‘Gen Jehovah, dok iti gin maber, bed i lobo ki kuc.’JABULI 37:3.

WER: 133, 63

1. Jehovah ocweyo dano ki kero me timo ngo?

JEHOVAH ocweyo dano ki kero me timo jami mapatpat. En omiyowa kero me tam, dok man konyowa me cobo pekki ma watye kwede ki bene me keto yub pi anyim. (Carolok 2:11) En ominiwa teko, wek watim jami ma mitte me cobo yub ma waketo. (Jo Pilipi 2:13) En bene ominiwa cwiny ma ngoliwa kop, ma konyowa me niang gin matir ki gin marac. Cwiny ma ngoliwa kop konyowa me gwokke ki i bal ki dok konyowa me loko kwowa.Jo Roma 2:15.

2. Jehovah mito ni wati ki kerowa nining?

2 Jehovah mito ni wati ki kerowa i yo maber. Pingo? Pien en marowa dok ngeyo ni wabibedo ki yomcwiny ka watiyo ki mot ma eminiwa-ni. Me labolle, i Ginacoya me leb Ibru, kicoyo ni: “Ngat ma yubo yubbe ma nongo kong oketo i tam, bilimo jami madwong ata,” ki dok ni “kit gin mo keken ma inongo oye cingi me atiya, ti ki tekki.” (Carolok 21:5; Latitlok 9:10) I Ginacoya me leb Grik,  kicoyo ni: “Dong kit macalo pud watye ki kare-ni, myero watiyu gin maber bot dano ducu,” dok “kit macalo ngat acel acel tye ki motte ma gimiye, wuti kwede pi konnye kekenwu.” (Jo Galatia 6:10; 1 Petero 4:10) Nen ka maleng ni, Jehovah mito ni watim gin ma watwero wek wanong adwogi maber dok bene wakony jo mukene.

3. Ka kwene ma kero pa dano gik iye?

3 Jehovah mito ni wati ki kerowa, ento en bene ngeyo ka ma kerowa gik iye. Me labolle, pe watwero kwanyo roc, bal ki dong to. (1 Luker 8:46) Dok bene, pe watwero doro kwo pa jo mukene, pien ngat acel acel tye agonya me moko tamme. Kadi bed watye ki ngec madwong nyo manok, pe watwero bedo ki ngec marom ki pa Jehovah.Icaya 55:9.

Ka itye ki peko, ‘gen Jehovah, dok iti gin maber’

4. Ngo ma wabinyamo i pwony man?

4 Omyero waye ni Jehovah aye otirwa kare ducu, kun wageno ni en bikonyowa dok bitimiwa jami ma pe watwero timone. Ento, Jehovah bene mito ni watam i kom ngo ma watwero timone me cobo pekkiwa ki me konyo jo mukene. (Kwan Jabuli 37:3.) Omyero ‘Wagen Jehovah, dok wati gin maber.’ Watwero timo man nining? Kong wanenu labol pa Nua, Daudi, ki jo mukene ma gujenge i kom Jehovah. Wabiniang ni onongo tye jami mogo ma pe gitwero timone ento guketo cwinygi i kom jami ma gitwero timone.

 KA TIM MARACO ORUMOWA WOKO

5. Tit kong ngo ma otimme i kwo pa Nua.

5 Nua okwo i lobo ma “onongo dong opong ki bwami” kacel ki tim tarwang. (Acakki 6:4, 9-13) Kadi bed en onongo ngeyo ni Jehovah bijwero lobo meno marac-ci woko, ngene kene ni cwiny Nua obedo ka cwer i kom gin ma dano gubedo ka timone. Man oweko Nua oniang ni tye jami mogo ma pe etwero timone, ento bene onongo ngeyo ni tye jami mogo ma etwero.

Ariya i tito kwena (Nen paragraf 6-9)

6, 7. (a) Ngo ma Nua onongo pe twero timone? (b) Kwowa i kare-ni rwatte ki pa Nua nining?

