Cit atir i jami ma tye

Cit atir ka ma nyuto lok ma tye iye

Ododo me 15: Dako pa Lot Oneno Ngeye

Ododo me 15: Dako pa Lot Oneno Ngeye

LOT ki jo me ode gukwo kacel ki Abraim i lobo Kanaan. I nino mo acel Abraim owaco bot Lot ni: ‘Ngom kany dong pe romo leewa ducu. Tim ber, wapokke woko. Ka ilubo yo acel, ci an abikwanyo yo mukene.’

Lot otingo wange oneno piny. En oneno but lobo mo maber adada ka ma pii ki lum mabeco pi leene onongo tye iye. Man aye Distrik me Jordan. Pi meno Lot otero jo me ode ki leene kunnu. Motmot guyubo pacogi i boma madit me Codom.

Jo me Codom onongo giraco tutwal. Man owango cwiny Lot pien en onongo obedo ngat ma kite maber. Lubanga bene iye owang. Lacen, Lubanga ocwalo lumalaika aryo me tito ki Lot ni en ebityeko Codom ki boma madit me Gomora macok kwede-ni pi racgi.

Lumalaika-ni guwaco ki Lot ni: ‘Ruune! Kwany dakoni ki anyirani aryo-ni ci ia woko ki kany!’ Lot gin ki jo ode onongo gitye ka gale, pi meno lumalaika-ni omako cinggi ci oterogi ki i boma woko. Ci lamalaika acel owaco ni: ‘Ringu pi kwowu. Pe wunen ngewu. Ringu i wi cere, wek pe wuto.’

Lot ki anyirane guwinyo ci guringo woko ki i Codom. Gin pe gucung kadi pi kare matidi mo dok bene pe guneno ngegi. Ento dako pa Lot pe olubo cik meno. I kare ma dong guo i bor piny mo me a ki i Codom, en ocung ci oneno ngeye. Ci dako pa Lot olokke odoko wir kado. Itwero nenne i cal-li?

Waromo nongo pwony maber ki iye. Man nyutiwa ni Lubanga laro jo ma winye, ento jo ma pe winye kwogi birwenyo woko.

Acakki 13:5-13; 18:20-33; 19:1-29; Luka 17:28-32; 2 Petero 2:6-8.

Lot tye ka ngwec ki i Codom


Peny

  • Pingo Abraim ki Lot gupokke?
  • Pingo Lot oyero me bedo i Codom?
  • Kwo pa jo Codom onongo tye nining?
  • Cik ango ma lumalaika aryo gumiyo ki Lot?
  • Pingo dako pa Lot olokke odoko wir kado?
  • Pwony ango ma watwero nongo ki i kom kop pa dako pa Lot?

Peny mukene

  • Kwan Acakki 13:5-13.

    Ma make ki poro lok me cobbo peko i kin dano, pwony ango ma wanongo ki bot Abraim? (Acak. 13:8, 9; Rom. 12:10; Pil. 2:3, 4)

  • Kwan Acakki 18:20-33.

    Kit ma Jehovah otero kwede Abraim miniwa tek cwiny ni Jehovah ki Yecu gibingolo kop i yo matir nining? (Acak. 18:25, 26; Mat. 25:31-33)

  • Kwan Acakki 19:1-29.

    Ngo ma lok ma i Baibul nyuto i kom tam pa Lubanga i kom buto pa laco ki laco wade? (Acak. 19:5, 13; Levi. 20:13)

    Apokapoka ango ma wanongo i kit ma Lot ki Abraim gutero kwede tira pa Lubanga, dok ngo ma watwero pwonyo ki iye? (Acak. 19:15, 16, 19, 20; 22:3)

  • Kwan Luka 17:28-32.

    Kit cwiny ango ma dako pa Lot obedo kwede i kom jammi me kom, dok man tye calo gin ma cikowa nining? (Luka 12:15; 17:31, 32; Mat. 6:19-21, 25)

  • Kwan 2 Petero 2:6-8.

    Me lubo lapor pa Lot, tamwa myero obed nining i kom lobo man ma pe lworo Lubanga ma orumowa ni? (Ejek. 9:4; 1 Jon 2:15-17)