“Bal yam obino i lobo kun wok “ki i dano acel [Adam], ka dong to obino pi bal, kit meno bene to onya oromo kin dano ducu, pien dano ducu gubalo.”Jo Roma 5:12

Gin ango ma onongo ibiwacone ka kipenyi ni, “Tika imito kwo pi naka?” Dano mapol gibiye ni gimito ento bene giromo tamo ni pe twere. Dano giwaco ni, to obedo gin ma timme i kwo, dok obedo gin ma dano ducu bikato ki iye.

Ket kong ni dok kiloko lapeny meno, ci kipenyi ni, “Itye atera me to?” Pol pa dano ma wigi tiyo gibigamo ni pe. Man nyuto gin ango? Kadi bed ni wakato ki i atematema kacel ki peko mapol, wan ducu watye ki miti me kwo pi naka. Baibul nyuto ni Lubanga ocweyo dano ki miti me kwo pi naka. Ki lok ada, Baibul waco ni ‘En oketo kare ma pe gik i cwinygi.’Latitlok 3:11.

Kadi bed kumeno, lok ada tye ni, dano pe gikwo pi naka. Ci dong, gin ango marac ma otimme? Lubanga tika dong otimo gin mo me kelo alokaloka i kom peko man? Baibul miniwa lagam ma yomo cwinywa adada, dok bene lagamme weko wangeyo tyen lok mumiyo Yecu odeno can dok oto.

GIN MARAC MUTIMME

Cura adek mukwongo i buk me Acakki wacciwa ni Lubanga oketo yub pi Adam ki Kawa me kwo pi naka, dok bene otittigi gin ma omyero gutim wek gubed kwo pi naka. Lokke bene medde ki tito botwa kit ma gukwero bedo luwiny bot Lubanga ci gurwenyo gengi pi kwo ma pe tum. Lok man kitito macek dok i yo ma niang iye yot ma omiyo jo mogo giwaco ni obedo ododo mo ata. Ento buk me Acakki bene nyuto atir ni lok ma tye iye gitye ada calo Jiri angwen-ni. *

Adwogi ango ma obino pien Adam pe obedo lawiny? Baibul miniwa lagamme ni: “Kit macalo bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.” (Jo Roma 5:12) Adam odoko labalo pien okwero winyo lok pa Lubanga. Pi meno, en orwenyo gen me kwo pi naka ka lacen oto woko. Macalo likwayone wan bene walako bal acel-li. Macalo adwogine watwo, watii ki bene wato. Kit ma kitito kwede-ni, rwatte ki kit ma lucayan bene giwaco kwede ni latin lako jami  mogo ki i kom lunyodone. Ento tika Lubanga otimo gin mo me kelo alokaloka i kom peko man?

GIN MA LUBANGA OTIMO

Ada, Lubanga oketo yub me koko nyo wilo jami ma Adam orwenyo pi likwayone—gen me kwo ma pe tum. Lubanga otimo meno nining?

Baibul waco i Jo Roma 6:23 ni meno “mucara me bal en to.” Man nyuto ni to obino macalo adwogi me bal. Adam oto pi bal ma en otimo. I yo acel-li, wan bene watimo bal, dok wato macalo adwogi me bal. Kadi bed ni pe obedo pi balwa, ento wan ducu pud kinywalowa ki bal. Pi mar ma Lubanga tye kwede piwa, en ocwalo Wode Yecu wek ocul “mucara me bal” piwa. Man onongo twere nining?

To pa Yecu oyabo yo pi dano me kwo ki yomcwiny ki dok pi naka

Kit macalo dano acel ma onongo pe ki roc-ci, Adam okelo bal kacel ki to bot dano ducu pi kwero bedo lawiny, ngat ma pe ki roc ma lawiny nio wa i to onongo mitte me gonyowa ki i yec meno. Baibul waco ni: “Macalo pi dano acel ma pe obedo ki winy omiyo dano mapol ata gudoko lubalo, kit meno bene pi winy pa dano acel jo mapol ata gibikwanogi ni kitgi atir.” (Jo Roma 5:19) “Dano acel” meno obedo Yecu. En oweko polo ci obino i lobo macalo dano ma pe ki roc *, ka oto pi balwa. Macalo adwogine, man oweko onongo dong twere botwa me bedo ki wat maber ki Lubanga ki bene gen me kwo pi naka.

