“[Wac botgi ni] myero guti tic mabeco, . . . wek gumak kwo ma en aye kwo kikome.”—1 TEM. 6:18, 19.

WER: 125, 40

1, 2. (a) Mot macalo mene ma itye ka kurone i Paradic i lobo kany? (Nen cal ma tye i pot karatac man.) (b) Gin ango ma bikeliwa yomcwiny madit loyo i lobo manyen-ni?

“KWO MA EN AYE KWO KIKOME.” Lok meno poyo wiwa i kom gen me kwo ma pe tum i paradic i lobo kany. Ki lok ada, lakwena Paulo oporo “kwo ma pe tum” ki “kwo ma en aye kwo kikome.” (Kwan 1 Temceo 6:12, 19.) Watye ka kuro kwo i paradic pi naka pien bikeliwa yengo kacel ki yomcwiny. Tek tutwal me yeni odiko ducu wabicoo ma nongo komwa yot dok cwinywa yom. (Ic. 35:5, 6) Tam kong kit ma bibedo ber kwede me ribbe ki jowa me amara kacel ki luremwa, ma bene i kingi tye jo ma kicerogi! (Jon 5:28, 29; Tic 24:15) Medo i kom meno, wabidongo ngecwa i kom cayan, wer, goyo pulan me ot, nyo jami mukene.

2 Kadi bed ni watye ka kuro jami magi mabeco-ni i lobo manyen, ento woro Jehovah aye bibedo mot ma pire tek adada. Pud dong bikeliwa yomcwiny madit ya pien dano gibiworo nying Jehovah dok gibijolo twero me locce! (Mat. 6:9, 10) Wabibedo ki yomcwiny me neno kit ma lobo bipong ki dano ma gipe ki roc kit ma Jehovah oyubo kwede con. Dok bene tam  kong kit ma bibedo yot kwede me nyikke cok bot Jehovah ka nongo kiwoto ki kwanyo roc ki i komwa motmot!—Jab. 73:28; Yak. 4:8.

3. Gin ango ma myero wayubbe pire kombeddi-ni?

3 Mot magi ducu gitwero bedo mewa pien Yecu owaco ni “ki bot Lubanga jami ducu twerre.” (Mat. 19:25, 26) Ento ka wamito ni wabed i lobo meno manyen-ni kun wakwo bene wa i nge Loc me Mwaka Alip Acel pa Kricito, ci myero watute i kareni me ‘mako’ kwo ma pe tum. Omyero wakur agikki me lobo man dok bene watim jami ma mitte kombeddi-ni wek oyubwa me kwo i lobo manyen. Wan watwero timo man nining kit macalo pud wakwo i lobo man marac-ci?

KIT MA MYERO WAYUBBE ME KWO I LOBO MANYEN

4. Mi labol ma nyuto kit ma waromo yubbe kwede kombeddi me kwo i lobo manyen?

4 Wan watwero yubbe nining kombeddi me kwo i lobo manyen ma Lubanga bikelone-ni? Ket kong ni watye ka yubbe me dak i lobo mukene. Watwero yubbe pi kwo i lobo meno nining? Waromo cako pwony leb ma dano giloko i lobo meno. Pwonyo tekwaro pa jo ma gikwo kunnu twero konyowa. Watwero cako temo camo jami ma gicamo. Makato meno bene, waromo cako kwo calo dong watye i lobo meno. Meno aye kit ma wabikwo kwede ka ce wadak kunnu. I yo acel-li, watwero yubbe me kwo i lobo manyen kombeddi-ni ka nongo watute me kwo calo iwacci dong watye kunnu. Kong dong wanenu yo mogo ma waromo yubbe kwede.

5, 6. Keto i tic tira ma dul pa Jehovah miniwa bikonyowa nining me kwo i lobo manyen?

5 I lobo manyen-ni, dano gibicwako loc pa Lubanga i twok lobo ducu. Man pud dong pat adada ki loc me lobo man ma tye i te loc Catan-ni, ka ma dano gimito ni gilone kengi! Adwogi marac ango ma obino pien jo mogo gimito ni gilone kengi dok gitim jami ma igi mito? Kwero winyo tira ma Lubanga miyo okelo deno can kacel ki cwercwiny. (Jer. 10:23) Kwo pud dong bibedo yot ya i lobo manyen pien dano weng gibijolo loc pa Jehovah!

