“KARE KI KARE ABEDO KA PENNYE KEKENA NI: LUBANGA ONONGO TYE KWENE?”​—Pope Benedict XVI, I kare ma tye ka limo kam ma kilwongo ni Auschwitz, i lobo Poland.

KA PEKO OPOTO, TIKA ITAMO NI, ‘LUBANGA ONONGO TYE KWENE?’ NYO TIKA GIN MO MARAC ADADA DONG OTIMME I KWONI MA OWEKO IPENYE KEKENI KA LUBANGA PARO PIRI?

Twero bedo ni iwinyo calo lamego Sheila, ma bedo i lobo Amerika. En odongo i paco ma danone ludini mada, en owacci: “Cakke i kare me tinona, onongo amaro Lubanga pien en aye Lacwecwa. Ento, onongo pe awinyo ni atye cok kwede. Atamo ni en gire tye ka nena, ento ki ka mabor ata. Onongo awinyo calo Lubanga pe daga ento dok bene kitungcel pe paro pira.” Pingo Sheila obedo ki akalakala i kom mar pa Lubanga pire? En otito ni: “Jo me pacowa gubedo ka kato ki i pekki mapol teretere, dok onongo nen calo Lubanga pe tye ka konyowa kulu.”

Calo Sheila, twero bedo ni in bene iye labongo akalakala mo ni Lubanga Won Twer Ducu tye. Ento twero bedo ni ipenye kekeni ka ada en paro piri. Yubu, laco ma kite atir, ma onongo tye ki niye i kom teko ki ryeko pa Lacwec, bene obedo ki akalakala. (Yubu 2:3; 9:4) I kare ma Yubu okato ki i pekki mapol mapatpat​—labongo gen mo—​en openyo Lubanga ni: “Pingo dong ilokke woko i koma? Pingo itera macalo lakworri?”​—Yubu 13:24.

Baibul pwonyo gin ango? Tika omyero wakok i kom Lubanga ka peko opoto? Tika watye ki lanyut mo ma miyo wangeyo ni Lubanga paro pi dano ducu dok ni en bene paro piwa ki acel acel? Wan kono ki acel acel tika watwero ngeyo ka Lubanga nenowa, niang pekowa, winyo aremwa dok konyowa ki pekkiwa?

I pwony magi ma bilubo man, wabinyamo kit ma cwec pa Lubanga pwonyowa ni en paro piwa. (Jo Roma 1:20) I nge meno wabinyamo gin ma Baibul nyuto i kom mar pa Lubanga piwa. Ka imedde ki ‘ngeye’ kun ingiyo cwecce kacel ki Lokke, man biweko ibedo ki gen ni ‘en paro piri.’​—1 Jon 2:3; 1 Petero 5:7.