GIN MUMIYO YECU ODENO CAN CI OTO

Pingo kono onongo mitte ni Yecu oto me cobo lok meno? Macalo Won Twer Ducu, Lubanga mono onongo pe romo waco mere ni likwayi pa Adam gukwo pi naka? En onongo tye kitwero me timo meno. Ento meno onongo pe birwatte ki cikke ma kicoyo ni mucara me bal aye to. Meno pe obedo cik mo ata, ma kitwero lokone cawa mo keken. Man obedo cik ma pire tek pi ngolo kop atir.Jabuli 37:28.

Ka Lubanga onongo pe ongol kop atir i lok meno, dano onongo giromo bedo ka tamo ka ce en dok bitimone i jami mukene. Me labolle, tika  en onongo bitic ki yo matir me yero anga i kin likwayi pa Adam ma opore me nongo kwo ma pe tum? Tika dano gibigeno ka ce en bigwoko cikkene? Kit ma Lubanga ngolo kop atir i kom larrewa, miniwa gen ni en bitimo gin matir.

Pi ginkok pa Yecu, Lubanga oyabo yo botwa wek wabed ki gen me kwo pi naka i paradic i lobo kany. Nen kong lok pa Yecu ma kicoyo i Jon 3:16 ni: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” To pa Yecu pe nyuto kit ma Lubanga ngolo kop atir keken, ento tutwalle mar madit ma Lubanga tye kwede pi dano.

Ento, pingo Yecu odeno can dok oto i yo malit kit ma kicoyo i Jiri-ni? Kit ma Yecu ociro dok okanyo arem tutwal-li kun gwoko gennene, onyuto ka maleng goba pa Larac-ci ni; pe tye ngat mo ma twero bedo lagen bot Lubanga ka kiketo arem malit i kome. (Yubu 2:4, 5) Lok goba meno onongo twero nen calo lok ada i kare ma Catan obwolo Adam ma onongo pe ki roc me timo bal. Ento Yecu—ma onongo rom ki Adam ma onongo pe ki roc-ci—ogwoko genene kadi bed odeno can malit. (1 Jo Korint 15:45) En onyuto ni Adam bene onongo twero gwoko gennene bot Lubanga ka onongo oyero me timone. Atematema ma Yecu ociro-ni omiyo en oweko botwa lanen me aluba. (1 Petero 2:21) Lubanga omiyo mot bot Wode pi bedo lawiny i jami ducu, kun miye kom me cwiny ma pe to i polo.

KIT MA ITWERO NONGO KWEDE ADWOGI MABER

Yecu oto ada. Yo me nongo kwo ma pe tum dong tye twolo. Tika imito kwo pi naka? Yecu otito gin ma omyero watim i kare ma owaco ni: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.”Jon 17:3.

Jo ma gucoyo magajin man gimito ni ipwony jami mapol i kom Jehovah, Lubanga me ada ki Wode, Yecu Kricto. Lucaden pa Jehovah ma gitye i kabedowu gibibedo ki yomcwiny me konyi. Itwero bene nongo ngec mukene ma romo konyi ka icito i kabedowa me intanet me www.jw.org/ach.

^ para. 8 Nen “The Historical Character of Genesis,” ma tye i buk me Insight on the Scriptures,” pot karatac 922, ma Lucaden pa Jehovah aye gucoyo.

^ para. 13 Lubanga onako kwo pa Wode ki i polo i i Maliam ma oweko en ogamo ic, dok teko pa cwiny maleng ogengo Yecu ki lako roc ki bot minne Maliam.Luka 1:31, 35.