“Wucuk cwinywu kekenwu, dok wukonnye bene kekenwu wek wudong i cwinywu.”​—1 JO TECALONIKA 5:11.

WER: 121, 75

1, 2. Pingo mitte ni wanyam kit ma watwero kweyo cwiny jo ma gikumu? (Nen cal ma i pot karatac man.)

SUSI owaco ni: “Wabedo ki arem cwiny pi to pa latinwa cokcok pi mwaka acel kulu.” Omego mo acel owaco ni i nge to pa dakone, ewinyo “arem mo malit adada i kome ma pe titte.” Ki cwercwiny madit, jo mapol bene giwinyo arem kit meno. I kacokke pa Lukricitayo i kare-ni, utmegiwa mapol onongo pe gibyeko ni jogi me amara gibito ma Armagedon pud peya oo. Gwok danoni mo me amara oto, nyo ingeyo ngat mo ma tye ka kumu. Ka tye kit meno, iromo bedo ki tam ni, ‘Ngat ma tye ka kumu twero nongo kwecwiny nining?’

2 Jo mapol giwaco ni ka kare woto ki kato, arem bene kwe woko. Ento tika timme kumeno kare ducu? Dato mo owaco ni, “Anongo ni dok rwatte ma loyo  me wacone ni gin ma itimo aye twero konyi me nongo kwe cwiny.” Wek wang bur moni ocang, tero kare dok bene mitte ni kigwok maber. I yo acel-li, tero kare dok mito gwok maber wek cwiny ngat moni okwe. Gin ango ma twero konyo jo ma kumu wek gunong kwecwiny?

JEHOVAH AYE “LUBANGA MA KWEYO CWINY DANO DUCU”

3, 4. Pingo watye labongo akalakala ni Jehovah niang arem ma watye kwede?

3 Jehovah, Wonwa ma lakica aye ma miniwa kwecwiny ma mitte. (Kwan 2 Jo Korint 1:3, 4.) En winyo arem pa jo ma tye ki arem, dok bene ocikke bot jone ni: “An aye abedo ngat ma kweyo cwinyi.”​—Icaya 51:12; Jabuli 119:50, 52, 76.

Jehovah tye ki miti matek adada me cero jo ma lugen

4 Wonwa ma lamar, bene orwenyo jone me amara i to, me labolle laticce Abraim, Yakobo, Moses ki dong Kabaka Daudi. (Wel 12:6-8; Matayo 22:31, 32; Tic pa Lukwena 13:22) Baibul nyutiwa ni Jehovah tye ki miti matek adada me cero jo magi ma lugen-ni. (Yubu 14:14, 15) I kare meno, gibibedo ki yomcwiny dok ma komgi yot kwicikwici. Jehovah bene orwenyo Latin kayone i to. Baibul waco ni ‘cwiny Lubanga obedo yom’ i kom Yecu kare ducu. (Carolok 8:22, 30) Pe watwero goyo kit arem ma Jehovah owinyo ka en neno kit ma Wode to malit kwede.​—Jon 5:20; 10:17.

5, 6. Jehovah kweyo cwinywa nining?

5 Watwero bedo labongo akalakala mo ni Jehovah bikonyowa. Pi meno, myero wabed agonya me lega bote ki dok me titte arem ma wawinyo. Kweyo cwinywa adada me ngeyone ni Jehovah niang kit ma wawinyo kwede dok ni en bikweyo cwinywa! Ento en timo meno nining?

6 Yo acel aye ni Jehovah tiyo ki cwiny mere maleng me kweyo cwinywa. (Tic pa Lukwena 9:31) Yecu ocikke ni Wonwa bimiyo cwiny maleng bot jo ducu ma lege. (Luka 11:13) Susi, ngat ma waloko i kome malo-ni owaco ni: “Warumu congwa piny tyen mapol kun wabako dogwa bot Jehovah ni okwe cwinywa. I kare magi ducu, kuc pa Lubanga ogwoko cwinywa ki tamwa.”​—Kwan Jo Pilipi 4:6, 7.

