Alex ojwat i kare ma en tye ka tingo bok mukene me ketone i lori pa kampuni ma en tiyo pire. En openye kekene ni, ‘Pingo pud atye ka tiyo tic man ma pe obitera ka mo-ni?’ ‘Awene ma rwoma obimedde? Kwona onongo bibedo maber adada ka pe atiyo!’

Calo Alex, dano mapol pe gimaro tic matek. Makanika mo ma nyinge Aaron owaco ni, “Dano mapol gitamo ni tiyo tic ma ‘rwomme lapiny’ pe opore pigi. Gin gitamo ni: ‘Atye ka tiyo tic man pien pud peya anongo tic maber.’”

Pingo jo mapol gitamo ni omyero pe giti matek? Twero bedo ni odi poko lok angeya aye miyo gitamo ni wek ngat moni obed ki kwo “maber,” ci nongo en myero obed ki jami me kom ma rwomme lamal dok pe myero oti matek. Matthew, ma tiyo tic me roco ki wero odi owaco ni, “Dano gitamo ni ka itiyo matek tutwal me yenyo kwo, ma nyutti in lapeko.” Shane, ma gwoko lengo me ot bene ye lok meno. En owaco ni: “Dano pe dong gimito tic ma lubbe ki wel cente ma kiculogi kwede pi nino moni.”

Ki tungcel, jo mapol ma kwogi tye maber ginongo yomcwiny i tic matek. Lagedo mo ma nyinge Daniel ma tye ki mwaka 25 owaco ni: “Atamo ni tic matek kelo yomcwiny madit atika, tutwalle ka kitimo me cobo yub maber.” Andre, ma tye ki mwaka 23, bene ye lok meno. En owaco ni, “Atamo ni yomcwiny kubbe ki tic. Tiyo tic manok pe kelo yomcwiny marii ento kelo wackom.”

Jo mogo calo Daniel ki Andre gucako bedo ki neno mupore i kom tic matek nining? Me ketone i yo macek, gin gilubo cik ma igi lac me Baibul i kwogi. Baibul cuko cwinywa ni myero wati matek kun pe wailo cingwa. Ento Baibul pe wacciwa ni myero wati matek keken ento bene nyutiwa kit me nongo yomcwiny i ticwa.

Cik mene ma igi lac me Baibul ma gitwero konyi me nongo yomcwiny i ticci? Wakwayi me neno mogo ma kinyamogi i pwony ma lubo man.