1. Pingo omyero wawor Lubanga?

Lubanga me ada en aye Lacwe jami ducu. En Lubanga ma bedo nakanaka. (Jabuli 90:2) En aye obedo Won kwena maber me Baibul. (1 Temceo 1:11) Kit macalo Lubanga aye ngat ma omiyowa kwo-ni, omyero wawor en keken.Kwan Niyabo 4:11.

2. Lubanga tye ki kom ki kit ango?

Pe tye dano mo ma oneno Lubanga pien Lubanga en Cwiny. Cwiny obedo kit kwo ma dok rwomme tye lamal makato cwec ducu me lobo ma gitye ki kom. (Jon 1:18; 4:24) Ento kono, watwero niang kit nyo tam pa Lubanga ki i jami ma en ocweyogi. Me labolle, ature ki nyig yadi mapat pat nyuto botwa mar ki ryekone. Dit pa polo ki lobo nyuto tekone.Kwan Jo Roma 1:20.

Watwero bene pwonyo jami mapol i kom Lubanga ki kwano Baibul. Me labolle, Baibul tito botwa gin ma Lubanga mito ki ma pe mito, kit ma en tero kwede dano, ki kit ma en dok kwede i kom jami mapat pat.Kwan Jabuli 103:7-10.

3. Lubanga mono nyinge tye?

Yecu Owacci: “Wonwa ma tye i polo giwor nyingi maleng.” (Matayo 6:9) Kadi bed Lubanga tye ki nying me dog tic mapol, ento en tye ki nyinge acel keken. Kilwongo nying meno i yo mapat pat ma lubbe ki leb moni. I leb Acholi kilwongo nyinge ni “Jehovah.” Jo mukene gilwongo ni “Yawe.”Kwan Nia 3:15. *

Kikwanyo nying Lubanga woko ki i pol pa Baibul ci kileyo ka kare ki nying me dog tic calo Rwot nyo Lubanga. Ento i kare ma kicoyo Baibul, nying Lubanga onongo tye iye tyen  7,000 kulu. Yecu oweko dano ongeyo nying Lubanga i kare ma en opwonyogi lok i kom Lubanga.Kwan Jon 17:26.

4. Jehovah tika paro piwa?

Calo wego ma lamar man, Lubanga tye ka tic pi ber bedowa i anyim

Kit ma pekki tye mapol ata-ni mono nyuto ni Jehovah pe paro piwa? Jo mukene giwacci en aye lakel peko i kom wan dano, ento man pe lok ada.Kwan Yakobo 1:13.

Lubanga omiyowa twero me moko tam me yero gin ma cwinywa mito piwa kenwa. Myero wabed ki pwoc ni watye agonya me yero me tic pi Lubanga, pe kumeno? (Yocwa 24:15) Ento jo mapol giyero me timo jami maraco i kom jo mukene, omiyo deno can onya mapol. Tim me ngolo kop alenga man cwero cwiny Jehovah adada.Kwan Acakki 6:5, 6.

Jehovah obedo Lubanga ma paro piwa mada. En mito ni wabed ma cwinywa yom. En dong cok giko pekki ducu kacel ki jwero lutim maraco woko. Ento pi tutunu, en tye ki tyen lok matir me ye ni dano kong guden can pi kare mo olo. I Pwony me 8, wabipwonyo tyen lok mumiyo en otimo man.Kwan 2 Petero 2:9; 3:7, 13.

5. Watwero nyiko cok bot Lubanga nining?

Jehovah kwayowa me nyikke cok bote ki lega bote. En maro wan ducu ki acel acel. (Jabuli 65:2; 145:18) En mito timiwa kica. En neno kit ma watute kwede me yomo cwinye, kadi bed kare mukene wapoto. Pi man, kadi bed watye ki roc, pud watwero nongo yomcwiny me bedo ki wat macok ki Lubanga.Kwan Jabuli 103:12-14; Yakobo 4:8.

Kit macalo Jehovah aye omiyowa kwo-ni, myero wamare makato ngat mo keken. (Marako 12:30) Ka imedde ki nyutu mar-ri pi Lubanga ki pwonyo lok i kome kun itimo gin ma cwinye mito, ibinyike cok bote.Kwan 1 Temceo 2:4; 1 Jon 5:3.

^ para. 4 I leb Ibru: YHWH (Yawe)