I MWAKA mukato-ni, omege alip mapol i twok lobo lung kicimogi macalo luelda ki lukony kor tic. Ka itye i kingi, ci labongo akalakala mo itye ki yomcwiny ni itwero tic pi Jehovah ki omegini i yo ma kit man.

Ento, ka itye ki lworo manok meno bene pe rac. Jason, laelda mo ma mwakane pud tidi, owaco ni: “I kare ma kicima acima, abedo ki lworo pi twon tic ma onongo tye i nyima.” Moses ki Jeremia bene guwinyo calo pe gupore i kare ma Jehovah omiyo botgi tic manyen. (Nia 4:10; Jeremia 1:6) Ka in bene iwinyo kit meno, ngo ma iromo timone wek idong gen i komi kekeni dok imedde ki dongo i yo me cwiny? Itwero nongo pwony mapol ki i lanen pa Temceo.​—Tic pa Lukwena 16:1-3.

LUB LANEN PA TEMCEO

Temceo onongo nen calo tye i kine ka mwaka 20 i kare ma ocako wot kacel ki Paulo. I kare ma Paulo olwonge alwonga, oromo bedo ni Temceo owinyo calo pud pe epore me miyo pwony ki tira bot jo mukene pien mwakane pud tidi. (1 Temceo 4:11, 12; 2 Temceo 1:1, 2, 7) Ento en omedde ki dongo i yo me cwiny, dok i nge mwaki apar Paulo owaco bot utmege ma i Pilipi ni: “Atye ki gen i Rwot Yecu me cwalo Temceo botwu oyot.” Pingo Paulo owaco lok man? En otito ni: “Pe atye ki ngat mo mukene doki ma tye ki kit cwiny ma en tye kwede.”​—Jo Pilipi 2:19, 20.

Pingo Temceo obedo lanen maber adada pi luelda? Kong wanenu tyen lok abicel.

1. En onongo paro pi dano adada. Paulo otito ki utmege ma i Pilipi ni pe tye ngat mo keken “ma twero paro” pigi calo Temceo. (Jo Pilipi 2:20) Temceo onongo mito ni omege gubed cok ki Jehovah, dok obedo atera me jalo cawane kacel ki kerone me konyogi.

William, ma dong obedo laelda pi mwaki makato 20, kare ducu waco bot luelda ma pud kicimogi nyen ni: “Mar omege ki lumege. Ket tammi i kom cobo mitigi ma ka tamo pi cobo tic me kacokke keken.” Pe ibed calo deribwa me bac ma paro pi gwoko cawa me o i bac pak keken me ka paro pi miti pa luwot.

2. En oketo tic pi Jehovah obedo mukwongo i kwone. Paulo owaco ni Temceo onongo dok pat ki jo mukene ma “giparo pi gin ma konyogi keken, pe gitamo pi gin ma dok i kom Yecu Kricito.” (Jo Pilipi 2:21) Paulo oneno ni omege mukene-ni onongo giparo pi cobo mitigi mukato kare woko. I kare mukene onongo giketo pi mitigi bedo mukwongo me ka tic pi Jehovah. Ento Temceo pe otimo kit meno! Cutcut ma onongo kare me tic pi Jehovah, en odok iye calo lanebi Icaya ma owaco ni: “An ene; ora.”​—Icaya 6:8.

Itwero cobo mitini kun kitungcel bene icobo miti pa kacokke i yo mupore nining? Me acel, lub tam ma Paulo omiyo ma wacci: “Ket pi jami ma pigi tego obed mukwongo.” (Jo Pilipi 1:10NW) Ket pi tic pa Jehovah obed mukwongo. Me aryo, gwokke ki jami ma camo cawani dok tyeko keroni nono. Paulo otito ki Temceo ni: “Wek miti me awobi obedi, ento ket tammi i bedo ki kit ma atir, niye, mar ki kuc.”​—2 Temceo 2:22.

