JO MA giye i kom pwony me Triniti giwaco ni Lubanga tye opokke iye adek—Won, Wod, ki Cwiny Maleng. Ni ngat acel acel ki i kin jo adek-ki rom aroma ki luwote-ni, ki ni gin ducu gubedo won twer ducu, dok gitye labongo acakkigi. Pi meno, ma lubbe ki pwony me Triniti, Won obedo Lubanga, Wod bene obedo Lubanga, ki Cwiny Maleng bene obedo Lubanga, ento kun nongo bedo Lubanga acel keken.

Jo ma gilubo pwony me Triniti giye ni gin pe gitwero tito te pwony man. Kadi bed kit meno, gin pud giromo winyo i cwinygi ni pwony man tye i Baibul. Pire tek kono me ngeyo ni lok ni “Triniti” pe tye i Baibul kadi wa acel. Nyo gwok kit tam mo madok i kom Triniti nonge iye? Me gamo lapeny man, kong wanenu ginacoya mo ma lucwak pwony man gitiyo kwede me cwako kor pwony me Triniti.

“LOK EN LUBANGA”

Jon 1:1 waco ni “I acakki piny Lok onongo tye, Lok tye bot Lubanga, Lok en Lubanga.” Lacen en i cura acel-li, lakwena Jon onyuto ka maleng ni “Lok” obedo Yecu. (Jon 1:14) Dong kit ma kilwongo Lok ni obedo Lubanga-ni, jo mukene dong gimoko ni Wod kacel ki Won omyero gubed dul kom Lubanga acel.

Omyero wi opo ni dul me Baibul man kikwongo coyone i leb Grik. Ingeye, lugony leb gugonyo dul coc me Grik man i leb mukene-ni. Lugony Baibul mapol kono pe gutiyo ki lok ni “Lok en Lubanga.” Pingo? Pi ngec ma gitye kwede i kom leb Grik ma kitiyo kwede i coyo Baibul, lugony leb magi gumoko ni omyero kigony dul man i yo mapat ki “Lok en Lubanga.” I yo ma nining? Me laporre: “Lok obedo ngat maleng.” (A New Translation of the Bible) “Lok obedo lubanga.” (The New Testament in an Improved Version) “Lok onongo tye bot Lubanga dok onongo cal kwede.” (The Translator’s New Testament) Ma lubbe ki gony magi, Lok pe obedo Lubanga kikome.* Ento, pi rwom mamalo ma en tye kwede i kin gin aketa pa Jehovah, kiloko i kom en Lok ni “lubanga.” Kakany, tyen lok ni “lubanga” obedo “en ngat matek.”

MED NGEC MUKENE

Pol pa dano pe gingeyo leb Grik ma kicoyo kwede Baibul. Dong i yo ango ma itwero ngeyo kwede gin ma Jon onongo tye ka lok i iye? Tam i kom lapor man: Lapwony mo otito gin ma en tye ka pwonyone bot lutino kwanne. Ingeye, lutino kwan-ni guniang gin ma kitito ni mapat pat. Yo ango ma lutino man twero cobo kwede lok man? Giromo penyo lapwony-nyi me medo lok mukene doki. Labongo akalakala mo, medo ngec-gi i kom lok meno bikonyogi me niang gin ma kipwonyo-ni maber. Dong i kit acel-li, me niang tyen lok ma tye i Jon 1:1, iromo medde ki neno Jiri pa Jon pi nongo ngec mukene i kom rwom ma Yecu tye kwede. Medo ngec mukene i kom lok man bikonyi me moko tam matir.

Me lapore, nen gin ma Jon omedde ki coyone i cura 1, tyeng 18: “Pe tye ngat mo ma yam oneno Lubanga [Won Twer Ducu].” Ento dano guneno Yecu, Wod, pien Jon owaco ni: “Lok [Yecu] odoko dano, obedo i kinwa, kun opong ki kica ki ada; wan waneno deyone.” (Jon 1:14) I yo ango dong ma Wod twero bedo kwede but Lubanga Won Twer Ducu? Jon bene owaco ni Lok onongo ‘tye bot Lubanga.’ Dong kitwero waco ni dano moni tye bot ngati moni kun nongo bedo en ngat eno-ni nining? (Jon 1:34) Medo i kom meno, kit ma kicoyo kwede i Jon 17:3, Yecu otito ka maleng apokapoka ma tye i kin en ki Wonne me polo. En olwongo Wonne me polo ni “Lubanga acel me ada.” Dok tung i agikki me Jirine, Jon ogiko lokke i yo macek kun waco ni: “Magi gicoyo wek wuye ni, Yecu en Kricito ma Lubanga oyero, Wod pa Lubanga.” (Jon 20:31) Nge maber ni kilwongo Yecu ni Wod pa Lubanga, ento pe Lubanga. Ngec man ma kimedo i Jiri pa Jon-ni nyuto kit ma omyero kiniang kwede Jon 1:1. Yecu, Lok, obedo “lubanga” pi tyen lok ni en tye ki rwom mamalo ento pe rom aroma ki Lubanga Won Twer Ducu.

MOK LOK MA TYE ADA

Tam kong dok aye i kom lapor pa lapwony ki lutino kwan-ni. Keti jo mukene onongo pud gitye ki akalakala kadi inge winyo lok ma lapwony-nyi omedo. Ci ngo ma dong gitwero timone? Gitwero niang ki bot lapwony mukene-ne doki. Ka lapwony me ariyo-ni omoko lok pa lapwony ma okwongo-ni, ci akalakala ma lutino-ni onongo gitye kwede romo gik. I yo acel-lu, ka itye ki akalakala i gin ma Jon ocoyo i Baibul i kom wat ma tye i kin Yecu ki Lubanga Won Twer Ducu, ci iromo niang ki bot lacoc me Baibul mukene. Me laporre, tam kong i kom gin ma Matayo ocoyo. Ma dok i kom agikki me kare man, en owacci Yecu owaco ni: “Ento nino meno ki cawa meno, pe tye ngat mo ma ngeyo, kadi wa lumalaika ma i polo, kadi wa Wod, ento kono Lubanga Won keken aye ngeyo gire.” (Matayo 24:36) Lok magi nyuto nining ni Yecu pe obedo Lubanga Won Twer Ducu?

Yecu owacci Won ngeyo jami mapol loyo Wod. Ka Yecu onongo obed but Lubanga Won Twer Ducu, kono onongo ngeyo jami marom aroma ki Wonne. Pi meno, Wod ki Won pe gitwero bedo rom. Ento jo mukene pud giromo waco ni: ‘Yecu onongo tye ki kit me kwo aryo. Kany, en onongo tye ka lok macalo dano.’ Kadi nongo obed kumeno, ento cwiny maleng kono? Ka obedo but Lubanga mukene calo Won bene, pingo pe Yecu owaco ni en cwiny maleng-ngi bene ngeyo gin ma Won ngeyo?

Ka imedde ki kwano Baibul, ibingeyo tyeng me Baibul mapol ma loko i kom lok man. Tyeng magi gibimoko lok ada i kom Won, Wod, ki cwiny maleng.—Jabuli 90:2; Tic pa Lukwena 7:55; Jo Kolocai 1:15.


*  Me niang i kom kit me lok pa jo Grik ma kitiyo kwede i Jon 1:1, nen pot karatac 26-9 me brocuwa Should You Believe in the Trinity? ma Lucaden pa Jehovah gucoyo.

← Nen dul ma lok man a ki iye