6 I lobo manyen ma tye ka bino-ni, cwinywa bibedo yom adada me lubo tira pa Jehovah ka nongo watiyo matek me yubo lobo wek obed mamwonya ki dong pwonyo jo ma kicerogi. Ento ket kong ni meno onongo kiminiwa tic mo ma timone pe yomo cwinywa kono? Tika wabitute ki kerowa ducu me timo tic meno kun wabedo ki yomcwiny? Pol pa wan wabiwacci watimo! Mitte ni omyero walub tira ma dul pa Jehovah miniwa i kareni. Ka watye ka timo meno, ci nongo watye ka yubbe pi kwo ma pe tum i te loc pa Jehovah.

7, 8. (a) Pingo omyero wadong cwiny me note? (b) Alokaloka ango mutimme i kom Lukricitayo mogo? (c) Gin ango ma bitimme i lobo manyen?

7 Wek wayubbe me kwo i lobo manyen-ni, omyero wapwony kit me bedo ki yomcwiny ki dok note ki luwotwa kadi bed ni walubo tira ma dul pa Jehovah miniwa i kareni. Ka wanote ki jo ma gitelowa i kareni, ci wabinongo yengo ki yomcwiny i tic manyen ma ki miniwa, ma man bikonyowa me nyuto cwiny acel-li i lobo manyen. (Kwan 1 Jo Tecalonika 5:12.) I Lobo ma Kiciko Pire-ni, kipoko lobo me bedo ginaleya bot Luicrael kun kibolo kwir. (Wel 26:52-56; Yoc. 14:1, 2) Tye kono ni, i kareni, pe wangeyo lobo ma kibipokone bot ngat acel acel i paradic.  Ento, note bikeliwa yengo kacel ki yomcwiny madit ka nongo watimo miti pa Jehovah ka mo keken ma wabikwo iye i kare meno.

8 Pud dong tye twon mot madit ya me kwo i lobo manyen i te loc me Ker-ri. Pi tyen lok man, cwinywa yom me note kacel ki dul pa Jehovah i kareni ki dok me timo tic mo keken ma ki miniwa. Tye kono ni, ka kare woto ki kato, kit me kwowa bene lokke. Me labolle, lubetel mogo ma gitye i lobo Amerika kicwalogi i tic me tito kwena dok bene kombeddi-ni gitye ka nongo mot kacel ki yomcwiny madit. Jo mukene ma onongo gitiyo macalo luneno me adwol gicwalogi me tic macalo painia keken pienni gutii woko nyo pi peko mogo. Ka waye tic ma ki miniwa, walega Lubanga ni okonywa ki dok watute me tiyo ticce, ci wabibedo ki yomcwiny kacel ki mot mapol i kare man me agikki-ni. (Kwan Carolok 10:22.) Ento genwa me kwo i anyim kono? Watwero yero me kwo i kabedo ma wamaro i lobo manyen ento kiromo wacci myero wacit i kabedo mukene. Ka mo keken ma wabitic iye ki dong tic ma wabitimo, waromo bedo ki pwoc madit kacel ki yomcwiny.—Nek. 8:10.

9, 10. (a) I kabedo macalo mene ma myero wadi iye cwinywa ka watye i lobo manyen? (b) Watwero nyutone nining ni wadiyo cwinywa?

9 I lobo manyen, bimitte ni i kine mukene myero wadi cwinywa. Me labolle, waromo winyone ni jo mogo cwinygi yom pienni kicero wadigi kacel ki luremgi. Ento, wan nongo myero kong wakur wang ma kicero jowa me amara. Ka meno otimme, tika wabidiyo cwinywa kun wabedo ki yomcwiny pien jo mukene kicerogi wadigi ki luremgi? (Rom. 12:15) Ka wapwonye me diyo cwinywa wek cikke pa Jehovah ocobbe i kareni, man bikonyowa me diyo cwinywa i kare meno.Latit. 7:8.

