Cit atir i jami ma tye

Cit atir i ka yero jami ma imito ma lubo man

Cit atir ka ma nyuto lok ma tye iye

Lucaden pa Jehovah

Acholi

Wi Lubele  |  No. 2 2017

Cokcok dini ducu giye ni dano tye ki tipo ma pe to

 LOK MA I POK NGEYE | GIN MA BAIBUL WACO I KOM KWO KI TO?

Lapeny ma Ocungo Wi Dano Mapol

Lapeny ma Ocungo Wi Dano Mapol

DANO gitye ki tam mapatpat madok i kom kwo ki to. Jo mogo gitamo ni ka ngat moni oto, pud medde ki kwo i yo mapat nyo i kabedo mukene. Jo mukene gitamo ni gibinywalogi odoco dok i yo mo mapat. Jo mukene gitamo ni to obedo agikki me jami ducu.

Twero bedo ni in itye ki tam mapat i kom lok man, gwok nyo ma lubbe ki kit ma idongo kwede nyo tekwaroni. Kit macalo dano gitye ki tam mapol mapatpat madok i kom to, tika tye ngat mo nyo ka mo ma watwero lokke iye me nongo lagam ma niango wiwa i kom lapeny man ma ocungo wi dano-ni?

Pi cencwari mapol, lupwonye dini gubedo ka pwonyo dano ni tipo pa dano medde ki kwo ka ngat moni oto. Cokcok dini ducu ma giwacci gin​—Lukricitayo, Hindi, Lujudaya, Cilam, ki dong dini mukene—​giye ni dano tye ki tipo dok medde ki kwo i nge to. Dini me Budda kitungcel, giwaco ni kinywalo ngat moni muto-ni odoco tyen mapol, dok teko ki ngec ma onongo ngat meno tye kwede twero medde ki kwo ki yomcwiny adada i yo ma kilwongo ni Nirvana.

Macalo adwogi me pwony man, jo mapol i twok lobo lung gitamo ni to yabo yo ki ngat moni me kwo i lobo mukene. Ki bot jo mapol, to obedo gin ma pire tek i kwo pa dano, dok ki botgi to nen calo obedo miti pa Lubanga. Ento gin ango ma Baibul waco i kom to? Tim ber ikwan pwony ma lubo man. Lagamme twero cungo wii.