LUNYODO ducu ginywako i timo gin mo acel ma pud cungo wi dano woko. Lanyodo acel acel miyo gin mo ki i kome. Macalo adwogine, gin mo dongo i i dako doko dano ma kwo. Pi meno, pe bedo me ur ni ka kinywalo latin, dano giloko iye ni “nywal obedo gin me tango.”

Nywalo latin pud nongo obedo acakki me tic mapol ma lanyodo myero otim. I acakki, lutino matino nongo pe gitwero kwo labongo lunyodogi, ka gimedde ki dongo, jami ma gimito dong kato jami me kom keken. Gicako mito kony me dongo i tamgi, i komgi, i kitgi, i kit ma giwinyo kwede, ki dong i yo me cwiny.

Wek gudong maber, lutino myero gunong mar pa lunyodo. Kadi bed wacone ki dog ni amari pire tek, ento mar myero onen i tic. Ada, lutino gimito lanen maber pa lunyodo. Gimito tira i lok me kit, ki cik ma konyogi me kwo. Man mitte cakke i mwaka me tinogi. Tur cwiny twero timme nyo timme ka lutino gunongo kony mot ma dong pe konyo.

Cik ma pud dong giber loyo ma kitwero nongone ginonge i Baibul. Pwony ma jenge i Baibul tye ki kony ma lapore peke. Pwony ma kit man miyo lutino giniang ni gin ma kitye ka waccigi-ni kara pe obedo gin ma dano waco, ento gin ma Lacwecgi, Wongi me polo aye waco. Man weko tira ma kimiyo bedo ki teko ma lapore pe.

Baibul cuko cwiny lunyodo me tic matek adada me miyo cik matir omok i wi lutinogi. Ento ka lutino gidongo, lunyodo pol kare ginongo tek me lok kwedgi i kom jami ma pigi tego. Buk man, Nong Pwony ki Bot Lapwony Madit, kicoyo me gengo gin ma kit meno wek pe otimme.  Bimiyo bot lunyodo ki lutinogi jami me cwiny ma gitwero kwano kacel. Ento makato meno, myero omi kubbe i yo me lok obed tye i kin lutino ki jo ma gikwano buk man kwedgi.

Ibinongo ni buk man miyo kare ki latin wek omi lagam. Lapeny mogo ma rwatte kiketogi i kabedo me akwana. Ka io i lapeny magi, ibineno lain calo eni (—). Man tye me poyo wi ni myero kong icung manok dok cuko cwiny latin me miyo lagam nyo tamme. Lutino gimaro nywako i timo gin ma tye. Ka pe, ci mitigi rweny woko oyot.

Ento ma pire tek loyo, lapeny magi bikonyi me niang tam pa latin. Tye ni, latin romo miyo lagam mo ma pe tye kakare. Ento lok ma lubo lapeny acel acel tye me konyo latin wek odong tamme i yo mupore.

Gin mukene maber aye ni buk man tye ki cal makato 230 kulu. Pol pa cal magi gitye ki coc ma loko i komgi ma cuko cwiny latin me waco tamme, kun jenge i kom gin ma en neno dok kwano. Pi meno, ngi cal magi wun ki latin. Cal magi romo bedo yo maber atika me pwony ma miyo latin niang jami ma pigi tego ma kitye ka pwonyone.

Ka latin opwonyo kit me kwan, cuk cwiny latin me kwano buk man boti ki dok pire kene. Ka en bedo ka kwanone, ci tira maber man moko i wiye ki dong i cwinye. Ento me jingo mar ki woro i kin in ki latinni, omyero wukwan buk man kacel, dok wukwan kare ki kare.

Lutino pe gitye ki gwok mo keken i kom tim me buto, tim me tyet, ki tim mukene maraco ma onongo bene dano pe gitamo pigi i mwaki manok mukato angec. Pi meno, gimito gwok, ma buk man miyo i yo mupore dok atyer ka maleng. Ento lutino omyero kiwek gunge Wang It me ryeko ducu, Wonwa me polo, Lubanga Jehovah. Man aye gin ma Yecu, Lapwony Madit-ti otimo kare ducu. Wageno ni buk man bikonyo in ki jo me odi me yubo kwowu wek wuyom cwiny Jehovah, wek wunong mot me labed naka.