DIYO cwiny pire tek i kare-ni loyo kare mo keken pien kwo tye ka doko tek i kare man me “agikki piny.” (2 Temceo 3:1-5) Pol pa jo ma gurumowa pe gidiyo cwinygi. Giparo pigi kengi, gimaro daa, dok bene pe gijukke kengi. Pi meno mitte ni wapennye kekenwa ni: ‘An mono tika dong adoko calo jo ma gurumo ka ngeta ma pe gidiyo cwinygi-ni? Tyen lokke ngo me bedo ngat ma diyo cwinye? Ngo ma atwero timone wek diyo cwiny obed kit me kwona?’

DIYO CWINY OBEDO GIN ANGO?

“Diyo cwiny” kit ma kitiyo kwede i Baibul tyen lokke ngo? Tyen lokke pe obedo kanyo peko keken. Ngat ma diyo cwinye nongo ciro can ki gen ni jami biyubbe. Pe tamo pi mitine keken, ento bene paro pi kit ma jo mukene giwinyo kwede, kadi wa jo ma gucwero cwinye nyo giune. En bedo ki gen ni kadi bed watgi pe tye maber ento biyubbe. Pe tye me ur ni Baibul tittiwa ni diyo cwiny bino calo adwogi me mar. * (nen lok ma tye i tere piny.) (1 Jo Korint 13:4) Diyo cwiny obedo but “nyig ma nyak pi cwiny maleng.” (Jo Galatia 5:22, 23) Dong ngo ma watwero timone wek wabed jo ma gidiyo cwinygi?

KIT ME DONGO DIYO CWINY

Wek wadong kit me diyo cwiny, omyero waleg pi kony pa cwiny maleng, ma Jehovah miyo bot jo ma gigene. (Luka 11:13) Cwiny maleng tye ki teko madwong, ento pud mitte ni wakwo ma lubbe ki legawa. (Jabuli 86:10, 11) Man tyen lokke ni omyero watute matek me diyo cwinywa nino ducu dok wawek odok kitwa. Ento i kare mukene timone romo bedo tek. Ngo ma twero konyowa?

Omyero wakwan lok i kom Yecu dok walub lanene maber loyo. I kare ma lakwena Paulo oloko i kom ‘kit pa dano manyen,’ ma i kine tye iye diyo cwiny, en ocuko cwinywa ni: “Wuwek kuc pa Kricito ma yam olwongowu i kom acel aye olo cwinywu.” (Jo Kolocai 3:10, 12, 15) Me timo meno, omyero walub lanen pa Yecu dok wabed ki gen ni Lubanga biyubo jami i kare ma mitte kikome. Ka wamedde ki bedo ki gen meno, ci wabimedde bene ki diyo cwinywa, labongo paro pi gin ma tye ka timme i kabedo murumowa.​—Jon 14:27; 16:33.

Wan ducu wamito ni lobo manyen obin cutcut. Ento ka watamo i kom kit ma Jehovah odiyo kwede cwinye i komwa, wapwonnye me diyo cwinywa bene. Baibul jingo cwinywa ni “[Jehovah] pe galle agala ki cobo cikkene kit macalo jo mogo gitamo kwede, ento en pud tye ka diyo cwinye i komwu, pien en pe mito ni ngat mo orweny woko matwal, ento mito ni jo ducu guo i ningut.” (2 Petero 3:9) Ka watamo i kom kit ma Jehovah diyo kwede cwinye i komwa, ci wan bene wabidiyo cwinywa i kom jo mukene. (Jo Roma 2:4) Kare mene ma diyo cwiny mitte iye tutwal?

 KARE MOGO MA DIYO CWINY MITTE TUTWAL

Nino ducu wakato ki i jami ma temo diyo cwinywa. Me labolle, omyero wadi cwinywa wek pe wangol dog jo mukene tutwalle ka watye ki gin mo ma pire tek ma wamito waco botgi. (Yakobo 1:19) Mitte bene ni wadi cwinywa ka ngat mo ocwero iwa. Me ka keco oyotoyot, bedo ber ka wiwa opo i kom kit ma Jehovah gin ki Yecu gidok kwede i kom gorowa. Gin pe giketo cwinygi i kom bal matino tino ma watimo. Ento giketo cwinygi i kom kit mabeco ma watye kwede dok gidiyo cwinygi i komwa wek ominiwa kare me yubo ka ma wabalo iye.​—1 Temceo 1:16; 1 Petero 3:12.

Diyo cwiny bene mitte ka ngat mo owacciwa ni waloko nyo watimo gin mo marac. Pol kare cutcut, wakeco dok wabedo ki miti me gengo ngewa woko. Ento Lok pa Lubanga wacciwa ni omyero wadok i yo mapat ka kimiyowa tira. Waco ni: “Dano ma diyo cwinye ber kato ngat ma lawakke. Pe myero iwek kiniga omaki oyotoyot; jo ma luming aye kano kiniga i cwinygi.” (Latitlok 7:8, 9) Dong kadi bed kikok i komwa gobagoba, pud omyero wadi cwinywa dok watam matut ma peya wadok iye. Meno aye gin ma Yecu otimo i kare ma jo mogo gukok i kome gobagoba.​—Matayo 11:19.

