Pingo Yecu olwongo lucat wil ma onongo gicato lee i ot pa Lubanga ma i Jerucalem ni “luyak”?

WAKWANO i Jiri pa Matayo ni: “Yecu odonyo i ot pa Lubanga, ci oryemo jo ducu ma onongo gicato wil ki ma giwilo jami i ot pa Lubanga. Oryebo meja pa lulok cente, ki kom pa lucat amam. Ci owaco botgi ni, ‘Gicoyo ni, “Oda gibilwongo ni ot me lega”; ento wun wuloko odoko boro pa luyak.’”​—Matayo 21:12, 13.

Lok me tekwaro nyuto ni lucat wil i ot pa Lubanga onongo gitero luwil marac kun gicato jami i wel ma lamal adada. Me labolle, wel amam onongo yot adada, dok kadi wa lucan bene onongo gitwero wilone me gityer. Ento coc mo macon pa Lujudaya waco ni i kare mo i cencwari me acel onongo kicato amam aryo i wel me denari acel me jabu. Onongo tero nino 25 pi ngat mo me tic wek enong wel cente meno. Wel amam odoko tek adada ma lucan onongo dong pe gitwero wilone. (Lulevi 1:14; 5:7; 12:6-8) Okelo cwercwiny madit adada bot lapwony cik pa Lujudaya mo ma nyinge Simeon ben Gamaliel ma oweko en odwoko wel gityer ma Lujudaya onongo myero gumi. Cutcut i nge meno, wel amam aryo odoko yot adada.

Kit ma dong waneno kwede, lucat wil i ot pa Lubanga onongo giluworo dok onongo gitero luwil i yo marac adada. Meno aye tyen lok muweko Yecu olwongogi ni “luyak.”