Cit atir i jami ma tye

Cit atir ka ma nyuto lok ma tye iye

Ododo me 12: Dano Gitye ka Gero Ot Madit Mabor

Ododo me 12: Dano Gitye ka Gero Ot Madit Mabor

MWAKA mapol okato. Awobe pa Nua gunywalo lutino mapol. Lutinogi gudongo ci gunywalo lutino mukene dok gumedo. Cutcut dano odoko mapol i lobo.

Ngat acel ki i kin jo magi kilwongo nyinge ni Nimulodi wod pa lakwar Nua. En obedo laco ma kite rac ma onongo dwaro dok neko lee medo wa ki dano. Nimulodi bene okette kene me doko kabaka me loyo jo mukene. Lubanga onongo pe maro Nimulodi.

I kare meno dano ducu onongo giloko leb acel keken. Nimulodi onongo mito ni egwok gin ducu kacel wek elogi. Ci ingeyo gin ma en otimo? En owaco ki dano ni guyub boma madit ki ot madit mabor iye. Nen-gi i cal gitye ka goyo matafali.

Lubanga Jehovah onongo iye pe yom pi gedo man. Lubanga onongo mito ni dano guket gubed i wi lobo ducu. Ento gin dano guwacci: ‘Wubin! Wek wageru boma madit ki ot madit mabor o malo wa i polo. Ci nyingwa biywek!’ Jo magi onongo gimito yweka pigi ken-gi, pe pi Lubanga.

Pi meno Lubanga omiyo guweko gero ot mabor-ri woko. Ingeyo kit ma en otimo kwede? Oweko dano gucako loko leb mapatpat atura, ma ka loko leb acel keken. Lugedo onongo dong pe giniang i kin-gi keken-gi. Man aye gin ma omiyo gilwongo bomagi madit-ti ni Babel, nyo Babilon, ma te lokke ni “Anyobanyoba.”

Dano dong gucako a woko ki i Babel. Dul dano mapatpat ma giloko leb marom aroma gua gucito ka kwo kacel i kabedo mapatpat mukene i lobo.

Acakki 10:1, 8-10; 11:1-9.

Lugedo ma gitye ka gero ot madit mabor


Peny

  • Nimulodi obedo anga, dok Lubanga kono onongo tamo nining i kome?
  • I cal-li, pingo dano onongo gitye ka goyo matafali?
  • Pingo Jehovah cwinye pe obedo yom pi tic me gedo meno?
  • Lubanga ojuko gedo me ot meno ma wiye ocudo malo-ni nining?
  • Boma meno onongo gilwongo ningo, dok nying meno onongo tyen lokke ngo?
  • Ngo ma otimme i kom dano i kare ma Lubanga odwalo te-lebgi?

Peny mukene

  • Kwan Acakki 10:1, 8-10.

    Lakodi kit ango ma Nimulodi onyuto, dok man cikowa nining? (Car. 3:31)

  • Kwan Acakki 11:1-9.

    Tam ango ma onongo tye i gero ot ma wiye ocudo malo-ni, dok ngo ma oweko yub meno onongo pe twero cobbe? (Acak. 11:4; Car. 16:18; Jon 5:44)