Lunyodo bene omyero gudi cwinygi i kom lutinogi tutwalle ka mitte ni gukonygi me loko tamgi nyo me weko miti maraco. Nen kong labol pa Mattias ma tiyo i Betel mo i lobo Ulaya. I kare ma Mattias onongo tye mwaka apar ki wiye, lutino kwan luwote onongo ginyware pi niyene. I acakkine lunyodone pe gungeyo ngo ma tye ka timme. Ento lacen lunyodone guneno ni Mattias ocako bedo ki akalakala i kom niyene. Gillis, ma won Mattias, owaco ni onongo mitte adada ni en kacel ki dakone gudi cwinygi i kare meno. Mattias onongo penyo lapeny calo: “Lubanga mono en anga? Ka Baibul pe obedo lok pa Lubanga kono? Wangeyo nining ni Lubanga mito ni watim kit man nyo kuman?” En bene onongo penyo wonne ni: “Pingo omyero kinena calo ngat marac ka pe alubo niyeni?”

Gillis otito ni: “I kare mukene awobiwa-ni onongo penyo lapeny kun nongo tye ki akemo,  pe i koma nyo i kom mine, ento i kom lok me ada, pien en onongo winyo ni lubo ada balo kucce.” Gillis okonyo wode nining? “Onongo wabedo piny wan ki woda ci waloko pi cawa malac.” Pol kare Gillis onongo winyo lok pa Mattias laling kun penye lapeny mogo me temo niang tamme ki kit ma en winyo kwede. I kine mukene Gillis onongo tito gin moni bot wode ci wacce ni kong otam iye pi kare mo ma peya guloko iye doki. I kare mukene, en Gillis bene onongo waco ni wode omyero omine kare me tam i kom lokgi-ni. Pi lok ma gubedo ka loko kare ki kare-ni, Mattias ocako niang tyen lok me ginkok ki dok ni Jehovah marowa dok tye ki twero me loyowa. Wonne owaco ni: “Otero kare, dok obedo tek adada, ento motmot, mar pi Jehovah odongo i cwinye. An kacel ki min oda cwinywa yom ni diyo cwinywa me konyo latinwa i kare ma en tye mwaka apar ki wiye okelo adwogi maber dok ogudo cwinye.”

I kare ma Gillis gin ki min ode onongo gitye ka konyo latingi, gubedo ki gen ni Jehovah bikonyogi. Gillis owaco ni: “Pol kare onongo awaco ki Mattias ni marwa pire omiyo an ki mine walego matek adada ni Jehovah okonye me niang lok ada ma wapwonye kwede.” Lunyodo man cwinygi yom ni gudiyo cwinygi dok pe guilo cinggi woko!

Diyo cwiny bene mitte ka watye ka gwoko dano me otwa nyo laremwa ma tye ki two ma ri pi kare malac. Tam kong i kom labol pa Ellen * (nen lok ma tye i tere piny), ma bene bedo i lobo Ulaya.

Mwaki ma romo aboro angec, two akweya kom ogoyo cwar Ellen kiryo ma obalo adamme woko. Macalo adwogine, cware dong pe twero winyo yomcwiny nyo cwercwiny mo. Man obedo twon peko madit adada bot Ellen. En owaco ni: “Man mito diyo cwiny kacel ki lega matek adada.” Dok en omedo ni: “Wang ginacoya ma amaro loyo dok ma kweyo cwinya aye Jo Pilipi 4:13, ma waco ni: ‘Atwero jami ducu liweng pi teko ma en miya. *’” Ki teko kacel ki kony pa Jehovah, Ellen tye ka kanyo peko meno kun diyo cwinye.​—Jabuli 62:5, 6.

LUB LANEN PA JEHOVAH ME DIYO CWINY

Ngene kene ni lanen maber loyo me diyo cwiny obedo Jehovah. (2 Petero 3:15) Ki i Baibul, wakwano labol mapol me diyo cwiny pa Jehovah. (Nekemia 9:30; Icaya 30:18) Tika wi po kit ma Jehovah odok iye i kare ma Abraim obedo ka penye lapeny mapol i kom Tamme me jwero Codom woko? Jehovah pe ongolo lok pa Abraim. En odiyo cwinye kun winyo lapeny ki par pa Abraim ducu. Ci lacen, Jehovah onyuto ni ewinyo par pa Abraim dok ocuko cwinye ni pe Ebijwero Codom kadi bed ni dano apar keken ma kitgi atir ginonge iye. (Acakki 18:22-33) Jehovah kare ducu diyo cwinye ka tye ka winyo lok dok kiniga pe make oyot!

Diyo cwiny obedo kit pa dano manyen ma Lukricitayo ducu omyero gubed kwede. Ka watute matek me bedo jo ma gidiyo cwinygi, ci wabimiyo deyo bot Wonwa, Jehovah ma paro piwa dok diyo cwinye, dok wabibedo i kin “jo ma pi niyegi, ki pi diyo cwinygi, gitye ka nongo gin ma yam Lubanga ociko pire.”​—Jo Ibru 6:10-12.

^ para. 4 Nyig me mar kinyamo i pwony mukwongo i kin pwony abongwen ma kati kare ki kare ma loko i kom nyig ma nyak pi cwiny maleng.

^ para. 15 Nying mogo kiloko.

^ para. 16 Wang ginacoya man kikwanyo ki i Baibul me New World Translation