6 Gin ma Nua onongo pe twero timone: Nua otito kwena me ciko dano i kom akemo pa Jehovah, ento en onongo pe twero diyo dano me ye lokke. Dok en onongo pe twero weko Pii Aluka bino oyotoyot. Onongo mitte ni Nua obed ki gen ni Jehovah bigwoko cikkene me giko tim maraco woko, kun geno ni Lubanga bitimo meno i karene kikome.Acakki 6:17.

7 Wan bene wakwo i lobo ma opong ki tim maraco, dok wangeyo ni Jehovah ocikke me jwerone woko. (1 Jon 2:17) Ento, pe watwero diyo dano me ye “kwena maber me ker.” Dok pe watwero timo gin mo wek “twon can madit atika” ocakke oyotoyot. (Matayo 24:14, 21) Calo Nua, omyero wabed ki niye matek, kun wageno ni Lubanga bigiko tim maraco ducu cokcok-ki. (Jabuli 37:10, 11) Wageno ni nino ma Jehovah omoko me giko tim maraco  pe bikato kadi ki nino acel.Kabakuk 2:3.

Calo Nua, omyero wabed ki niye matek, kun wageno ni Lubanga bigiko tim maraco ducu cokcok-ki

8. Nua oketo tamme i kom gin ango? (Nen cal ma tye i pot karatac 3.)

8 Gin ma Nua onongo twero timone: Ma ka ilo cinge woko pi gin ma pe etwero timone, Nua oketo tamme i kom ngo ma onongo en twero timone. Nua oketo cwinye i tito kwena me ciko dano. (2 Petero 2:5) Twero bedo ni tic man okonye me gwoko niyene wek obed matek. Medo i kom tito kwena, en olubo cik ma Jehovah omiye me gero yeya.Kwan Jo Ibru 11:7.

9. Watwero lubo lanen pa Nua nining?

9 Omyero watute matek i “tic pa Rwot” calo Nua. (1 Jo Korint 15:58) Me labolle, waromo konyo i tic me gero ki gwoko Otwa me Ker kacel ki Odi me Gurewa, iromo bene jalle me miyo kony i gure me adwol ki gure madito, nyo me tic i jang gang kal nyo opic me gonyo leb. Ma pire tek loyo aye ni, omyero watute matek i tic me tito kwena, man bijingo genwa pi kwo me anyim. Lamego mo acel owacci ka etito bot jo mukene mot ma Ker pa Lubanga bikelone, eniang ni dano gipe ki gen mo kulu dok ni gineno pekogi calo gin ma pe twero gik. Kit ma lamego-ni owaco kwede, wan watye ki gen, dok niyewa jing medde ka watito pi gen meno bot jo mukene. Gen man konyowa me medde i ngwec me kwo!1 Jo Korint 9:24.

KA WATIMO BAL

10. Tit kong gin mutimme i kom Daudi.

10 Kabaka Daudi onongo tye lagen, dok Jehovah omarre adada. (Tic pa Lukwena 13:22) Kadi bed kumeno, Daudi otimo abor gin ki Batceba, dok man onongo bal madit atika. Marac makato meno, en otemo umo balle woko kun keto yub wek kinek Uria, cwar Batceba woko i dog lweny. Daudi bene oweko Uria aye otero waraga ma kwako tone! (2 Camuel 11:1-21) Lacen, bal pa Daudi ongene ka maleng. (Marako 4:22) I kare ma meno otimme, Daudi odok iye nining?

Bal mutimme con (Nen paragraf 11-14)

11, 12. (a) Gin ango ma Daudi onongo pe twero timone i nge timo bal? (b) Ngo ma Jehovah bitimone piwa ka wangut i balwa?