YECU BENE NIANG KIT MA WAWINYO KWEDE

7, 8. Pingo wangeyo ni Yecu bikweyo cwinywa?

7 I kare ma Yecu tye i lobo, en olubo kit Wonne, i lokke ki i ticce. (Jon 5:19) Jehovah ocwalo Yecu i lobo  wek okwe cwiny “jo ma cwercwiny onurogi” ki “jo ma kumo.” (Icaya 61:1, 2; Luka 4:17-21) Dano onongo gingeyo ni Yecu niang peko ma gitye kwede dok ni en mito konyogi.​—Jo Ibru 2:17.

8 Ngene kene ni i kare ma Yecu pud tidi, wadine ki lureme macok bene guto. Me labolle, nen calo wonne, Yucepu oto ma Yecu pud awobi matidi. * (Nen lok ma tye i tere piny.) Go kong kit ma obedo tek kwede bot ngat man ma onongo lakica adada-ni me kanyo arem cwiny ma en tye kwede, pa minne, omegine, ki pa lumegine.

9. Yecu owinyo nining i kare ma Lajaro oto?

9 I ticce me pwony, Yecu onyuto ni eparo pi dano dok en lakica. Me labolle, i kare ma lareme Lajaro oto, Yecu owinyo arem ma Maliam gin ki Marita gitye kwede. Cwinye ocwer adada ma oweko en okok ki pig wange, kadi bed ni en onongo ngeyo ni ebicero Lajaro woko.​—Jon 11:33-36.

10. Wangeyo nining ni Yecu niang kit ma wawinyo kwede i kare-ni?

10 Lok me kwecwiny ma Yecu owaco con konyowa nining i kare-ni? Baibul nyuto ka maleng ni Yecu pe olokke. Baibul waco ni: “Yecu Kricito gire kite tye acel keken laworo ki tin ki nino ma pe tum.” (Jo Ibru 13:8) En obedo “Won Kwo” pien en oweko twere botwa me nongo kwo ma pe tum. Yecu bene niang maber adada cwercwiny ma ngat moni tye kwede, dok “en twero konyo jo ma gibitogi.” (Tic pa Lukwena 3:15; Jo Ibru 2:10, 18) Pi meno, watwero bedo labongo akalakala ni Yecu pud cwinyi cwer ka en neno jo mukene cwinygi cwer. En niang arem ma gitye kwede, dok twero kweyo cwinygi “i kare ma mitte.”​—Kwan Jo Ibru 4:15, 16.

“CUKO CWINY MA WAKWANO I GINACOYA”

11. Ginacoya mene ma inongo kweyo cwinyi adada?

11 Kit ma Yecu okumu kwede i kare ma Lajaro oto tye i kin lok mapol ma kicoyogi i Baibul me kweyo cwinywa. Man pe tye me ur pien “gin ducu ma yam gicoyo i kare macon ca onongo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.” (Jo Roma 15:4) Ka cwinyi cwer, in bene itwero nongo kwecwiny ki i ginacoya calo magi:

  • Jehovah “tye cok ki jo ma cwinygi goro, en laro jo ma gitye ki arem madwong i cwinygi.”​—Jabuli 34:18, 19.

  •   “Ka atamo pi jami mapol, in [Jehovah] ikweyo cwinya ki kicani.”​—Jabuli 94:19.

  • “Kombeddi Rwot Yecu kikome, ki Lubanga Wonwa ma marowa dok okweyo cwinywa matwal ki gen maber ma obina pi kica, okwe cwinywu, omokwu matek.”​—2 Jo Tecalonika 2:16, 17. *​—Nen lok ma tye i tere piny.

