Cit atir i jami ma tye

Cit atir ka ma nyuto lok ma tye iye

Ododo me 26: Yubu Genne i Nyim Lubanga

Ododo me 26: Yubu Genne i Nyim Lubanga

KICA maki i kom laco man ma kome lit-ti? Nyinge Yubu, dok dako-ni dakone. In ingeyo ngo ma en tye ka wacone bot Yubu? ‘Yet Lubanga ka ito.’ Wanenu gin ma omiyo en waco lok ma kumeno, ki gin ma omiyo Yubu oneno can tutwal.

Yubu tye ki bwur malit

Yubu onongo dano ma genne ma winyo Jehovah. En okwo i lobo Uj, ma pe bor ki Kanaan. Jehovah onongo maro Yubu tutwal, ento onongo tye ngat mo ma dage. In ingeyo ngat meno?

Catan Larac aye onongo dag Yubu. Wi myero opo ni, Catan aye lamalaika marac ma dag Jehovah. En omiyo Adam gin ki Kawa gukwero winyo Jehovah, dok en otamo ni etwero miyo jo ducu bene gikwero winyo Lubanga. Ento en otimo meno? Pe. Tam kong i kom co ki mon mapol ma lugen ma wapwonyo lok i komgi-ni. In itwero tucu nying jo adi?

I nge to pa Yakobo gin ki Yucepu i Ejipt, Yubu aye obedo ngat ma geno Jehovah loyo i lobo. Jehovah onongo mito nyuto ni Catan pe twero loko jo ducu me doko rac, pi meno en owaco ni: ‘Nen Yubu. Nen kit ma en gena kwede.’

Catan opyem kun waco ni: ‘En lagen pien in i cwakke dok en tye ki jami mabeco mapol ata. Ento ka ikwanyo jami magi ducu, en biyetti.’

Pi meno Jehovah owaco ni: ‘Citi. Kwanygi woko. Tim gin maraco ducu ma imito timone i kom Yubu. Wabineno ka en oyeta. Ento nen ni pe ineke aye.’

Me acel, Catan oweko dano gukwalo dyangi ki kinaga pa Yubu woko, dok romine bene kinekogi woko. Ci en oneko awobe kacel ki anyira, lutino ducu 10 ki yamo madit. I nge meno, okelo two malit adada i kom Yubu. Yubu oneno can tutwal. Meno aye gin ma omiyo dakone owacce ni: ‘Yet Lubanga ka ito.’ Ento Yubu onongo pe twero timone. Medo i kom meno, lurem adek ma lugoba gubino ci guwacce ni en okwo kwo marac. Ento Yubu omedde ki bedo lagen.

Man oyomo cwiny Jehovah tutwal, ci i ngeye en omiyo jami mabeco bot Yubu, kit ma itye ka nenone kwede i cal-li. En ocango twone. Yubu onywalo lutino mukene 10 mabeco, dok onongo dyangi, romi ki kinaga makato ma en onongo tye kwede con-ni tyen aryo.

In mono ibibedo lagen bot Jehovah kare ducu calo Yubu? Ka kumeno, Lubanga bimini jami mabeco bene. In iromo bedo kwo nakanaka i kare ma lobo ducu bidoko maber adada calo poto me Eden.

Yubu 1:1-22; 2:1-13; 42:10-17.

Yubu ki jo ode


Peny

  • Yubu obedo anga?
  • Ngo ma Catan otemme me timo, ento en ocobo mitine?
  • Jehovah omiyo twero me timo ngo bot Catan, dok pingo?
  • Pingo dako pa Yubu owaco ni ‘yet Lubanga ka ito’? (Nen ki i cal.)
  • Kit ma i tye ka neno ki i cal me aryo ni, Jehovah omiyo mot ki Yubu nining, dok pingo?
  • Ka wan wabedo ki niye i kom Jehovah calo Yubu, mot ango ma wabinongo?

Peny mukene

  • Kwan Yubu 1:1-22.

    Lukricitayo me kare ni gitwero poro Yubu nining? (Yubu 1:1; Pil. 2:15; 2 Pet. 3:14)

  • Kwan Yubu 2:1-13.

    I yo aryo mapat pat ango ma Yubu gin ki dakone gutero kwede aunauna pa Catan? (Yubu 2:9, 10; Car. 19:3; Mika 7:7; Mal. 3:14)

  • Kwan Yubu 42:10-17.

    Bakacic ma Yubu onongo ni orwatte ki ma Yecu onongo pi kwo me niye-ne nining? (Yubu 42:12; Pil. 2:9-11)

    Mot ma Yubu onongo pi gwoko gen-ne bot Lubanga ni cuko cwinywa nining? (Yubu 42:10, 12; Ibru 6:10; Yak. 1:2-4, 12; 5:11)