11 Gin ma Daudi onongo pe twero timone: Daudi onongo pe twero loko gin ma en otimo. Ki lok ada, en onongo birego kwede i ngeye pi kwone ducu. (2 Camuel 12:10-12, 14) Pi meno, onongo mitte ni en obed ki niye. Onongo myero en obed ki gen ni ka engut pi balle ki cwinye ducu, Jehovah bitimme kica dok mine teko me ciro adwogi marac me bal ma en otimo.

12 Pi roc ma watye kwede, wan ducu watimo bal. Ento bal mogo rac loyo  mukene, dok i kine mogo pe watwero loko gin mutimme. Wan bene watwero deno can pi adwogi me bal ma watimo. (Jo Galatia 6:7) Ento wageno cikke pa Lubanga ni ka wangut, ci en bikonyowa i kare me peko, kadi bed ni wan aye wakelo pekone.Kwan Icaya 1:18, 19; Tic pa Lukwena 3:19.

13. Daudi oyubo watte ki Jehovah nining?

13 Gin ma Daudi onongo twero timone: Daudi onongo mito yubo watte ki Jehovah. En otimo meno nining? Daudi oye ni Jehovah okonye. Me labolle, en oye tira ma Natan, lanebi pa Jehovah omiye. (2 Camuel 12:13) Daudi bene olego bot Jehovah dok otito balle bote ka maleng, dok man nyuto ni en onongo mito cwak pa Jehovah odoco. (Jabuli 51:1-17) Ma ka ye ni balle obwoye, Daudi onongo pwony ki i balle. En pe dok onwoyo timo bal madongo kit meno. Lacen, en ogwoko gennene wa i tone, dok meno aye kit ma wi Jehovah po kwede i kome.Jo Ibru 11:32-34.

14. Pwony ango ma wanongo ki i gin ma otimme i kom Daudi?

14 Ngo ma watwero pwonyone ki i gin ma otimme i kom Daudi? Ka watimo bal madit, omyero wangut ki cwinywa ducu, watit balwa, dok wakwa kica ki bot Jehovah. (1 Jon 1:9) Omyero bene walok ki luelda, pien gitwero konyowa me yubo watwa ki Jehovah. (Kwan Yakobo 5:14-16.) Ka waye kony pa Jehovah, ci wanyuto ni wageno cikkene me timiwa kica. Medo i kom meno, omyero wanong pwony ki i balwa dok wamedde ki tic pi Jehovah ki tekcwiny.Jo Ibru 12:12, 13.

KI I JAMI MUKENE MUTIMME

Peko me yotkom (Nen paragraf 15)

15. Ngo ma wapwonyo ki i gin mutimme i kom Anna?

15 Gwok nyo itwero tam i kom lutic ma lugen mukene ma kicoyo lok komgi i Baibul ma gumedde ki timo gin ducu ma gitwero kadi bed ni onongo gitye ka wok ki i kwo matek. Me labolle, pi kare mo, Anna obedo ma pe nywal. Onongo pe tye gin mo ma en twero timone. Ento en ogeno ni Jehovah bikweyo cwinye. Pi meno, en omedde ki cito ka woro Jehovah i kema me woro, kun lego bote dok wacce lok ducu ma i cwinye. (1 Camuel 1:9-11) Man pud dong lanen maber ya! Ka watye ki two nyo peko mo ma pe watwero timo gin mo keken iye, omyero waket parwa ducu i kom Jehovah kun wageno ni en paro piwa. (1 Petero 5:6, 7) Myero watim gin mo keken ma watwero wek wanong adwogi maber ki i cokke pa Lukricitayo ki dong yub mukene ma dul pa Jehovah keto.Jo Ibru 10:24, 25.