WATWERO NONGO KWE CWINY KI I KACOKKE

12. Itwero kweyo cwiny jo mukene nining?

12 Jo ma cwinygi cwer bene gitwero nongo kwecwiny ki i kacokke. (Kwan 1 Jo Tecalonika 5:11.) Itwero jingo ki kweyo cwiny jo ma ‘cwinygi cwer’ nining? (Carolok 17:22) Wii myero opo ni tye “kare me ling alinga, ki kare me lok.” (Latitlok 3:7) Dato mo ma nyinge Dalene owaco ni mitte ni ngat ma tye ka kumu otit tamme ki kit ma ewinyo kwede labongo kano gin mo. Pi meno, gin ma pire tek ma itwero timone aye me ciko iti me winyo lokke labongo ngolo doge. Junia, ngat mo ma ominne odene owaco ni, “Kadi bed ni pe itwero niang peko ma ngat moni tye ka wok ki iye, gin ma pire tek aye ni imito niang kit ma giwinyo kwede.”

13. Gin ango ma wiwa myero opo iye madok i kom kumu?

13 Myero wiwa opo ni pe wan ducu wakumu i yo marom. I cawa mukene pe twere me tito arem ma wawinyo. Lok pa Lubanga waco ni: “Yomcwiny ma itye kwede bedo meri keni; ki keccwiny bene meri; pe tye dano mo ma twero nywako gin-gu ducu kwedi.” (Carolok 14:10) Kadi bed ni ngat moni otit kit ma ewinyo kwede, pe yot ki jo mukene me niang gin ma en tye ka wacone.

Pol kare, gin ma pire tek aye me ‘koko kacel ki jo ma gikok’

14. Gin ango ma watwero wacone me kweyo cwiny jo ma gikumu?

14 Twero bedo tek me ngeyo gin ma myero watit bot jo ma gikumu. Ento Baibul wacciwa ni “lok ma a ki i leb ngat maryek twero cango dano.” (Carolok 12:18) Jo mapol gunongo gin ma twero kweyo cwiny ma gitwero nywako ki jo mukene ki i brocuwa me When Someone You Love Dies. * (Nen lok ma tye i tere piny.) Pol kare, gin ma pire tek aye me ‘koko kacel ki jo ma gikok.’ (Jo Roma 12:15) Gaby, lamego mo ma  cware oto owaco ni i cawa mukene gin ma etwero timone me nyuto kit ma ewinyo kwede aye koko. En dok omedde ni: “Meno aye gin muweko anongo kwecwiny ka luwota gikok kacel kwede. I cawa meno, awinyo calo pe atye ka kumu kena.”

15. Watwero kweyo cwiny jo mukene nining ka wanongo tek me lok kwedgi wang ki wang? (Nen bok ma wiye tye ni “ Lok ma Kweyo Cwiny Dano.”)

15 Ka inongo tek me waco gin mo ma kweyo ngat moni wang ki wang, bedo ber ka icwale lok macek i cim nyo icone waraga mo macek. Itwero keto wang ginacoya mo acel, itito gin mo maber ma wii po i kom ngat ma oto-ni, nyo bene inywako gin mo ma otimme ma oyomo cwinyi. Junia owaco ni: “Lok macego cego ma kicwala nyo namo ki Lukricitayo luwota konya mada. Jami calo meno weko angeyo ni kimara dok kiparo pire.”

16. Yo mene ma pire tek ma watwero kweyo kwede ki cwiny jo mukene?

16 Legawa twero konyo utmegiwa ma gitye ka kumu. Watwero lega pigi nyo walego kacel kwedgi. Kadi bed ni tek boti me timone pien itamo ni itwero kok woko, lega-ni twero bedo ki teko me kweyo cwinygi. Dalene wiye po ni: “I cawa mukene ka lumege gibino ka cuko cwinya, apenyogi ka giye me lega kacel kweda. Ka gucako lega, nongo te lebgi dwalle woko ento te lebgi  cako yubbe motmot ci dong gilego i yo ma gudo cwinya adada. Niyegi, margi, ki dong kit ma giparo kwede pira ojingo niyena adada.”