10 Watwero bene yubbe me kwo i lobo manyen-ni ka wadiyo cwinywa ma lubbe ki niango manyen madok i kom lok me ada. Tika wacwalo cawa malac me kwano niango manyen kun wadiyo cwinywa ka kitimo alokaloka motmot i niangowa me Baibul? Ka tye kumeno, ci bibedo yot botwa me diyo cwinywa i lobo manyen-ni ka nongo Jehovah pwonyowa me niang gin ma myero watim.—Car. 4:18; Jon 16:12.

11. Pingo omyero wapwonye me timo kica bot luwotwa i kareni, dok man bikonyowa nining i lobo manyen?

11 Yo mukene ma waromo yubbe kwede me kwo i lobo manyen-ni aye ka watimo kica bot luwotwa. I kare me Loc me Mwaka Alip Acel pa Kricito, bitero kare pi jo ma kitgi atir kacel ki jo kitgi pe atir me weko kitgi macon. (Tic 24:15) Tika wabitero luwotwa i yo me mar i kare meno? Ka wapwonye me timo kica ki dok wabedo ki wat maber ki luwotwa i kareni, man bimiyo bedo yot botwa me timone i lobo manyen.—Kwan Jo Kolocai 3:12-14.

12. Pingo omyero wayubbe i kareni me kwo i lobo manyen?

12 Pe te lokke ni ka wakwo i lobo manyen-ni ci wabinongo gin mo keken ma wamito ki dok i cawa mo keken. Ma ka meno, bimitte ni myero wanyut pwoc dok cwinywa obed yom i kwo mo keken ma watye iye ka nongo wanongo adwogi maber pien wamine i te loc pa Jehovah. Meno te lokke ni myero waket i tic kit mogo ma Jehovah mito ni wadong i kareni. Ka wapwonye me kwo kit ma myero wakwo kwede i kare meno, man nyuto ni watye ka dongo kit ma  wabibedo kwede pi kwowa lung. Watye ka dongo niyewa me kwo i ‘lobo ma bibino.’ (Ibru 2:5; 11:1) Meno nyuto ni watye ka kuro ki miti madit kwo ma atir ma bibedo tye i lobo. Ki lok ada, watye ka yubbe me kwo pi naka i lobo manyen pa Lubanga.

KET CWINYI I TIC PI JEHOVAH

Tit kwena maber-ri ki mit kom

13. Gin ango ma wabiketo bedo mukwongo i lobo manyen?

13 Nen dok yo mukene ma watwero yubbe kwede pi kwo kikome ma bibedo i anyim. Kadi bed ni meno kiciko ni wabibedo ki cam muromo ki jami mukene ma wamitogi i lobo manyen, ento yomcwiny madit bibino pi bedo ki cam me cwiny. (Mat. 5:3) Tic pi Jehovah bibedo gin ma pire tek loyo i lobo manyen, dok wabinyuto ni watye ka nongo mitte. (Jab. 37:4) Ento ka waketo Jehovah bedo mukwongo i kwowa i kareni, man nyuto ni watye ka yubbe pi kwo kikome ma tye i anyim.—Kwan Matayo 6:19-21.

14. Jo matino giromo keto yub macalo mene i tic pi Jehovah?

14 Wan watwero medo yomcwinywa i tic pi Jehovah nining? Yo acel aye ka waketo yub me cwiny. Ka pud itidi, tam matut me tic ki kwoni itiyo tic pi Jehovah. Pingo pe ikwed lok ma kicoyo i bukkewa ma lubbe ki yo mapat pat me tic pi kare malac? Iromo yero acel ci iketo bedo iyub ma megi. * Itwero lok ki ngat mo ma dong obedo i tic pi kare malac pi mwaki mapol. Ka itiyo ki kwoni me tic pi Jehovah, ci nongo itye ka yubbe me medde ki ticci pi Lubanga i lobo manyen-ni, ka ma pwonye kacel ki ngec ma itye kwede bikonyi adada.

