma onongo gimito neke?
  • Latin anyaka mene ma tye i cal-li, dok en otimo ngo?
  • I kare ma nya pa Parao onongo latin, tam ango ma Miriam omiyo?
  • Ngo ma nya kerri owaco bot min Moses?

Peny mukene

  • Kwan Nia 2:1-10.

    Kare ango ma min Moses obedo kwede me tiro ki pwonyo Moses i kare ma en pud tidi, dok meno miyo lanen ango bot lunyodo ma i kare ni? (Nia 2:9, 10; Nwo. 6:6-9; Car. 22:6; Ep. 6:4; 2 Tem. 3:15)