Cit atir i jami ma tye

Cit atir ka ma nyuto lok ma tye iye

Ododo me 21: Omegi Yucepu Gidage

Ododo me 21: Omegi Yucepu Gidage

NEN kit ma latin awobi-ni cwinye tye ka ton kwede dok pe ki gen mo. Man aye Yucepu. Omegine pud gucate acata bot co magi ma gitye ka cito i Ejipt-pi. Kunnu Yucepu kibiloko doko opii. Pingo awobe pa nyek mine gutimo gin marac kit man? Pien onongo ginyek i kom Yucepu.

Omegi pa Yucepu gucato Yucepu woko

Won-gi Yakobo onongo maro Yucepu matek tutwal. En omiyo kikwone kanyi mabor maber adada me nyuto marre i kome. I kare ma omegine 10 madongo-ni guneno ni Yakobo maro Yucepu tutwal, gin gucako bedo ma nyek dok gucako dago Yucepu woko. Ento onongo bene tye tyen lok mukene ma omiyo gidage.

Yucepu oleko lek aryo. I lek pa Yucepu aryo-ni ducu omegine gugungo piny i nyime. I kare ma Yucepu otito lek magi bot omegine, adagegi omedde dong makato.

I nino mo acel ma omegi Yucepu madongo-ni onongo gitye ka gwoko romi pa won-gi, Yakobo ooro Yucepu ni wek ocit onen kit ma gitye kwede. I kare ma omegi Yucepu guneno en tye ka bino, omegine mogo guwaco ni: ‘Waneku en woko!’ Ento omin-gi madit, Reuben, owaco ni: ‘Pe, pe wutim meno!’ Ma ka neke gin gumako Yucepu ci gubole woko i bur mo ma pii otwo woko ki iye. Ci gubedo piny me moko gin me atima i kome.

I kine ka cawa meno jo Icmael mogo gubino. Juda owaco bot awobe pa nyek minne ni: ‘Wacatu en woko bot jo Icmael.’ Gin gutimo dong kit meno. Gucato Yucepu pi cekel me ryal 20. Gin onongo pe giparo pi dano dok onongo gipe ki kica!

Omego-ni dong gibiwaco ningo bot won-gi? Gin guneko dyel ci gubedo ka luto kanyi pa Yucepu teretere i remo dyel-li. Ci gutero kanyi-ni paco bot won-gi Yakobo ci guwaco ni: ‘Wan wanongo man. Kong inen ka pe kanyi pa Yucepu.’

Yakobo oneno ni en eno. En okok ni: ‘Lee tim mo gire dong oneko Yucepu woko.’ Meno aye gin ma omegi Yucepu onongo gimito ni won-gi otam. Cwer cwiny dong ociro Yakobo woko. En okok pi nino mapol. Ento Yucepu onongo gire pe oto. Wanenu kong gin ma timme i kome ka ma gitere iye-ni.

Acakki 37:1-35.



Peny

  • Pingo omegi Yucepu gubedo ki nyeko i kome, dok ngo ma gutimo?
  • Ngo ma omegi Yucepu onongo gimito timo i kome, ento ngo ma Reuben owaco?
  • Ngo ma otimme i kare ma lucat wil me Icmael gubino?
  • Ngo ma omegi Yucepu gutimo wek wongi otam ni Yucepu oto woko?

Peny mukene

  • Kwan Acakki 37:1-35.

    Lukricitayo gitwero poro lanen pa Yucepu-ni nining ka gituco bal ma kitimo i kacokke? (Acak. 37:2; Levi. 5:1; 1 Kor. 1:11)

    Ngo ma oweko omegi Yucepu guketo bwami i kom Yucepu? (Acak. 37:11, 18; Car. 27:4; Yak. 3:14-16)

    Ngo ma Yakobo otimo ma obedo gin ma jwi timme i kare me kumo? (Acak. 37:35)