Ket yub me cwiny i tic pi Jehovah

15. Yub ango ma lutit kwena ducu me Ker-ri giromo ketone i yo me cwiny?

15 Macalo lutit kwena me Ker-ri, yub ango ma watye kwede i yo me cwiny? Waromo keto macalo yub me dongo dirowa i ticwa me pwony. Nyo waromo yelle me medo niangowa i kom cik ma igi lac me Baibul ki kit me ketogi i tic. Tika watwero yubo kit ma wakwano kwede, miyo pwony ki dong lagam i cokke wek obed mucwiny. Wageno ni iromo bene tamo i kom jami mukene ma myero itim. Pen lok tye ni: Keto yub me cwiny biweko ibedo ki mit kom i tic pi Jehovah, dok man bikonyi me yubbe me kwo i lobo manyen.

 YO ME KWO MA PUD DONG BER LOYO!

Nyut pwoc pi cam me cwiny

16. Pingo tic pi Jehovah obedo yo me kwo ma pud dong ber loyo?

16 Ka watiyo ki cawawa me yubbe pi kwo i lobo manyen pa Lubanga, tika man nyuto ni nongo watye ka keng kwo maber i kareni? Pe wacel! Tic pi Jehovah ber loyo gin mo keken pien keliwa yomcwiny. Pe watiyo pire pienni ngat mo odiyowa tektek nyo me bwot ki i twon can madit atika-ni. Kicweyowa ni myero wati pire dok meno keliwa yomcwiny madit adada. Ka Jehovah marowa dok miniwa tira i kom kit ma myero wakwo kwede man nongo ber makato gin mo keken. (Kwan Jabuli 63:1-3.) Ki lok ada, pe mitte ni myero wakur wa i lobo manyen ci wek wanong mot mapol ma bino i yo me cwiny pienni watiyo pi Jehovah ki cwiny ducu—watwero bene nongo mot magi i kareni! Ada, jo mogo i kinwa dong gubedo ka nongo mot magi pi mwaki mapol, dok bene wangeyo ni pe tye yo mo me kwo ma romo kelo yomcwiny madit kuman.—Jab. 1:1-3; Ic. 58:13, 14.

Yeny tira ki i Ginacoya

17. Mato yamo ki timo jami ma wamito pigi bibedo tek lakwene i Paradic?

17 I Paradic, wabitic ki cawawa me timo jami mogo ma wamito ki dong i mato yamo. Iromo penye ni, pingo Jehovah ocweyowa ki cwiny me timo jami ma wamito ki dok me nongo yomcwiny mupore ka onongo en pe mito ni wacob miti magi? (Latit. 2:24) I yo magi kacel ki mukene, Jehovah kare ducu “[bi]imiyo gin makwo ducu giyeng.” (Jab. 145:16) Wamito ni wamat yamo dok bene wanong yweyo, ento jami magi ducu wanongo mitte ka ce waketo watwa ki Jehovah bedo mukwongo. Meno aye bene gin ma bitimme i Paradic. Pud dong bedo me ryeko ka pe waweko mitiwa bedo gin ma pire tek ento waketo pi Ker-ri bedo mukwongo ki dok watamo i kom mot ma jo pa Jehovah gitye ka nongone kombeddi-ni.—Mat. 6:33.

18. Watwero nyutone nining ni watye ka yubbe pi kwo ma pe tum i Paradic?

18 I Paradic ma tye ka bino-ni, wabibedo ki yomcwiny madit ma naka yam peya wabedo kwede. Wanyut wunu ni wamito bedo i lobo manyen-ni kun wayubbe kombeddi-ni. Wadong wunu kit mabeco ma Jehovah mito ki dok wanong yomcwiny i tic ma ki miniwa me tito kwena me Ker-ri ki mit kom. Wanong wunu yomcwiny kun waketo woro Jehovah bedo mukwongo i kwowa. Pi meno, wabed ki niye matek i kom Jehovah wek wakwo calo iwacci dong watye i lobo manyen.

^ para. 14 Nen buk me Young People Ask—Answers That Work, Vol. 2, pot 311-318.