Anna ogeno Jehovah, pi meno en omedde ki wore i kema me woro ki lega bote

Lutino ma gujuko tic pi Jehovah woko (Nen paragraf 16)

16. Ngo ma lunyodo gitwero pwonyone ki bot Camuel?

 16 Gin ango ma lunyodo ma lugen gitwero timone ka lutinogi oweko tic pi Jehovah? Lanebi Camuel onongo pe twero diyo lutinone me medde ki bedo lugen bot Lubanga. (1 Camuel 8:1-3) En oweko jami ducu i cing Jehovah. Ento Camuel otimo gin ma en twero me medde ki bedo lagen bot Lubanga ki me yomo cwiny Wonne me polo. (Carolok 27:11) I kare-ni, Lukricitayo bene gikato ki i kit kwo acel-li. Gitye ki gen ni, calo wego ma i lapor pa Yecu-ni, Jehovah tye atera kare ducu me jolo lubalo ma gungut. (Luka 15:20) Lunyodo bene giromo medde ki bedo lugen bot Jehovah, kun gigeno ni lanengi bitugo miti pa lutinogi me dwogo bote.

Can lim (Nen paragraf 17)

17. Pingo Lanen pa dato ma lacan-ni cuko cwinywa adada?

17 Lanen maber mukene aye pa dato mo ma lacan ma okwo i kare pa Yecu. (Kwan Luka 21:1-4.) En onongo pe twero timo gin mo i kom lok me camucana ma onongo tye i ot pa Lubanga, dok en onongo pe twero kwanyo canne. (Matayo 21:12, 13) Ento genne i kom Jehovah otugo mitine me cwako woro me ada. En onongo cinge yot dok obolo “cente aryo,” cente ducu ma en onongo tye kwede. Dako ma lagen meno onyuto ni egeno Jehovah ki cwinye ducu. En onongo ngeyo ni ka eketo pi ticce bot Jehovah mukwongo, ci en bikonye me nongo gin ma emito. I yo acel-lu, wageno ni ka waketo pi Ker pa Lubanga mukwongo i kwowa, Jehovah bineno ni wanongo jami ducu ma wamito.Matayo 6:33.

18. Mi labol i kom omego mo ma onongo tye ki neno matir.

18 I kare-ni, pol pa utmegiwa gitye ki kit gen acel-li i kom Jehovah kun giketo tamgi i kom gin ma gitwero timone ma ka ketone i kom gin ma pe gitwero timone. Tam kong i kom omego mo ma nyinge Malcolm, ma omedde ki bedo lagen nio wa i tone i 2015. Pi mwaki mapol ma en ki dakone gutiyo pi Jehovah, guwok ki i kwo maber ki marac bene. En owaco ni, “Pe watwero ngeyo kit ma kwowa bilokke kwede i anyim, waromo bedo ki akalakala, dok nongo pe wangeyo gin me atima. Ento, Jehovah goyo laane i kom jo ma gigene.” Tam ango ma Malcolm omiyo? “Leg bot Jehovah wek iket cwinyi ducu i ticci. Ket tammi tutwalle i kom gin ma itwero timone, ma ka keto i kom gin ma pe itwero timone.” *—Nen lok ma tye i tere piny.

19. (a) Pingo watwero wacone ni ginacoyawa me 2017 rwatte adada? (b) Itwero tic ki ginacoyawa me 2017 i kwoni nining?

19 Lobo-ni tye ka medde ameda “ki bedo marac,” pi meno omyero wange ni wabimedde ki rwatte ki pekki mapol. (2 Temceo 3:1, 13) Pire tek adada ni pe myero wawek peko mo keken obwowa i kare-ni. Ma ka meno, myero wagen Jehovah dok waket tamwa i kom gin ma watwero timone. Meno aye gin mumiyo ginacoyawa me 2017 ma waco ni: ‘Gen Jehovah, dok iti gin maber’ rwatte adada!Jabuli 37:3.

Ginacoyawa me Mwaka 2017: ‘Gen Jehovah, Dok Iti Gin Maber’Jabuli 37:3

^ para. 18 Nen Wi Lubele me Oktoba 15, 2013, pot 17 me o i 20.