Kwena man maber me Ker pa Lubanga-ni kitye ka titone i wi lobo ducu, kit ma Yecu yam owaco. (Matayo 24:14) Buk pa Daniel i Baibul tito ni ker man obedo gamente pa Lubanga. Cura me 2 i buk meno tye ki ginanyuta ma nyuto gamente nyo oteka ma loyo wi lobo-ni cakke ki i kom ker me Babilon, o kwede wa i karewa-ni. Tyeng 44 me cura man owaco kit man i kom jami ma bitimme i anyim:

“Lubanga me polo biketo ker mukene ma ri nakanaka ma pe gitwero balone, kadi dit me locce bene pe gibiweko i cing rok mukene. Ker meno manyen-ni bituro ker magi ducu ngido woko matitino, ci tyekogi woko ducu, en aye dong bicung bedo matwal.”

Lok pa lanebi man ki mukene ma i Baibul tittiwa ni Ker pa Lubanga bijwero gamente pa dano woko, ci en aye dong biloyo lobo kun kelo kuc ki kwo maber i lobo. Kwo bibedo nining i te loc me  Ker pa Lubanga? Magi aye cikke mamwonya adada ma cokcok-ki bicobbe.

  • LWENY BIBEDO PE

    Jabuli 46:9: ‘Lubanga bijuko lweny woko i wi lobo ducu; turo atum-gu dok nginyo wa tong woko, wango lwak kwot woko liweng ki mac.’

    Tam kong kit ma lobo onongo bibedo ber kwede, kono cente ki diro ma kitiyo kwede me yubo jami lweny onongo kitiyo kwede me cobo pekki pa dano, ma ka nekogi aye! Cikke man bicobbe i te loc me Ker pa Lubanga.

  • TWO BIBEDO PE

    Icaya 33:24: “Pe tye dano mo ma bedo i lobowa ma biwaco ni, ‘An koma lit.’”

    Go kong kwo i lobo ma pe tye dano mo ma two two aduno [etao], kanca, maleria, nyo two mo keken. Odi yadi ki yat me amwonya dong konygi bibedo pe. Kwo labongo two—meno aye anyim pa jo ma gibibedo i lobo kany.

  • CAN CAM BIBEDO PE

    Jabuli 72:16: “Cam bene myero ocek mabup i lobone, opong wa wi godi-gu woko ducu.”

    Lobo biceko cam ma romo dok ma nonge bot dano ducu. Kec ki two neto bibedo pe matwal.

  • AREM, KOKO, KI TO BIBEDO PE

    Niyabo 21:4: “[Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”

    Man tyen lokke ni wabibedo ki kwo ma pe tum labongo roc i paradic i lobo kany! Man cikke pa Lacwecwa ma lamar, Jehovah.

‘BICOBBE KAKARE’

Tika man obedo mere lek mamwa? Kadi bed pol pa dano giye ni kwo ma kiciko pire i Baibul-li mwonya mada, ento pi tyen lok mapatpat pud ginongo ni kwo me labed naka niang iye tek. Meno lok ada pien pe tye dano mo ma dong okwo kit meno ma twero tittiwa.

Dano dong gubedo opii pa bal ki to pi mwaki mapol dok gudeno can ki arem mapol adada, ma oweko gitamo ni man aye kit ma kwo myero obed kwede. Ento meno aye pe kit ma Lacwecwa, Lubanga Jehovah oyubo ni dano okwo kwede.

Me wek wabed ki gen i kom cikkene, Lubanga otito kit man i kom lok ma a ki i doge: “Pe bidwogo bota nono ma nongo pe otiyo gin mo, lokka bitiyo gin ma amito ni oti, dok bicobo gin ma acwale pire.”​—Icaya 55:11.

Baibul wacciwa ni Jehovah obedo Lubanga “ma pe loko lok goba.” (Tito 1:2) Kit ma en aye ociko pi jami mabeco magi ducu, bedo me ryeko ka wan kikomwa wanongo lagam me lapeny magi: Tika twere pi dano me kwo pi naka i Paradic i lobo kany? Ngo ma myero watim wek wanong adwogi maber ki i cikke pa Lubanga? I pwony ma lubo man, ibinongo lagam me lapeny magi.