GIN MUMIYO PIRE TEK

Pire tek pien ye balli bimiyo ibedo dano ma genne.

NGO MA ONONGO IN IBITIMO?

Go kong ni: I kare ma Otim onongo tye ka tuko ki lureme, en obayo odilo ma otyero wang dirica me mutoka pa jirani woko.

Kono in aye ibed Otim, ngo ma onongo ibitimo?

TAM KONG!

ITWERO YERO ME TIMO JAMI ADEK:

  1. Ngwec woko.

  2. Kok i kom ngat mukene.

  3. Tito ki jirani gin mutimme, kun bene ititte ni ibiwaco ki lunyodoni wek gucul pire.

Itwero bedo i atematema me Yero Tam me 1. Ento tye tyen lok mapol mumiyo myero iye balli—kadi bed ityero wang dirica me mutoka nyo itimo gin mo mukene.

 TYEN LOK ADEK MUMIYO MYERO IYE BALLI

  1. Ye balli obedo gin matir me atima.

    Baibul wacci: “Wamito ni wati gin maber i kare ducu.”Jo Ibru 13:18.

  2. Dano pol kare gitimo kica bot jo ma giye balgi.

    Baibul waco ni: “Ngat ma kano balle ma pe tuco, pe bimedde ki bedo ki kwo maber; ento ngat ma tuco balle ka bwoto timogi matwal aye kica bimako Lubanga i kome.”Carolok 28:13.

  3. Ma dong pire tek loyo, ye balli yomo cwiny Lubanga.

    Baibul waco ni: “[Jehovah] dag jo ma gitimo gin marac akaka, ento en tye ki gen i kom jo ma kitgi atir.”Carolok 3:32.

Karina, ma mwakane tye 20 pe otuco bot wonne ni polic omiye tikitiki pi dwoyo mutoka i cipid ma lamal. Ento en onongo pe twero kano bal man matwal. Karina owaco ni, “I nge kine ka mwaka acel, babana oneno nyinga i tikitiki ma kimiya-ni. Man oweko atingo twon lok madit!”

Pwony ango ma en onongo? Karina owacci: “Kano balwa medo peko ameda i wiwa. Pud myero icul pi balli i kare me anyim!”

KIT ME NONGO PWONY KI I KOM BALLI

Baibul wacci: “Wan ducu ngat acel acel timo lwak roc mapol.” (Yakobo 3:2) Kit ma dong waneno kwede, wanyuto mwolo ki ryeko ka waye balwa—kun waye cutcut.

Gin ma lubo man aye me nongo pwony ki i kom balli. Anyaka ma nyinge Vera owacci: “Atemo neno bal acel acel calo yo me pwonye wek okonya me yubo kita ki me cobo peko man i yo mapat i nino mukene.” Kong dong wanenu kit ma itwero timo kwede meno.

Ikwayo babani ni okonyi ki pikipikine ento oballe woko i cingi. Ngo ma dong ibitimone?

  • Ling alinga kun itamo ni babani pe bineno ni oballe woko.

  • Tit bot babani gin mutimme kikome.

  • Tit bot babani gin mutimme ento kok i kom ngat mukene.

Ipoto peny pien pe ikwano. Ngo ma dong ibitimone?

  • Wac ni peny obedo tek.

  • Ye ni ipoto peny pien pe ikwano.

  • Wac ni lapwonnyi dagi.

Bedo ka lwodo bal ma itimo i kare mukato angec obedo calo dwoyo mutokani kun nongo iciko wangi i kiyo ma nyuto jami ma ingeyi

 Kong dok itam i kom jami aryo ma kiloko i komgi malo-ni, ci item goyo i wi ni in aye (1) babani ki (2) lapwonnyi. Ngo ma babani ki lapwonnyi gubitamo i komi ka iye balli cutcut? Ngo ma gubitamo i komi ka ikano balli woko?

Kong dong itam i kom bal mo ma itimo i mwaka mukato-ni ci igam lapeny magi.

Bal ango ma in itimo? Icobo peko man nining?

  • Akano woko.

  • Akok i kom ngat mukene pi bal man.

  • Aye balla cutcut.

Ka pe iye balli, iwinyo nining i ngeye?

  • Cwinya obedo yom—pien abwot ki i peko!

  • Cwinya obedo ka poto—onongo myero alok lok ada.

Ngo ma onongo myero itim me cobo peko man i yo maber?

Ngo ma ipwonyo ki i kom bal meno?

ITAMO NINGO?

Pingo jo mukene pe giye balgi?

Dano gubitamo ningo i komi ka itemo umo balli kare ducu, ento gubitamo ningo ka iye balli?Luka 16:10.