3. En otiyo matek i tic pa Jehovah. Paulo oloko kit man i kom Temceo ni: “Calo wego ki latinne; waribbe kwede i tic kacel pi lok me kwena maber.” (Jo Pilipi 2:22) Temceo onongo kome pe wac. En  otiyo matek kacel ki Paulo, dok man oweko wat i kingi ojing adada.

Watye ki tic mapol me atiya i dul pa Jehovah i kare-ni. Tic man kelo yomcwiny dok weko ibedo cok ki omege kacel ki lumegini. Pi meno tute matek me medde “ki tic pa Rwot nino ducu.”​—1 Jo Korint 15:58.

4. En oketo i tic jami ma opwonyo. Paulo ocoyo bot Temceo ni: “In dong ingiyo kweda woko kun ineno pwonnya, kita ki tam ma aketo i nyima. Ineno niyena, diyo cwinya, mar ma atye kwede, kit ma ayelle kwede kun aciro can.” (2 Temceo 3:10) Temceo oketo jami ma en opwonyo i tic, pi meno kimedde mot me tic mukene.​—1 Jo Korint 4:17.

Pingo pe inong laelda mo muteggi ma itwero lubo lanene? Tom, ma dong obedo laelda pi mwaki mapol, wiye pud po i kom laelda mo muteggi ma obedo cok kwede ci opwonye ki jami mapol. Tom owaco ni: “Pol kare onongo apenye pi kony ci aketo tamme i tic. Man okonya me dongo gen i koma kekena.”

5. En obedo ka pwonnye kekene. Paulo omiyo tam ki Temceo ni: “Pwonnye keni i kwo me lworo Lubanga.” (1 Temceo 4:7) Kadi bed ni latuku moni tye ki lapwony tuko ma konye, en pud myero obed ka pwonnye kekene. Paulo otito ki Temceo ni: “Mi kareni me kwano coc ma yam gicoyo i nyim lwak, i tito lok, i pwony, nio ka abino kunnu. . . . Nyut lok magi ki tic, ket cwinyi iye, wek dano gunen kit ma itye ka wot kwede anyim.”​—1 Temceo 4:13-15.

In bene myero imedde ki dongo dironi. Bed ngat ma kwano Baibul i yo matut, kun bene inongo ngec manyen loyo ma dulwa miyo. Pe ibed ki gen mukato kare woko i komi kekeni. Pe bedo ber ka itamo ni itye ki ngec muromo ma itwero loyo ariya mo keken labongo kwanyo kare me kwedo lok ki i Baibul. Calo Temceo, “gwokke keni, dok igwok pwonnyi bene.”​—1 Temceo 4:16.

6. En ojenge i kom teko pa cwiny maleng. I kare ma Paulo onongo tye ka lok i kom tic me tito kwena pa Temceo, Paulo opoyo wiye ni: “Gwok gin maber ma gimiyo i cingi pi teko pa cwiny maleng ma bedo i iwa.” (2 Temceo 1:14) Onongo mitte ni Temceo ojenge i kom teko pa cwiny maleng.

Donald, ma dong otiyo macalo laelda pi mwaki mapol owaco ni: “Omege ma kicimogi pi tic i kacokke omyero gugwok watgi ki Lubanga. Omege ma gitimo kit meno ‘gibimedde ki doko tek.’ Ka gilego pi cwiny pa Lubanga dok gitute me nyako nyige, ci gibibedo mot bot utmege.”​—Jabuli 84:7; 1 Petero 4:11.

TER MOT ME TICCI CALO GIN MA PIRE TEK

Tye me cuko cwiny adada me neno lukony kor tic ki luelda ma gitye ka tute matek me dongo ticgi pi Jehovah, kit ma in bene itye ka timo-ni. Jason, ma waloko i kome malo-ni owaco ni: “Pi kare ma dong atiyo macalo laelda-ni, apwonyo jami mapol dok adongo tekcwiny. Kombeddi dong atye ka nongo yomcwiny i ticca dok aneno ni obedo mot madit!”

Tika ibimedde ki dongo i yo me cwiny? Ka ilubo lanen pa Temceo, ci in bene ibibedo twon mot madit bot omegini ki lumegini.