MEDDE KI KWEYO CWINY JO MUKENE

17-19. Pingo myero wabed ka cuko cwiny jo ma gikumu kare ducu?

17 Pe watwero ngeyo kare ma ngat moni twero terone wek cwinye okwe. Ka ngat mo me amara pud oto atoya, wadi ki lirem gicuko cwiny adada. Dok i ngeye, ngat man dok cen i kit kwone me nino ducu. Ento nongo jo ma gikumu pud gimito cuko cwiny. Pi meno, bed atera me miyo kony. “Ngat ma larem bedo ki mar i kare ducu, ki dano ginywalo me nywako peko ki omegine.” (Carolok 17:17) Myero wakwe cwiny jo ma gikumu ka pud gimito konywa.​—Kwan 1 Jo Tecalonika 3:7.

18 Wii opo ni cwercwiny twero bwoyo ngat moni i cawa mo keken. Man twero timme i nino dwe me nyomgi, pi wer ma gudo cwinye, cal, tic, ngwec kom ngat meno, dwan, nyo kare ma gin mo timme iye. Ka dato nyo laco mo ma dakone oto tye ka timo gin mo kene pi tyen me acel calo wot i gure nyo kwer me Nipo, man dok twero bedo malit adada. Omego mo acel owaco ni: “Abedo ki lworo ni i nge mwaka me acel me nyomwa, i nino dwe ma wanyomme iye kikome, abiwinyo malit adada, dok man pe obedo yot. Ento omege mogo guyubo gure mo matidi ki lurema macok i nino meno wek pe abed kena.”

19 Wii myero bene opo ni jo ma cwinygi cwer pe gimito ni kikwe cwinygi i kare ma peko otimme iye keken. Junia otito ni: “Pol kare kony ma kimiyo i kare mapat ki nino ma gin moni otimme iye konyo adada. Meno pire tek adada dok twero kweyo cwiny ngat moni.” Ki lok ada, pe watwero kwanyo cwercwiny ki par ducu ma ngat moni tye kwede, ento watwero kweyo cwiny jo ma gikumu ka wakonyogi ki timo jami mogo. (1 Jon 3:18) Gaby owacci: “Atye ki pwoc madit bot Jehovah pi luelda ma gudiyo cwinya i kare ma atye ka kato ki i peko. Guweko awinyo ni Jehovah kara mara adada.”

20. Pingo cikke pa Jehovah kweyo cwinywa adada?

20 Tye me yomcwiny me ngeyone ni Jehovah, Lubanga ma kweyo cwiny dano ducu bikwanyo jami ducu ma keliwa cwercwiny i kare me nicer. (Jon 5:28, 29) Lubanga ocikke ni ‘ebimwonyo to woko matwal, dok ebidunyo pig wang dano woko ducu.’ (Icaya 25:8) Ci dong ma ka ‘kok kacel ki jo ma gikok,’ dano ducu ma i lobo gibibedo ki “yomcwiny kacel ki jo ma tye ki yomcwiny.”​—Jo Roma 12:15.

^ para. 8 Baibul tito ni i kare ma Yecu tye ki mwaka 12, Yucepu onongo pud kwo. Ento pe dong kiloko i kom Yucepu nicakke i kare ma Yecu otimo tango mukwongo me loko pii doko kongo. Man nyuto ni gwok nyo Yucepu onongo dong oto woko i kare meno. Medo i kom meno, i kare ma kiguru Yecu i kor yat, en owaco ki lakwena Jon ni ogwok minne, en onongo pe twero miyo minne i cinge ka onongo Yucepu pud kwo.​—Jon 19:26, 27.

^ para. 14 Nen bene pwony ma wiye tye ni “Kwe Cwiny Jo ma Kumo, Kit ma Yecu Otimo” [“Comfort the Bereaved, as Jesus Did”] i Watchtower me Novemba 1, 2010.